अज्ञात रोगबाट भारतको उत्तर प्रदेशमा ५० जनाभन्दा बढीको मृत्यु

अज्ञात रोगबाट भारतको उत्तर प्रदेशमा ५० जनाभन्दा बढीको मृत्यु
Share this

असल खबर -अज्ञात रोगबाट भारतको उत्तर प्रदेशमा ५० जनाभन्दा बढीको मृत्यु भएको छ । मृत्यु हुनेमा धेरैजसो बालबालिका छन् ।
अन्तर्राष्ट्रिय सञ्चारमाध्यमहरुका अनुसार उच्च ज्वरो आउने र धेरै पसिना आउनेजस्ता समस्या देखिएको छ । उनीहरुमध्ये धेरैले टाउको दुख्ने, शरीरमा पानी कम भएको र वाकवाकी लाग्नेजस्ता समस्या देखिएको बताएका थिए । केही बिरामीको हात र खुट्टामा बिमिरा आउने समस्या देखिएको थियो ।
उक्त अज्ञात रोगका कारण हाल सयौं मानिस अस्पतालमा भर्ना भएका छन् । उत्तर प्रदेशको पूर्वी ६ जिल्लामा यसको प्रकोप फैलिएको समाचारमा बताइएको छ । हालसम्म यो समस्याको कारण मृत्यु हुने कसैमा पनि कोरोना भाइरस (कोभिड–१९)को संक्रमण भने पुष्टि भएको छैन । हालै मात्र भारत कोरोनाको दोस्रो लहरबाट बिस्तारै बाहिर आउँदै गरेको अवस्थामा उत्तर प्रदेशमा अर्को प्राणघातक रोग देखिएको हो ।

यो समस्या देखिएको जिल्लाका डाक्टरहरुले मृत्युको कारण लामखुट्टेको टोकाइबाट सर्ने डेंगुको संक्रमण हुन सक्ने बताएका छन् । उनीहरुका अनुसार अस्पताल आउने मानिसको रगतमा प्लेटलेटको मात्रा निकै कम देखिएको बताएका छन् । यो लक्षण डेंगुका बिरामीसँग पनि मिल्छ ।
पोथी लामखुट्टेको टोकाइबाट सर्ने डेंगु रोग विश्वका एक सयभन्दा धेरै मुलुकमा देखिइसकेको छ, तर यसका ७० प्रतिशतभन्दा धेरै संक्रमित एसियामा भेटिएका छन् । बालबालिकामा यो रोगको जोखिम सबैभन्दा धेरै हुन्छ ।  एजेन्सी 

अन्तिम अपडेट: 2021-September-01 समय 3:10 PM

219 पटक पढिएको

लेखक

बिष्णु प्रसाद बराल
बिष्णु प्रसाद बराल
पोखरामा रहेर पत्रकारिता क्षेत्रमा सक्रिय बिष्णु प्रसाद बराल असल खबरको सहकर्मी हुनुहुन्छ ।
Share this
WP2Social Auto Publish Powered By : XYZScripts.com