असल खबर। दीपक वली निर्देशित नेपाली फिल्म फिल्म ‘कृष्ण–लीला’ को ‘ए मेरो हजुर..’ बोलको नयाँ गीत सार्वजनिक भएको छ । गीतमा रवि ओड र सुनिता कार्कीको स्वर, डा.डिआर उपाध्यायको शब्द र बाबुल गिरीको संगीत छ । गीत एक कार्यक्रमका बीच सार्वजनिक भएको हो ।
आरआर फिल्मस्को ब्यानरमा रोहित कट्टेलको प्रस्तुति र रत्न श्रेष्ठ कार्यकारी निर्माता रहेको फिल्मको गीतमा पुष्प खड्का र श्रद्धा क्षेत्रीको अभिनय देख्न सकिन्छ । गीत मनाङ जिल्लाको तिलिचो ताल र त्यसभन्दा माथिको करिब ५२ सय मिटर उचाइको रमणीय स्थलमा खिचिएको हो । कार्यक्रममा अभिनेता पुष्पले ‘कृष्ण–लीला’ मा आफूले अत्यन्तै मिहिनेत गरेको स्मरण गर्दै ‘ए मेरो हजुर..’ पनि दर्शकले अधिक मन पराउने विश्वास ब्यक्त गरे ।
‘फिल्म तथा गीतका लागि मिहिनेत गर्न कत्ति पनि कञ्जुस्याइँ गरेका छैनौ,’ उनले भने, ‘हाइ अल्टिच्युडमा समेत हामीले ज्यानको पर्वाह नगरि काम गर्यौ । अहिले पर्दामा हेर्दा त्यतिबेला गरेको दुःख सबै बिर्सिएको छु ।’ उनले चलचित्रमा आफू कृष्णको शीर्ष भूमिकामा रहेको खुलाए ।
त्यसैगरी, यो नै आफ्नो प्रदर्शन हुन लागेको डेब्यु चलचित्र भएकाले आफू निकै उत्साहित रहेको अभिनेत्री श्रद्धाले बताइन् । उनले ‘कृष्ण–लीला’ को अघिल्ला गीतले दर्शकको मन जितिसकेकाले यो गीतले पनि माया पाउने बिश्वास ब्यक्त गरिन् ।
