राष्ट्रपतिको आह्वान सावधानी अपनाएर होली मनाउन

राष्ट्रपतिको आह्वान  सावधानी अपनाएर होली मनाउन

कोरोनाबाट बच्न स्वास्थ्य सावधानीका उपाय अपनाएर होली मनाउन राष्ट्रपति विद्यादेवी भण्डारीले आह्वान गरेकी छन् ।

राष्ट्रपति भण्डारीले अहिले पनि कोरोना भइरस (कोभिड-१९) महामारी टरिनसकेको भन्दै पूर्व सावधानीका उपाय अवलम्बन गर्न आग्रह गरेकी हुन् ।

 

उनले होली पर्वको शुभकामना दिदै यसले लोक संस्कृतिको प्रवर्धन गर्ने र समस्त नेपालीहरू बीच आपसी सद्‍भाव¸ सहिष्णुता¸आत्मीयता र बन्धुत्वको भावना अभिवृद्धिगरी राष्ट्रिय एकतालाई थप सुदृढ बनाउन योगदान पुर्‍याउने विश्वाससमेत व्यक्त गरेकी छन् ।

राष्ट्रपति भण्डारीले यसै पर्वका अवसरमा सुसंस्कृत र न्यायपूर्ण समाज निर्माणको कामनासमेत गरेकी छन् ।समाजमा ‘यस पर्वले विद्यमान विभिन्न प्रकारका विकृति¸विसङ्गति¸कुरीति एवं कुपरम्पराहरूलाई निर्मूल गर्दै मौलिक संस्कृतिसहितको सभ्य¸सुसंस्कृत एवं न्यायपूर्ण समाजको निर्माण र संवर्द्धन गर्न उत्प्रेरित गरिरहोस् भन्ने कामना गर्दछु,’ उनको शुभकामना सन्देशमा उल्लेख छ ।

त्यसैगरि , उपराष्ट्रपति नन्दबहादुर पुनले पनि शुभकामना सन्देश जारी गर्दै होली पर्वले नेपाली समाजलाई एक सूत्रमा जोडेर आपसी सद्भाव, सहिष्णुता, प्रेम र भाइचाराको अभिवृद्धि गर्दै राष्ट्रिय एकतालाई बलियो बनाउने विश्वास व्यक्त गरेका छन् ।

 

Leave a Reply

Your email address will not be published. Required fields are marked *