धादिङमा परमेश्वरको मण्डलीद्वारा सरसफाइ तथा वातावरणीय सचेतना कार्यक्रम

धादिङ,१२ जेठ ।
स्वच्छ समाज निर्माण र वातावरणीय सचेतनाको सन्देश फैलाउने उद्देश्यले परमेश्वरको मण्डली विश्व सुसमाचार समाजले आइतवार धादिङ बेसी बजार क्षेत्रमा विशेष सरसफाइ कार्यक्रम सम्पन्न गरेको छ। जनघनत्व उच्च रहेको बजार क्षेत्रमा निरन्तर फोहोर थुप्रिदै गएकोले यस क्षेत्रको सरसफाइ अत्यावश्यक भएको जनाउँदै आयोजक मण्डलीले यो अभियान सञ्चालन गरेको हो ।

कार्यक्रममा मण्डलीका विश्वासीहरू, उनीहरूका परिवार र छिमेकीहरू सहित करिब ५० जना स्वयंसेवकहरूको सक्रिय सहभागिता रहेको थियो। उनीहरूले करिब १ किलोमिटर क्षेत्रफल सफा गर्दै बजार वरपर फैलिएका फोहोरहरू सङ्कलन गरेका छन् ।

कार्यक्रममा निलकण्ठ नगरपालिकाले फोहोर व्यवस्थापनको कार्यमा सहयोग पु¥याउँदै स्वयंसेवकहरूलाई हौसला प्रदान गरेको थियो । स्वयंसेवकहरूले चुरोटका ठुटा, प्लास्टिकका कप, चाउचाउ तथा बिस्कुटका खोल, कागज, खानेकुराका डब्बा जस्ता विभिन्न किसिमका फोहोर संकलन गरी एक ट्र्याक्टर भरिएको थियो ।

परमेश्वरको मण्डलीका एक जना प्रतिनिधिले भन्नुभयो, “परमेश्वरले हामीलाई दिएको पृथ्वीको संरक्षण गर्नु हामी सबैको कर्तव्य हो। वातावरण सफा राख्नु केवल स्वास्थ्यका लागि नभई सुसंस्कृत समाज निर्माणतर्फको एक महत्त्वपूर्ण कदम पनि हो। यस अभियानमार्फत हामीले समाजमा वातावरणप्रतिको दृष्टिकोण परिवर्तन गर्न सक्ने विश्वास लिएका छौं।”

कार्यक्रममा नेपाल रेडक्रस सोसाइटी जिल्ला शाखा, धादिङका सभापति दुर्लभ तामाङले भन्नुभयो, “हामी रेडक्रसमार्फत र तपाईंहरू मण्डलीमार्फत समाज सेवा गरिरहेका छौं। हाम्रो लक्ष्य एउटै हो— मानवता र सेवा। सम्पूर्ण प्राणीको सेवामा रमाउने संस्कृति नै हाम्रो मूल धर्म हो।”

परमेश्वरको मण्डलीले नेपालभरि मात्रै होइन, विश्वका १७५ भन्दा बढी देशका ७,८०० शाखाहरूमा नियमित रूपमा सरसफाइ, रक्तदान, आपतकालीन राहतजस्ता ३०,००० भन्दा बढी सामाजिक सेवा गतिविधिहरू सञ्चालन गर्दै आएको छ।

नेपालमै हालसम्म ५४,१५३ जनाले ९४१ वटा सामाजिक गतिविधिमा सक्रिय सहभागिता जनाइसकेका छन्। हेटौँडा, काठमाडौं, ललितपुर, पोखरा, भरतपुरजस्ता थुप्रै शहरी क्षेत्रमा निरन्तर सरसफाइ कार्यक्रम सञ्चालन गरिएको छ। साथै, वृद्धाश्रम भ्रमण, नर्सिङ होममा सामग्री अनुदान, भूकम्प प्रभावित क्षेत्रमा मर्मतकार्य सहयोगजस्ता कार्यहरू मण्डलीमार्फत निरन्तर भइ रहेका छन्।

गत वर्ष मात्र मण्डलीले “निस्तारः चाडको प्रेम, जीवन बचाउने रक्तदान अभियान” अन्तर्गत २१ पटक रक्तदान कार्यक्रम आयोजना गरिसकेको थियो। मण्डलीले गरेको सामाजिक कार्यको कदरस्वरूप मण्डलीलाई संयुक्त राज्य अमेरिका, गणतन्त्र कोरिया, बेलायत, ब्राजिल र पेरुजस्ता देशहरूका राष्ट्रप्रमुखहरूमार्फत राष्ट्रपति स्वयंसेवा अवार्ड, महारानी स्वयंसेवा अवार्ड, राष्ट्रिय सभा पदक लगायत ५,००० भन्दा बढी अन्तर्राष्ट्रिय पुरस्कारहरू प्राप्त भएका छन्।

नेपालमा पनि बागमती प्रदेशको सामाजिक विकास मन्त्रालय, नीलकण्ठ नगरपालिका, र नेपाल रेडक्रस सोसाइटीजस्ता संस्थाहरूबाट प्रशंसा पत्र तथा सम्मानपत्रहरू प्रदान गरिएका छन्।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।