Breaking News
राष्ट्रिय कर दिवस मनाउन पोखरामा कर सप्ताहका विभिन्न कार्यक्रम शुरु

पोखरा । आज राष्ट्रिय कर दिवस । राष्ट्रिय कर दिवस विविध कार्यक्रम गरी मनाइँदैछ । पोखरामा पनि कर दिवसको अवसरमा प्रभातफेरी गरिएको छ ।


“कर न्याय र सुशासनको सुनिश्चितता, समृद्धिमा नागरिक सहभागिता” भन्ने मूल नाराका साथ राष्ट्रिय कर दिवस २०८३ मनाइने भएको छ ।राष्ट्रिय कर दिवसको अवसरमा आन्तरिक राजस्व कार्यालय पोखराले विभिन्न कार्यक्रम आयोजना गरेको छ । कर सप्ताहका रूपमा मनाइने कार्यक्रममा प्रभातफेरी, वस्तुगत संघसंस्थासँग अन्तरक्रिया तथा कर प्रशिक्षण, मैत्रीपूर्ण फुटसल प्रतियोगिता र करदाता सम्मान लगायतका कार्यक्रम समावेश गरिएको छ ।


कार्यक्रम अन्तर्गत मंसिर १ गते मंगलवार बिहान ७ बजे पोखरा सभागृहदेखि रत्नचोकस्थित आन्तरिक राजस्व कार्यालयसम्म प्रभातफेरी आयोजना गरिएको थियो । कार्यक्रमा सहभागिहरुले विभिन्न प्लेकार्ड सहित सहभागिता जनाएका थिए । प्रभातफेरी सभागृहदेखि, सृजनाचोक, जनप्रिय स्कुल, रत्नचोक, राष्ट्रबैंक चोक हुदै शहिदचोकबाट रत्नचोकस्थित आन्तरिक राजस्व कार्यालयमा पुगेर समापन भएको थियो ।


कार्यक्रममा पोखरामा रहेका विभिन्न संघ-सस्थाहरुको सहभागिता रहेको थियो । सहभागिता जनाउने संस्थाहरुमा पोखरा उद्योग बाणिज्य संघ, लेखनाथ उद्योग बाणिज्य संघ, पोखरा पर्यटन परिषद्, नेपाल निर्माण ब्यवसायी संघ कास्की, महिला उद्यमी संघ नेपाल कास्की लगायतका संस्थाहरुको सहभागिता रहेको थियो ।


त्यसैगरी, मंसिर २ देखि ६ गतेसम्म विभिन्न स्थानमा वस्तुगत संघसंस्थासँग अन्तरक्रिया तथा कर प्रशिक्षण कार्यक्रम सञ्चालन गरिने कार्यालयले जनाएको छ । मंसिर ५ र ६ गते छोरेपाटनस्थित डेभिस फल फुटसल सेन्टरमा मैत्रीपूर्ण फुटसल प्रतियोगिता आयोजना हुनेछ।
कर सप्ताहको अन्तिम दिन मंसिर ७ गते आन्तरिक राजस्व कार्यालय पोखराको परिसरमा करदाता सम्मानसहित विशेष कार्यक्रम आयोजना गरिनेछ ।


कर प्रणालीप्रति नागरिकको सचेतना अभिवृद्धि गर्ने, करदातालाई करसम्बन्धी जानकारी प्रदान गर्ने, कर सहभागिता बढाउने तथा कर प्रशासन र करदाताबीचको सम्बन्धलाई थप सुमधुर बनाउने उद्देश्यले कार्यक्रम आयोजना गर्न लागिएको आन्तरिक राजस्व कार्यालय पोखराका प्रमुख कर अधिकृत शिवप्रसाद ढुङ्गानाले जानकारी दिनुभयो ।


पोखरा कार्यालयमा आयोजित करदाता सम्मान कार्यक्रममा तीन जनालाई सम्मान गरिने कार्यलयले जनाएको छ ।

हेमजामा मङ्सिर ५ र ६ गते दोस्रो साहित्य महोत्सव हुने

पोखरा । नेपाली भाषा, साहित्य, कला र संस्कृतिको संरक्षण, संवर्द्धन तथा प्रवर्द्धन गर्ने उद्देश्यले कास्कीको हेमजामा दोस्रो हेमजा साहित्य महोत्सव–२०८३ आयोजना हुने भएको छ।

हेमजा साहित्य प्रतिष्ठान नेपालको आयोजनामा आगामी मङ्सिर ५ र ६ गते पोखरा महानगरपालिका–२५ स्थित काव्यनगरी हेमजामा महोत्सव हुन लागेको हो। महोत्सवका सम्बन्धमा जानकारी दिन आयोजित पत्रकार भेटघाट कार्यक्रममा आयोजकले महोत्सवको उद्देश्य, तयारी र कार्यक्रमबारे जानकारी गराएको छ।

प्राज्ञ एवं महाकाव्यकार शङ्करमण त्रिपाठी (छन्दमणि) को परिकल्पनामा वि.सं. २०८२ देखि सुरु भएको हेमजा साहित्य महोत्सवको पहिलो संस्करणमा ४१ जिल्लाका स्रष्टाहरूको सहभागिता रहेको थियो। पहिलो महोत्सवकै अवसरमा हेमजालाई ‘काव्यनगरी’ घोषणा गरिएको थियो। पहिलो संस्करणको सफलताबाट उत्साहित हुँदै दोस्रो संस्करण आयोजना गर्न लागिएको आयोजकले जनाएको छ।

प्राकृतिक सौन्दर्य, सांस्कृतिक वैभव र साहित्यिक चेतनाले सम्पन्न हेमजालाई राष्ट्रिय तथा अन्तर्राष्ट्रिय साहित्यिक मानचित्रमा स्थापित गर्ने महोत्सवको मुख्य उद्देश्य रहेको छ। महोत्सवलाई साहित्यिक कार्यक्रमका रूपमा मात्र सीमित नराखी हेमजाको मौलिक पहिचान, भाषा, संस्कृति, पर्यटन, कला र सामाजिक एकतालाई उजागर गर्ने साझा उत्सवका रूपमा विकास गर्ने लक्ष्य राखिएको छ।

महोत्सवमा कविता, आख्यान, गजल, मुक्तक, गीत, बालसाहित्य, समालोचना, साहित्यिक विमर्श, स्रष्टा सम्मान, काव्यवाचन, पुस्तकमाथि परिचर्चा तथा साहित्यिक संवादलगायतका कार्यक्रम समावेश गरिनेछन्। स्थानीय कला, संस्कृति, मौलिकता र हेमजाको साहित्यिक पर्यटनसँग सम्बन्धित गतिविधिलाई समेत प्राथमिकता दिइने आयोजकले जनाएको छ।

दुई दिनसम्म सञ्चालन हुने महोत्सवमा ‘कविता : अनुभूति र नियति’, ‘काव्यनगरी हेमजा : साहित्यिक पर्यटनको सम्भावना’ र ‘सारङ्गीको सुसेली : लोकसंस्कृतिको धुन’ लगायतका विषयमा विमर्श तथा सिर्जनात्मक कार्यक्रम सञ्चालन हुनेछन्। यसका साथै भजन, सिर्जना, काव्यनगरी दर्शन, कविता, मुक्तक, लघुकथा र गजल वाचनलगायतका कार्यक्रम पनि महोत्सवका आकर्षण रहनेछन्।

यस वर्षको उद्घाटन सत्रमा कविवर एवं भाषासेवी मुकुन्दशरण उपाध्यायलाई अभिनन्दन ग्रन्थ अर्पण गरी अभिनन्दन गरिने कार्यक्रम रहेको छ।

हेमजालाई राष्ट्रिय तथा अन्तर्राष्ट्रिय साहित्यिक पहिचान दिलाउनुका साथै यहाँको भाषा, कला, संस्कृति र पर्यटनलाई साहित्यसँग जोडेर प्रवर्द्धन गर्ने उद्देश्यले महोत्सव आयोजना गरिएको हेमजा साहित्य प्रतिष्ठान नेपालका अध्यक्ष सुनील गायकले बताए। उनले महोत्सव कुनै एक व्यक्ति वा संस्थाको मात्र अभियान नभई हेमजाको साहित्यिक पहिचान र सामाजिक गौरवसँग जोडिएको साझा अभियान भएको उल्लेख गर्दै सबैको साथ र सहयोग आवश्यक रहेको बताए।

त्यसैगरी, नयाँ पुस्तामा पठन संस्कृति, लेखन सीप र साहित्यप्रतिको रुचि अभिवृद्धि गर्नुका साथै स्थानीय तथा राष्ट्रिय स्तरका स्रष्टाबीच सिर्जनात्मक संवाद र विभिन्न साहित्यिक संस्थाबीच सहकार्यको वातावरण निर्माण गर्ने लक्ष्य महोत्सवले राखेको प्रतिष्ठानका महासचिव कोविदशरण उपाध्यायले बताए। उनले महोत्सवलाई व्यापक सहभागितामूलक र उपलब्धिमूलक बनाउन सबै साहित्यप्रेमीलाई सहभागी हुन आग्रह गरे।

महोत्सवले हेमजाको साहित्यिक पहिचानलाई थप उचाइमा पुर्‍याउनुका साथै स्थानीय कला, संस्कृति र पर्यटन प्रवर्द्धनमा समेत योगदान पुर्‍याउने अपेक्षा गरिएको छ।

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23083, citypokhara.com

समाज रूपान्तरणमा सामाजिक सङ्घसंस्थाको भूमिका महत्त्वपूर्ण : प्रजिअ गुरुङ

पोखरा । कास्कीका प्रमुख जिल्ला अधिकारी कुमानसिंह गुरुङले समाज रूपान्तरणमा सामाजिक सङ्घसंस्थाहरूको भूमिका महत्त्वपूर्ण रहेको बताएका छन् ।

पोखरा–८, सिमलचौरस्थित सृजना विकास केन्द्रको ४९औँ वार्षिक साधारणसभा तथा ४६औँ स्थापना दिवसका अवसरमा प्रकाशित ‘सृजना दर्पण–२०८३’ को विमोचन गर्दै उनले समुदायको उत्थान, सामाजिक सचेतना र मानवीय सेवामा सामाजिक संस्थाहरूले पुर्‍याएको योगदान प्रशंसनीय रहेको बताए ।

राज्यले मात्र सबै क्षेत्रमा पहुँच पुर्‍याउन नसक्ने अवस्थामा सामाजिक सङ्घसंस्थाहरूले शिक्षा, स्वास्थ्य, वातावरण संरक्षण, खेलकुद, जनसेवा तथा समुदायको समग्र विकासमा महत्त्वपूर्ण भूमिका निर्वाह गर्दै आएको उनले उल्लेख गरे ।

सामाजिक सङ्घसंस्थाहरूलाई अझ पारदर्शी, जबाफदेही र परिणाममुखी भएर काम गर्न सुझाव दिँदै उनले स्थानीय प्रशासन यस्ता संस्थासँग सहकार्य गर्न सधैँ तयार रहेको बताए ।

मानव जीवनलाई सुव्यवस्थित, मर्यादित र सभ्य बनाउन मर्यादा, आचरण र अनुशासन महत्त्वपूर्ण हुने उनको भनाइ थियो । मानिसको पहिलो पाठशाला घर, आमाबुबा र परिवार भएकाले बालबालिकालाई सानैदेखि ठूलालाई आदर गर्ने, सानालाई माया गर्ने, नियम पालना गर्ने र असल व्यवहार गर्ने संस्कार सिकाउनुपर्नेमा उनले जोड दिए ।

विद्यालय, छरछिमेक, साथीसङ्गी तथा समाजका अनुभवी व्यक्तिहरूबाट पनि असल आचरण सिक्न सकिने बताउँदै उनले किताब, जीवनी र आफ्नै अनुभव तथा गल्तीबाट पाठ सिकेर आफूलाई अनुशासित बनाउनुपर्ने धारणा राखे । व्यक्तिगत विकास, सामाजिक सद्भाव र व्यावसायिक सफलताका लागि समेत असल आचरण आवश्यक रहेको उनले बताए ।

कार्यक्रममा संस्थाका अध्यक्ष चन्द्र गिरीले सृजना विकास केन्द्रले सृजना बहिरा विद्यालय, जनप्रिय बहुमुखी क्याम्पसको स्थापना, महिला सशक्तीकरण तथा लघुवित्त कार्यक्रम, सृजना महिला बचत तथा ऋण सहकारी र सृजना खानेपानी परियोजनालगायतका बहुक्षेत्रीय सामुदायिक गतिविधि सञ्चालन गर्दै आएको जानकारी दिए ।

पूर्वअध्यक्ष तथा ‘सृजना दर्पण–२०८३’ प्रकाशन समितिका संयोजक हरिप्रसाद बरालले संस्थाको इतिहास र गतिविधिको अभिलेखीकरणमा प्रकाशनले महत्त्वपूर्ण योगदान पुर्‍याएको बताए । उनले २०४५ सालमा प्रकाशित ‘पहिलो सृजना स्मारिका’ देखि २०८३ सालको ‘सृजना दर्पण’ सम्मका प्रकाशन संस्थाका महत्त्वपूर्ण सम्पत्ति र ऐतिहासिक अभिलेखका रूपमा रहेको उल्लेख गरे ।

कार्यक्रममा सडक डिभिजन पोखरा तथा मध्यपहाडी राजमार्गका कार्यालय प्रमुख नारायणदत्त भण्डारी, जनप्रिय क्याम्पस व्यवस्थापन समितिका अध्यक्ष राजेन्द्र पहारी, सल्लाहकार समितिका सभापति लीलाधर बराल, संस्थापक अध्यक्ष तथा सल्लाहकार डम्बरबहादुर केसी र सृजना महिला बचत तथा ऋण सहकारी संस्थाकी अध्यक्ष शारदा गिरीले शुभकामना मन्तव्य व्यक्त गरे ।

उनीहरूले संस्थाले समाजमा सकारात्मक परिवर्तन ल्याउन महत्त्वपूर्ण योगदान पुर्‍याएको बताए ।
साधारणसभामा कार्यवाहक महासचिव उर्मिला भट्टराईले संस्थाको वार्षिक प्रगति प्रतिवेदन तथा भावी प्रस्तावित योजना प्रस्तुत गरिन् ।

त्यसैगरी कोषाध्यक्ष अशोककुमार श्रेष्ठले आर्थिक अवस्था र आर्थिक प्रतिवेदन प्रस्तुत गरे । दुवै प्रतिवेदन छलफलपछि सर्वसम्मत रूपमा पारित गरिएको पूर्वअध्यक्ष राजु पौडेलले जानकारी दिए ।

संस्थाका अध्यक्ष चन्द्र गिरीको अध्यक्षतामा सम्पन्न कार्यक्रममा उपाध्यक्ष बालकृष्ण बरालले स्वागत मन्तव्यसहित कार्यक्रमको उद्देश्यबारे प्रकाश पारे भने सञ्चालन कार्यवाहक महासचिव उर्मिला भट्टराईले गरिन् ।

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23079, citypokhara.com

पोखराको जिरो किलोमिटरमा स्कुटर बोलेरोमा ठोक्किँदा दुई युवकको मृत्यु

पोखरा ।

पोखरा महानगरपालिका–५ जिरो किलोमिटरमा रोकिराखेको बोलेरो जिपमा स्कुटर ठोक्किँदा दुई जनाको मृत्यु भएको छ।

लु ३ च ५२७४ नम्बरको बोलेरो जिपको पछाडिबाट ग २३ प १७१६ नम्बरको स्कुटर ठोक्किएको थियो । दुर्घटनामा स्कुटर चालक र पछाडि सवार दुवै जनाको मृत्यु भएको छ ।

मृत्यु हुनेमा म्याग्दीको मंगला गाउँपालिका–९ दारुङ घर भएका २१ वर्षीय विवेक दर्जी र म्याग्दीकै रघुगंगा गाउँपालिका–३ बस्ने २६ वर्षीय मोहन परियार रहेका छन् ।

दुर्घटनामा गम्भीर घाइते भएका उनीहरूको उपचारको क्रममा मृत्यु भएको हो । दुवै सवारी साधन र बोलेरो चालकलाई नियन्त्रणमा लिई उक्त दुर्घटनाको सम्बन्धमा थप अनुसन्धान भइरहेको प्रहरीले जनाएको छ ।

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23075, citypokhara.com

फोनिज युवा पत्रकारिता पुरस्कारको छनोट समिति गठन, संयोजकमा रुद्र श्रीषमगर

पोखरा । नेपाल आदिवासी जनजाति पत्रकार महासंघ (फोनिज) कास्कीले प्रदान गर्दै आएको मेजर लक्ष्मीप्रसाद र हुमकुमारी गुरुङ एमभिओ बिइएम सेकेन्ड जिआर युवा पत्रकारिता पुरस्कार–२०८३ का लागि छनोट समिति गठन गरेको छ।

फोनिज गण्डकीका इन्चार्ज रुद्र श्रीषमगरको संयोजकत्वमा गठित समितिको सदस्यमा फोनिज गण्डकीका अध्यक्ष खिमाकुमारी गुरुङ, उपाध्यक्ष सुमन गुरुङ, फोनिज कास्कीका अध्यक्ष बिनुकुमारी थापा र सचिव देविका तामाङ रहेका छन्।

मेजर लक्ष्मीप्रसाद र हुमकुमारी गुरुङको वैवाहिक वर्षगाँठको अवसरमा स्थापना गरिएको उक्त पुरस्कार आदिवासी जनजाति समुदायका क्रियाशील युवा पत्रकारलाई प्रोत्साहन गर्ने उद्देश्यले प्रदान गरिँदै आएको छ।

फोनिज कास्कीले २०८२ सालदेखि यो पुरस्कार प्रदान गर्न थालेको हो। पहिलो वर्ष कास्कीका क्रियाशील पत्रकार सुमन गुरुङ पुरस्कृत भएका थिए।

आदिवासी जनजातिका हक, अधिकार र पहिचानका सवाललाई पत्रकारितामार्फत उजागर गर्दै कम्तीमा पाँच वर्षदेखि पत्रकारिता क्षेत्रमा क्रियाशील युवा पत्रकारलाई सम्मान तथा प्रोत्साहन गर्ने उद्देश्यले पुरस्कार स्थापना गरिएको हो। यस वर्षको पुरस्कार आगामी मंसिर ३ गते वितरण गरिने फोनिज कास्कीका अध्यक्ष बिनुकुमारी थापाले जानकारी दिइन्।

पुरस्कारका संस्थापक मेजर लक्ष्मीप्रसाद गुरुङ सामाजिक क्षेत्रमा समेत सक्रिय छन्। उनी द गोर्खाज बचत तथा ऋण सहकारी संस्थाका अध्यक्ष, गल्फ संघ कास्की तथा गोर्खा कम्युनिटी कास्की नेपालका संस्थापक अध्यक्ष हुन्।

उनी विभिन्न सामाजिक संघसंस्थामा आबद्ध रहनुका साथै विगत १८ वर्षदेखि गोर्खा अभियान र सामाजिक कार्यमा सक्रिय छन्।उनले बेलायत र ब्रुनाईमा ४२ वर्ष सेवा गरेका थिए।

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23072, citypokhara.com

रत्न मन्दिर र हिमागृहको जग्गा लिजमा नदिन जिसस कास्कीको आग्रह

पोखरा। जिल्ला समन्वय समिति (जिसस) कास्कीले पोखराको बाराहीघाटस्थित जग्गा, रत्न मन्दिर र हिमागृहको जग्गा लिजमा नदिन सरकारसँग आग्रह गरेको छ। समितिको शुक्रबार सम्पन्न ५४औँ बैठकले उक्त निर्णय गरेको हो।

जिल्ला समन्वय समिति कास्कीका प्रमुख लिलाधर पौडेलले पोखरा महानगरपालिकासहित कास्की जिल्लाभित्र रहेका सरकारी तथा सार्वजनिक जग्गाको संरक्षण र संवर्द्धन गर्नु सबैको कर्तव्य भएको बताए।

ऐतिहासिक, प्राकृतिक, पुरातात्त्विक तथा सांस्कृतिक सम्पदाको संरक्षण गर्नु साझा दायित्व भएको उल्लेख गर्दै उनले पछिल्लो समय सम्पदाको संरक्षण गर्नुको सट्टा अतिक्रमण गर्ने, भाडामा लगाउने तथा लिजमा दिने र लिने गतिविधिप्रति समितिको गम्भीर ध्यानाकर्षण भएको बताए।

यसै सन्दर्भमा नेपाल ट्रस्टको नाममा रहेको पोखराको बाराहीघाटस्थित जग्गा, रत्न मन्दिर र हिमागृहको जग्गा फेवातालको सीमासम्बन्धी मापदण्डभित्र समेत पर्ने उल्लेख गर्दै पौडेलले उक्त जग्गा ३० वर्षका लागि लिजमा दिन लागिएको भन्ने समाचारप्रति समितिको ध्यानाकर्षण भएको बताए।

ऐतिहासिक महत्त्व बोकेका जग्गा तथा सम्पदालाई लिजमा दिने कार्य रोक्न र तिनको उचित संरक्षण तथा व्यवस्थापन गर्न नेपाल सरकार, प्रदेश सरकार र स्थानीय तहलाई अनुरोध गर्ने निर्णय बैठकले गरेको उनले जानकारी दिए।

बैठकले जिल्ला समन्वय समिति कास्कीको पाँचवर्षे कार्यकालमा भएका गतिविधि समेटेर स्मारिका प्रकाशन गर्ने निर्णयसमेत गरेको छ। उक्त जानकारी जिल्ला समन्वय अधिकारी नवराज बरालले दिए।

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23069, citypokhara.com

छठ पर्वको भोलिपल्ट सोमबार पनि सार्वजनिक बिदा

काठमाडौं । छठ पर्वको अवसरमा सरकारले सोमबार पनि सार्वजनिक बिदा दिने निर्णय गरेको छ।

गृह मन्त्रालयले सार्वजनिक बिदासम्बन्धी सूचना जारी गर्दै २०८३ साल कात्तिक ३० गते सोमबार सार्वजनिक बिदा हुने जनाएको हो।

छठ पर्वमा पहिलो दिन अस्ताउँदो सूर्यलाई अर्घ्य दिने र भोलिपल्ट उदाउँदो सूर्यलाई अर्घ्य दिएर व्रत समापन गर्ने परम्परा रहेकाले सोमबार पनि सार्वजनिक बिदा दिने निर्णय गरिएको मन्त्रालयले जनाएको छ।

मन्त्रालयका सहसचिव एवं प्रवक्ता आनन्द काफ्लेद्वारा जारी सूचनामार्फत सम्बन्धित सबैलाई यसबारे जानकारी गराइएको छ।

छठ पर्वको भोलिपल्ट सोमबार पनि सार्वजनिक बिदा

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23063, citypokhara.com

पूर्वप्रधानमन्त्री प्रचण्ड रुस प्रस्थान

काठमाडौं । पूर्वप्रधानमन्त्री एवं नेपाली कम्युनिष्ट पार्टीका संयोजक पुष्पकमल दाहाल प्रचण्ड रसिया प्रस्थान गरेका छन् ।

प्रचण्ड आज रुसको राजधानी मस्कोका लागि प्रस्थान गरेका छन् । उनको साथमा प्रमुख स्वकीय सचिव गोविन्दप्रसाद आचार्य पनि सहभागी भएको सचिवालयले जनाएको छ ।

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23060, citypokhara.com

पोखरामा जिप दुर्घटना हुँदा एक जनाको मृत्यु, १२ जना घाइते

काठमाडौं । कास्कीको पोखरा महानगरपालिका–२३ स्थित दुण्डेफाँटमा जिप दुर्घटना हुँदा एक जनाको मृत्यु भएको छ भने १२ जना घाइते भएका छन्।

घाँटीछिनाबाट पोखरातर्फ आउँदै गरेको ग ४ च १३४४ नम्बरको जिप गए राति करिब पौने १० बजे अनियन्त्रित भई दुर्घटनामा परेको हो।

प्रहरीका अनुसार दुर्घटनामा घाइते भएकाहरूलाई उद्धार गरी उपचारका लागि जीएमसी अस्पताल पुर्‍याइएको थियो।

कास्कीका प्रहरी निरीक्षक रामजी देवकोटाका अनुसार दुर्घटनामा परी घाइते भएका पर्वत घर भई हाल पोखरा महानगरपालिका–२४, पामे बस्ने २३ वर्षीय मिलन गुरुङको उपचारका क्रममा मृत्यु भएको हो। उनलाई आज बिहान करिब पौने ३ बजे चिकित्सकले मृत घोषणा गरेका थिए।

दुर्घटनामा घाइते हुनेमा घाँटीछिनाका १५ वर्षीय विवेक बिक, चैनपुरका १६ वर्षीय विवस पराजुली र पोखरा–२३ का १४ वर्षीय अमित सुनार रहेका छन्।

त्यस्तै, घाइते हुनेमा १८ वर्षीया अनिशा नेपाली, १२ वर्षीय उज्ज्वल सुनार, ११ वर्षीय निशान नेपाली, १४ वर्षीय सन्देश नेपाली, २० वर्षीया मुस्कान गुरुङ, १२ वर्षीय आसिस सुनार, १३ वर्षीय सन्जल सुनार, १९ वर्षीया निसा नेपाली र २० वर्षीय दिपिन खत्री रहेका छन्।

दुर्घटनाको कारणबारे थप अनुसन्धान भइरहेको छ।

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23056, citypokhara.com

ममता काफ्ले हत्या प्रकरण : पति नरेश भट्ट दोषी ठहर

अमेरिका । नेपाली मूलकी ममता काफ्ले भट्टको हत्या प्रकरणमा उनका पति नरेश भट्ट दोषी ठहर भएका छन्। अमेरिकाको भर्जिनिया राज्यस्थित प्रिन्स विलियम काउन्टी अदालतमा भएको सुनुवाइपछि जुरीले उनलाई प्रथम श्रेणीको हत्या, शव लुकाउने तथा नष्ट गर्ने र मृत शरीर विकृत बनाउने अभियोगमा दोषी ठहर गरेको हो।

करिब पाँच घण्टासम्म विचारविमर्श गरेपछि जुरीले मंगलबार साँझ फैसला सुनाएको थियो। फैसला सार्वजनिक भएसँगै नरेशलाई सजाय निर्धारण नभएसम्म धरौटीमा रिहा गर्न अदालतले अस्वीकार गरेको छ। उनको सजाय आगामी सन् २०२७ को मार्चमा निर्धारण हुने बताइएको छ।

मुद्दाको सुनुवाइका क्रममा अभियोजन पक्षले विभिन्न साक्षी र प्रमाण प्रस्तुत गरेको थियो। ममताकी निकट साथी तथा सहकर्मी सुनिता बस्नेत थापाले अदालतमा बयान दिँदै ममता आत्महत्या गर्ने स्वभावकी नभएको बताएकी थिइन्। उनका अनुसार ममताले कहिल्यै आत्महत्या गर्ने इच्छा व्यक्त गरेकी थिइनन्।

सुनिताले सन् २०२३ डिसेम्बरमा ममताको अनुहारमा चोटसमेत देखेको बयान दिएकी थिइन्। त्यस्तै, अभियोजन पक्षले विषविज्ञान विशेषज्ञ र नरेशका पूर्वरूममेटलाई समेत साक्षीका रूपमा प्रस्तुत गरेको थियो।
अदालतमा अभियोजन पक्षले करिब १०० जना साक्षी र झन्डै ५०० वटा प्रमाण पेस गरेको जनाएको छ। यता नरेशले भने ममताले आत्महत्या गरेको दाबी गर्दै आएका थिए।

सन् २०२४ मा ममता अचानक बेपत्ता भएपछि घटना सार्वजनिक भएको थियो। त्यसपछि सुरु भएको अनुसन्धानका क्रममा नरेशमाथि पत्नीको हत्या गरी शव लुकाएको आरोप लागेको थियो।

फैसलापछि ममताको परिवारले लामो समयदेखि भोग्दै आएको पीडा र न्यायको प्रतीक्षाबीच मुद्दाले महत्वपूर्ण मोड लिएको छ। अब सबैको ध्यान आगामी मार्चमा हुने सजाय निर्धारणतर्फ केन्द्रित भएको छ।

पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=23052, citypokhara.com