आज विश्व हेपाटाइटिसविरुद्धको दिवस मनाइदै, हेपाटाइटिसको जोखिमलाई ध्यान दिन आह्वान

आज विश्व हेपाटाइटिसविरुद्धको दिवस मनाइदै, हेपाटाइटिसको जोखिमलाई ध्यान दिन आह्वान
Share this

असल खबर।   ‘हेपाटाइटिस पर्खिनुहुन्न’ भन्ने नारासहित भाइरसबाट हुने सरुवा रोग हेपाटाइटिस विरुद्धको दिवस आज मनाइँदैछ ।
प्रत्येक वर्ष जुलाई २८ तारिखमा हेपाटाइटिसविरुद्ध जनचेतना फैलाउने उद्देश्य साथ यस दिवस मनाउने गरिन्छ । कोरोना सङ्क्रमण जस्तै हेपाटाइटिसको जोखिम पनि उतिकै रहेकाले ध्यान दिन आह्वान गरिएको छ । अरु मौसम भन्दा बर्खामा यो रोग बढी देखा पर्ने गर्छ । हेपाटाइटिसको भाइरस सङ्क्रमणका कारण कलेजो सुन्निने गर्छ । सामान्यतया, हेपाटाइटिस ए, बी, सी, डी र ई गरी पाँच प्रकारका हुन्छन् । त्यसमध्ये हेपाटाइटिस बी सबैभन्दा घातक मानिन्छ ।
पानी, विषाक्त सुईको प्रयोग, असुरक्षित शारीरिक सम्बन्धलगायतका कारण यो रोग एकबाट अर्कोमा सजिलै सर्ने गर्छ । हेपाटाइटिस ए र ई पानी तथा दूषित खानेकुराका कारण सर्ने गर्छ । जसलाई जन्डिस लागेको भनेर बुझ्ने गरिएको छ । त्यस्तै हेपाटाइटिस बी र सी लागेर हरेक वर्ष १३ लाख मानिसको ज्यान जाने गरेको तथ्यांक छ ।
हेपाटाइटिस ‘बी’ र ‘सी’ लाई मौन महामारी मानिन्छ । यसले मुख्यगरी बालबालिका र सीमान्तकृत समूहलाई बढी सताउने गरेको विज्ञको भनाइ छ । धेरैलाई यो रोग लागेको थाहा नहुँने र अरुलाई समेत सार्ने गरेको पाइएको छ । दूषित पानी तथा खानेकुरा नखान, साबुन पानीले बेलाबेला राम्ररी हात धुन, असुरक्षित सुईको प्रयोग नगर्न र असुरक्षित यौन सम्पर्क नगर्न तथा हेपाटाइटिस विरुद्धको खोप लगाउन सरुवा रोग विशेषज्ञ डाक्टर सागरराज राजभण्डारीको सुझाव छ ।

अन्तिम अपडेट: 2021-July-28 समय 8:36 AM

32 पटक पढिएको

लेखक

बिष्णु प्रसाद बराल

बिष्णु प्रसाद बराल
पोखरामा रहेर पत्रकारिता क्षेत्रमा सक्रिय बिष्णु प्रसाद बराल असल खबरको सहकर्मी हुनुहुन्छ ।

Share this
Powered By : Asal Sathi Media