बिष्णु प्रसाद बराल 
असल खबर -नेपालमा हाल कोरोना सङ्क्रमणको दर १० प्रतिशतले ओरालो लागेको छ । बितेको २४ घण्टामा १० हजार नौ सय १६ जनाको नमुना परीक्षण गरेकोमा एक हजार एक सय ४६ जनामा कोरोना सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
२४ घण्टामा परीक्षण गरिएका नमुनामध्ये १० दशमलव ४९ प्रतिशतमा सङ्क्रमण पुष्टि भएकाे हो । आज थपिएसगै नेपालमा कोरोना सङ्क्रमण पुष्टि हुनेको सङ्ख्या आठ लाख ६१ हजार नौ सय ५२ पुगेको छ ।बितेको २४ घण्टामा एक हजार ६ सय ६० जना निको भएसँगै कोरोना सङ्क्रमणमुक्त हुनेको सङ्ख्या सात लाख ३६ हजार ६ सय ६६ जना पुगेको छ ।
यही अवधिमा थप २१ जनाले कोरोना सङ्क्रमणका कारण ज्यान गुमाएका छन् । यस सहित नेपालमा कोरोना सङ्क्रमणका कारण ज्यान गुमाउनेको सङ्ख्या १० हजार नौ सय २४ पुगेको छ ।
अहिले २७ हजार नौ सय ५८ जना सक्रिय सङ्क्रमित रहेकामा चार सय ५८ जनाको आईसीयू र एक सय ४५ जनाको भेन्टिलेटरमा उपचार भइरहेको छ ।
बितेको २४ घण्टामा २९ हजार एक सय ८९ जनाले कोरोनाविरुद्धको खोप लगाएका छन् । यस सहित नेपालमा कोरोनाविरुद्धको खोपको पूर्ण मात्रा लगाउनेको सङ्ख्या ५१ लाख २० हजार आठ सय ५७ जना र एक मात्रा लगाउनेको सङ्ख्या ५७ लाख ४० हजार तीन सय ४५ पुगेको मन्त्रालयले जनाएको छ ।
अन्तिम अपडेट: 2021-September-10 समय 6:38 PM
लेखक
