Breaking News
चितवनले दियो सुदूरपश्चिमलाई १३४ रनको विजयी लक्ष्य

काठमाडौँ- नेपाल प्रिमियर लिग (एनपीएल) को दोस्रो क्वालिफायरमा चितवन राइनोजले सुदूरपश्चिम रोयल्सलाई १३४ रनको लक्ष्य दिएको छ ।

कीर्तिपुरस्थित त्रिभुवन विश्वविद्यालय क्रिकेट मैदानमा टस जितेर पहिले ब्याटिङ गरेको चितवनले निर्धारित २० ओभरमा ९ विकेट गुमाएर १३३ रन बनाएको हो ।

चितवनका  लागि डाविड मलानले अविजित ७१ रनको योगदान गरे ।।

 

दशौँ राष्ट्रिय खेलकुद: दुई प्रदेशका कुन-कुन जिल्लामा हुँदैछ ?

काठमाडौं । दशौँ राष्ट्रिय खेलकुद प्रतियोगिता कर्णाली र लुम्बिनी प्रदेशका सात जिल्लामा आयोजना हुने भएको छ ।

राष्ट्रिय खेलकुद परिषद् (राखेप) ले बिहीबार पत्रकार सम्मेलन गर्दै प्रतियोगिता कर्णाली प्रदेशका पाँच र लुम्बिनी प्रदेशका दुई जिल्लामा सञ्चालन गरिने जानकारी दिएको हो । प्रतियोगिता आगामी मंसिर १६ गतेदेखि सुरु हुनेछ ।

राखेपका अनुसार प्रतियोगिताका खेल सुर्खेत, बाँकेको नेपालगञ्ज, बर्दिया, दैलेख, कालीकोट, सल्यान र रुकुम पश्चिममा आयोजना हुनेछन् ।

कुल ३२ खेल समावेश गरिएको प्रतियोगिताका २३ खेल सुर्खेतमा सञ्चालन हुनेछन् । नेपालगञ्ज, बर्दिया र सल्यानमा दुई–दुई खेल आयोजना गरिनेछ भने दैलेख, कालीकोट र रुकुम पश्चिममा एक–एक खेल हुनेछ ।

प्रतियोगितामा सात प्रदेश, तीन विभागीय टोली र गैरआवासीय नेपाली संघ (एनआरएनए) गरी ११ टोलीले प्रतिस्पर्धा गर्नेछन् ।

मुख्य प्रतियोगिता मंसिर १६ गतेदेखि सुरु हुने भए पनि १० खेल उद्घाटन समारोहअघि नै सञ्चालन गरिने राखेपले जनाएको छ ।

भरतपुर अस्पतालमा बिरामीको चाप बढ्यो « रिपोर्टर्स नेपाल

नारायणगढ (चितवन), ३ मङ्सिर । दसैँ–तिहार तथा छठ पर्वको लामो बिदापछि भरतपुर अस्पतालमा बिरामीको चाप बढेको छ । बिदापछि अस्पतालको बहिरङ्ग सेवा (ओपिडी) सञ्चालनमा आएसँगै उपचारका लागि आउने बिरामीको सङ्ख्या बढेको हो ।

अस्पतालका प्रवक्ता डा रामप्रसाद सापकोटाका अनुसार मङ्गलबार मात्रै ओपिडीमा तीन हजार ३०० बिरामीले सेवा लिएका छन् । लामो बिदाका कारण निजी अस्पताल तथा क्लिनिक पनि बन्द वा सीमित सञ्चालनमा रहेकाले सरकारी अस्पतालमा बिरामीको चाप बढेको उनले बताए । बुधबार पनि अस्पतालमा बिरामीको चाप अत्यधिक रहेको उनको भनाइ छ ।

उनका अनुसार गत वर्ष २०८२ को कात्तिक महिनामा आकस्मिक, स्वास्थ्य बीमा र सामान्य टिकटमार्फत गरी २९ हजार ४२२ बिरामीले सेवा लिएकामा यस वर्ष सोही अवधिमा ३९ हजार २०० जनाले सेवा लिएका छन् ।

गत वर्ष असोजमा २९ हजार २८१ बिरामीले सेवा लिएका थिए । यस्तै, गत वर्ष कात्तिकमा आकस्मिक सेवामा छ हजार २५९ बिरामी आएकामा यस वर्ष उक्त सङ्ख्या बढेर सात हजार ४९५ पुगेको छ । अस्पतालमा आउने बिरामीमध्ये करिब ६० देखि ७० प्रतिशत स्वास्थ्य बीमामार्फत सेवा लिने छन् । ओपिडीमा सबैभन्दा बढी चाप मेडिसिन र अर्थोपेडिक्स विभागमा रहेको प्रवक्ता सापकोटाले बताए ।

आन्तरिक मेडिसिन विभागमा दैनिक ३०० देखि ४०० सम्म बिरामी आउने गरेको र कहिलेकाहीँ यो सङ्ख्या ५०० देखि ६०० सम्म पुग्ने गरेको उनले जानकारी दिए ।

सरकारी अस्पतालमा निजी अस्पतालको तुलनामा उपचार खर्च कम हुनु, स्वास्थ्य बीमाको सुविधा उपलब्ध हुनु र अस्पतालले प्रदान गर्ने सेवाप्रति बिरामीको विश्वास बढ्नुले पनि बिरामीको आकर्षण बढेको उनको भनाइ छ ।

भैँसेमा सुमो दुर्घटना, तीन जनाको मृत्यु

हेटौँडा, ३ मङ्सिरः मकवानपुरको भैँसे नजिकै आज बिहान सुमो दुर्घटना हुँदा तीन जनाको मृत्यु भएको छ भने अन्य सात जना घाइते भएका छन् ।

रौतहटको चपुरबाट काठमाडौँतर्फ गइरहेको ना १ ज २१४३ नम्बरको सुमो भैँसे नजिकै सुन्दरीमाई मोडमा दुर्घटना हुँदा रौतहटको चन्द्रनिगाहपुर नगरपालिका–३ का ५० वर्षीय बमबहादुर वाइबा र सोही नगरपालिका–४ की २२ वर्षीया जेसिका तिमिल्सिनाको मृत्युु भएको जिल्ला प्रहरी कार्यालयका प्रमुख श्यामबहादुर खत्रीले राससलाई जानकारी दिनुभयो । अन्य एक मृतकको परिचय खुलेको छैन ।

दुर्घटनाग्रस्त सुमोमा चालकसहित १० जना सवार थिए । घाइते सात जनालाई हेटौँडा अस्पताल पु¥याइएको छ ।

‘सिन्दुरे जात्रा’को टिजरमा प्रेम र धोका » Celebrity Nepal

सेलिब्रेटी नेपाल । मंसिर १८ गते रिलिज हुने चलचित्र ‘सिन्दुरे जात्रा’को टिजर सार्वजनिक गरिएको छ । टिजरमा सिनेमा मुख्य तीन कलाकार विजय बराल, अञ्जना बराइली र विनोद न्यौपाने देखिएका छन् । टिजरमा प्रेम, खुसी, धोका र पीडा समेटिएको छ ।

मौलिक परम्परागत संस्कृतिबाट सुरु हुने टिजरमा सुरुमा विजय र अञ्जनाको प्रेम, विवाह र खुसी छ । त्यसपछि टिजरमा द्वन्द्व सिर्जना गर्न एन्टागोनिस्ट विनोद न्यौपानेको प्रवेश हुन्छ । उनको प्रवेशसँगै वियोगमा फसेका विजयको अवस्था र अञ्जनाले व्यहोरेको धोका र त्यसपछिको पीडा टिजरमा देखिन्छ ।

प्रेमिल कथा र घटनाक्रमबाट सुरु हुने टिजर धोकासँगै कलाकारको दुःखले सिर्जना गर्ने इमोसनमा गएर टुंगिन्छ । गाउँको सेटअपले धेरैलाई नोस्टाल्जिया सिर्जना गर्छ ।

‘सिन्दुरे जात्रा’लाई सरोज पौडेलले निर्देशन गरेका छन् । यो सिनेमामा नेपाली सिनेमा उद्योगकै बक्सअफिसको ब्लकबस्टर जोडी विजय बराल र अञ्जना बराइली छन् । उनीहरुको यो दोस्रो सहकार्य हो । यसअघि यो टिमले नेपाली चलचित्र इतिहासकै सर्वाधिक सफल मानिएको ‘पूर्णबहादुरको सारङ्गी’मा सँगै काम गरेको थियो ।

चलचित्रमा विजय र अञ्जनासँगै विनोद न्यौपाने, उषा खड्गी, रामप्रसाद खनाल, लोकेन्द्र लेखक, कमलमणि नेपाल, भोला राज सापकोटा, हिउँवाला गौतम, राकेश खड्का, युना खड्का, अनिता गिरी, रजनी गुरुङ, देशभक्त खनाल र विनोद परियारलगायत कलाकारको अभिनय देख्न सकिनेछ ।

सबिन अधिकारी र वसन्त न्यौपानेको लेखन रहेको चलचित्रमा निर्देशक पौडेल स्वयंको कथा छ ।

सारङ्गी फिल्म्सको प्रस्तुतिमा निर्माण भएको चलचित्रका निर्माता नेम महर्जन हुन् । सह–निर्माताका रूपमा राकेश खड्का र श्याम मगर छन् भने एसोसिएट निर्माता सुमन रञ्जित र लाइन निर्माता अनिश अधिकारी रहेका छन् ।

दिनेश खड्का कार्यकारी निर्माता रहेको चलचित्रका पदमबहादुर श्रेष्ठ (बाबु) डीओपी, सुरेन्द्र पौडेल सम्पादक र विशाल घिमिरेको क्रिएटिभ निर्देशक रहेका छन् । यस चलचित्रमा प्रशान्त सिवाकोटीको संगीत रहेको छ ।

नेपाल ग्लोबल फिल्म फेस्टिभल हुँदै, विश्वभरका १०० चलचित्रकर्मी काठमाडौंमा आउने

सेलिब्रेटी नेपाल । नेपाली चलचित्रलाई विश्व बजारसँग जोड्ने र नेपाललाई अन्तर्राष्ट्रिय चलचित्रको महत्वपूर्ण गन्तव्यका रूपमा स्थापित गर्ने उद्देश्यसहित आयोजना हुन लागेको नेपाल ग्लोबल फिल्म फेस्टिभल (NGFF) २०२७ को तयारी तीव्र पारिएको छ। आगामी सन् २०२७ फेब्रुअरी १९ देखि २२ (फागुन ७ देखि १० गते) सम्म काठमाडौंमा आयोजना हुने महोत्सवमा विश्वका विभिन्न देशबाट करिब १०० जना चलचित्रकर्मी, संचारकर्मी तथा चलचित्र उद्योगका विशिष्ट व्यक्तित्व सहभागी हुने आयोजकले जनाएको छ।

नेपाल फिल्म एण्ड मिडिया एकेडेमीको आयोजनामा हुन लागेको महोत्सवको पहिलो संस्करणमै विश्वभरबाट ५०० भन्दा बढी फिचर फिल्म, सर्ट फिल्म तथा डकुमेन्ट्री प्राप्त भएका छन्। पहिलो संस्करणमै यति ठूलो संख्यामा अन्तर्राष्ट्रिय चलचित्र प्राप्त हुनुले महोत्सवप्रति विश्व चलचित्र क्षेत्रको चासो र आकर्षण बढ्दै गएको आयोजकको विश्वास छ।

‘हिमालदेखि सागरसम्मका कथाहरूको उत्सव’ भन्ने मूल नारासहित आयोजना हुन लागेको महोत्सवमा प्राप्त चलचित्रमध्ये करिब १०० वटा उत्कृष्ट चलचित्र छनोट गरी चार दिनसम्म काठमाडौंमा प्रदर्शन गरिनेछ। चलचित्र छनोटका लागि निर्देशक सुवर्ण थापाको नेतृत्वमा गठित चलचित्र छनोट समितिले काम गर्नेछ। छनोट भएकामध्ये उत्कृष्ट चलचित्रहरूलाई निर्देशक अशोक शर्मा नेतृत्वका नेपाली तथा विदेशी जुरीहरूले नगद पुरस्कारसहित विभिन्न विधामा अवार्ड प्रदान गरिने आयोजकले जनाएको छ।

महोत्सवका निर्देशक गणेश पाण्डेले पहिलो संस्करणमै विश्वका विभिन्न देशबाट ५०० भन्दा बढी चलचित्र प्राप्त हुँदा आफूहरू अत्यन्त उत्साहित भएको बताए। उनले भने, “हाम्रो पहिलो संस्करणमै विश्वभरबाट यति ठूलो संख्यामा फिचर, सर्ट र डकुमेन्ट्री फिल्म प्राप्त हुनु निकै उत्साहजनक उपलब्धि हो। यसले नेपालमा आयोजना हुन लागेको अन्तर्राष्ट्रिय चलचित्र महोत्सवप्रति विश्व चलचित्रकर्मीको विश्वास र चासो देखाएको छ। हामी नेपालकै एउटा ठूलो महोत्सव बनाउने उद्देश्यका साथ अघि बढिरहेका छौँ।”

महोत्सवमा फिचर फिल्म, सर्ट फिल्म, डकुमेन्ट्री, माउन्टेन फिल्म, वातावरणसम्बन्धी फिल्म, मानवशास्त्रीय फिल्म, मानवअधिकारसम्बन्धी फिल्म, महिला विषयवस्तुमा आधारित फिल्म तथा आदिवासी जनजातिका कथा र संस्कृतिमा आधारित चलचित्रलाई समेटिनेछ। त्यसैगरी एनिमेसन, विद्यार्थी चलचित्र र कृत्रिम बौद्धिकता (AI) मा आधारित चलचित्रलाई समेत विशेष प्राथमिकता दिइनेछ।

महोत्सवमा करिब १०० जना अन्तर्राष्ट्रिय चलचित्रकर्मी तथा चलचित्र उद्योगका व्यक्तित्वको सहभागिता जुटाउने तयारी भइरहेको छ। हलिउड, बलिउड तथा चिनियाँ चलचित्र क्षेत्रका चर्चित चलचित्रकर्मी महोत्सवमा अतिथिको रूपमा सहभागी हुने आयोजकले जनाएको छ।

महोत्सव आयोजक समितिका सदस्य फूलमान बलका अनुसार चार दिनसम्म चलचित्र प्रदर्शनसँगै विशेष सम्मान, अन्तरक्रिया, चलचित्र कार्यशाला, प्यानल छलफल तथा अन्तर्राष्ट्रिय नेटवर्किङ कार्यक्रम सञ्चालन गरिनेछ।

मलेसिया श्रमिक ठगी प्रकरणमा पूर्वमन्त्री कुँवर र यादवसहित ६ जना पक्राउ

काठमाडौं — मलेसिया जाने नेपाली श्रमिकमाथि भएको ठगी तथा संगठित अपराधसम्बन्धी कसुरमा अनुसन्धानका लागि दुई पूर्वमन्त्रीसहित ६ जना पक्राउ परेका छन्।

पक्राउ पर्नेमा तत्कालीन श्रम, रोजगार तथा सामाजिक सुरक्षामन्त्री शेरबहादुर कुँवर र रामेश्वर राय यादव रहेका छन्। त्यस्तै, मन्त्रालयका तत्कालीन सचिव विनोद केसी, रोजगार व्यवस्थापन महाशाखाका तत्कालीन प्रमुख (सहसचिव) उमेश ढुङ्गाना र राजीव पोखरेल तथा तत्कालीन कानून अधिकृत (उपसचिव) निर्मला गुरुङ पक्राउ परेका छन्।

प्रधानमन्त्री तथा मन्त्रिपरिषद्को कार्यालयको पत्र तथा विकास रानाभाटसमेतको जाहेरीका आधारमा नेपाल सरकार वादी रहेको ठगी तथा संगठित अपराधसम्बन्धी कसुरमा उनीहरूलाई पक्राउ गरिएको हो।

प्रहरीका अनुसार मलेसिया सरकार र नेपाल सरकारबीच भएको समझदारीपत्र (एमओयू) विपरीत गैरकानूनी रूपमा ठगी गरी संकलन गरिएको रकम मलेसिया पठाउने निर्णय प्रक्रियामा उनीहरू संलग्न रहेको आरोप छ।

उक्त प्रकरणमा अमेरिकी डलर ८३ लाख ७० हजार ४३९ र बेलायती पाउन्ड ३७ लाख १७ हजार ९८० गरी कुल एक अर्ब ६९ करोड दुई लाख २४ हजार २६ रुपैयाँ ७६ पैसा बराबरको रकम गैरकानूनी रूपमा संकलन तथा विदेश पठाइएको प्रहरीको दाबी छ।

सम्झौताको दायरा र कानूनी प्रक्रिया मिचेर अधिकार क्षेत्रभन्दा बाहिर गई विदेशी मुद्रा अपचलन गराइएको तथा यसबाट मुलुकको विदेशी मुद्रा सञ्चितिमा नोक्सानी पुगेको आरोप पक्राउ परेका व्यक्तिमाथि लगाइएको छ।

श्रमिकमाथि संगठित रूपमा ठगी भइरहेको अवस्थामा सम्बन्धित पदाधिकारीहरूले कानूनी उपचारको प्रक्रिया अघि नबढाई गैरकानूनी रूपमा संकलित रकम मलेसिया पठाउने निर्णयमा भूमिका खेलेको आरोपसमेत छ।

काठमाडौं जिल्ला अदालत, बबरमहलबाट २०८३ मंसिर २ गते पक्राउ पुर्जी जारी गर्ने अनुमति लिएपछि उनीहरूलाई काठमाडौं, ललितपुर र सर्लाहीका विभिन्न स्थानबाट पक्राउ गरिएको प्रहरीले जनाएको छ।

पक्राउ परेका सबैमाथि ठगीसम्बन्धी कसुर तथा संगठित अपराध निवारण ऐन, २०७० अन्तर्गत अनुसन्धान भइरहेको छ।

ठगी तथा संगठित अपराध सम्बन्धी कसूरमा संलग्न व्यक्तिहरु पक्राउ (2083-08-02)

काठमान्डुलाई हराउँदै चितवन दोस्रो क्वालिफायरमा

काठमाडौं । काठमाडौं गोर्खाजलाई ६१ रनले हराउँदै चितवन राइनोज नेपाल प्रिमियर लिग (एनपीएल) को दोस्रो क्वालिफायरमा प्रवेश गरेको छ। बुधबार कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको एलिमिनेटर खेलमा जित निकाल्दै चितवनले पहिलोपटक क्वालिफायरमा स्थान बनाएको हो।

चितवनले प्रस्तुत गरेको २०५ रनको लक्ष्य पछ्याएको काठमाडौंले निर्धारित २० ओभरमा ९ विकेट गुमाएर १४३ रन मात्रै बनाउन सक्यो।

काठमाडौंको ब्याटिङ धराशायी बनाउन चितवनका रिजन ढकालले उत्कृष्ट बलिङ गरे। उनले चार ओभरमा १६ रन खर्चेर चार विकेट लिए। यससँगै जारी प्रतियोगितामा उनको विकेट संख्या १६ पुगेको छ। उनी सर्वाधिक विकेट लिने बलरको सूचीमा शीर्ष स्थानमा उक्लिएका छन्।

उसामा मिरले पनि कसिलो बलिङ गर्दै १५ रन दिएर तीन विकेट हात पारे। सहाहुद्दिन खान र कुशल मल्लले एक–एक विकेट लिए।

लक्ष्य पछ्याउने क्रममा काठमाडौंका विलियम वसिस्टोले सर्वाधिक ३७ रन बनाए। उनले २८ बलमा तीन चौका र दुई छक्का प्रहार गरे। सेहानले २४ तथा रसिद खानले १२ रन जोडे। अन्य ब्याटरले उल्लेख्य योगदान दिन सकेनन्।

यसअघि टस जितेर पहिले ब्याटिङ गरेको चितवनले चार विकेटको क्षतिमा २०४ रनको विशाल योगफल तयार पारेको थियो। यो जारी एनपीएलको तेस्रो ठूलो स्कोर हो।

चितवनको इनिङ्समा ओपनर कमिल मिश्राराले विस्फोटक ब्याटिङ गर्दै १२० रन बनाए। उनले ५३ बलमा चार चौका र आठ छक्का प्रहार गर्दै शतक पूरा गरेका थिए। योसँगै उनी एनपीएल इतिहासमा एकै इनिङ्समा सर्वाधिक रन बनाउने खेलाडी बनेका छन्। यसअघि कर्णाली याक्सका मार्क वाटले बनाएको ११४ रनको कीर्तिमान मिश्राराले तोडेका हुन्।

मिशारा र कप्तान रवि बोपाराबीच तेस्रो विकेटका लागि १५४ रनको महत्वपूर्ण साझेदारी भएको थियो। आफ्नो करियरको ५००औँ खेल खेलिरहेका बोपाराले ४२ बलमा तीन चौका र दुई छक्कासहित ५३ रन बनाए। उनी रसिद खानको बलमा बोल्ड भए।

चितवनका देव खनालले १७ रन बनाए भने डेविड मलान खाता नखोल्दै आउट भए। विवेक यादवले आठ रन जोडे। काठमाडौंका करण केसी र रसिद खानले समान दुई विकेट लिए।

अब चितवनले दोस्रो क्वालिफायरमा बिहीबार सुदूरपश्चिम रोयल्ससँग प्रतिस्पर्धा गर्नेछ। पहिलो क्वालिफायरमा लुम्बिनी लायन्ससँग चार विकेटले पराजित भएपछि सुदूरपश्चिमले दोस्रो क्वालिफायर खेल्न लागेको हो। फाइनल प्रवेशका लागि दुवै टोलीबीच प्रतिस्पर्धा हुनेछ।

बढी भाडा लिएको गुनासोपछि तोकिएको दर पालना गर्न आग्रह

धादिङ, २ मङ्सिर  : सार्वजनिक यातायातमा तोकिएभन्दा बढी भाडा लिएको गुनासो आएपछि धादिङको त्रिपुरासुन्दरी गाउँपालिकाले यातायात व्यवसायीलाई निर्धारित भाडादर पालना गर्न आग्रह गरेको छ ।

गाउँपालिकाले मङ्सिर १ गते जारी गरेको सूचनामा पालिकाभित्र सञ्चालन हुने बस, जिप, माइक्रो र हाइसले बढी भाडा लिएर यात्रुलाई दुःख दिएको गुनासो प्राप्त भएको उल्लेख छ । सोही आधारमा सबै यातायात व्यवसायीलाई प्रचलित भाडादरअनुसार मात्र रकम लिन भनिएको हो ।

सूचनामा यातायात व्यवस्था विभागले तोकेको वा समायोजन गरेको भाडादर तथा मापदण्ड पालना गर्न आग्रह गरिएको छ । सम्बन्धित यातायात समिति तथा कम्पनीहरूले सरोकारवालाको सहभागितामा निर्धारण गरेको दरभन्दा बढी भाडा नलिन र नदिन पनि गाउँपालिकाले अनुरोध गरेको छ ।

तोकिएभन्दा बढी भाडा मागे वा लिएमा प्रमाणसहित गाउँ कार्यपालिकाको कार्यालय तथा नजिकको प्रहरी कार्यालयमा खबर गर्न यात्रुलाई आग्रह गरिएको छ । बढी भाडा लिएको प्रमाणित भए कानुनबमोजिम कारबाही वा कारबाहीका लागि सिफारिस गरिने सूचनामा उल्लेख छ ।

गाउँपालिकाले उक्त सूचनाको बोधार्थ यातायात व्यवसायी राष्ट्रिय महासङ्घ, धादिङ र इलाका प्रहरी कार्यालय सल्यानटारलाई समेत पठाएको छ ।

महानिर्देशक भट्टराई « रिपोर्टर्स नेपाल

काठमाडौँ । औषधि व्यवस्था विभागका महानिर्देशक भरत भट्टराईले एन्टिबायोटिकको जथाभावी प्रयोग नियन्त्रण गर्दै प्रतिजैविक प्रतिरोध (एन्टिमाइक्रोबियल रेसिस्टेन्स) न्यूनीकरण गर्न सबै क्षेत्रबीच सहकार्य आवश्यक रहेको बताएका छन् ।

विश्व प्रतिजैविक प्रतिरोध सचेतना सप्ताह–२०२६ को अवसरमा बुधबार आयोजित प्रभातफेरी कार्यक्रममा बोल्दै भट्टराईले यस्ताे बताएका हुन् । उनले एन्टिबायोटिकको अनावश्यक, अत्यधिक तथा कम प्रयोगले जनस्वास्थ्यमा गम्भीर असर पारिरहेको बताए ।

एन्टिबायोटिकको प्रभावकारिता जोगाउन यसको प्रयोगलाई व्यवस्थित र नियमन गर्नुपर्नेमा उनले जाेड दिए । उनले भविष्यमा उपचारका लागि आवश्यक पर्ने ‘रिजर्भ एन्टिबायोटिक’ औषधिको जथाभावी प्रयोग रोक्नुपर्ने बताए ।

प्रतिजैविक प्रतिरोध मानव स्वास्थ्यमा मात्र सीमित नरहेको उल्लेख गर्दै भट्टराईले पशु स्वास्थ्य र वातावरणसँग समेत यसको प्रत्यक्ष सम्बन्ध रहेको बताए । यस समस्याको नियन्त्रणका लागि स्वास्थ्य मन्त्रालय, औषधि व्यवस्था विभाग, पशु स्वास्थ्य तथा वातावरण क्षेत्रलगायत सम्बन्धित निकायबीच समन्वय आवश्यक रहेको उनको भनाइ थियो ।

उनले प्रतिजैविक प्रतिरोधबारे सर्वसाधारणलाई सचेत गराउन जनचेतनामूलक कार्यक्रमलाई प्रभावकारी बनाउनुपर्नेमा समेत जोड दिए ।

‘एक स्वास्थ्य, एक प्रयास : प्रतिजैविक प्रतिरोध रोकौँ’ भन्ने नाराका साथ मनाउन लागिएको सप्ताहको उद्देश्य एन्टिबायोटिकको दुरुपयोग नियन्त्रण गर्दै प्रतिजैविक प्रतिरोधको बढ्दो चुनौतीलाई न्यूनीकरण गर्नु रहेको भट्टराईले बताए । औषधिको जिम्मेवार प्रयोग, जनचेतना र मानव, पशु तथा वातावरण स्वास्थ्यसँग सम्बन्धित निकायबीच सहकार्यबाट मात्रै यस समस्याको प्रभावकारी समाधान सम्भव हुने उनले उल्लेख गरे ।

बुधबार स्वास्थ्य तथा खाद्य स्वच्छता मन्त्रालयबाट सुरु भएको प्रभातफेरी औषधि व्यवस्था विभाग पुगेर समापन भएको थियो ।