मनकारी डाक्टर खत्रीः गरिब विरामीलाई निजी अस्पतालमा निःशुल्क उपचार, खाना खाने पैसा पनि दिन्छन् (भिडिओसहित)

काठमाडौं, ८ भदौ । वरिष्ठ बालरोग विशेषज्ञ डा. किशोर खत्रीले आम नागरिकले निःशुल्क स्वास्थ्य उपचार पाउनुपर्ने बताएका छन् । प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले अहिले नेपालमा सरकारी अस्पताल चाहिँ कमजोर र निजी हस्पतालहरु फस्टाइरहेको बताए । उनले सरकारी अस्पताललाई राज्यले बलियो बनाउनुपर्ने आवश्यकता उनले औंल्याए । उनले निःशुल्क उपचारलाई बेसिक राइटसको रुपमा ब्याख्या गरे ।

उनले भने, ‘स्वाथ्यमा परिवर्तन ल्याउन सकिन्छ । निःशुल्क उपचार पाउनै पर्छ नि । त्यो त बेसिक राइटको कुरा हो । प्राइभेट हस्पिटलहरु अहिले जनि पनि फस्टाएका छन्, प्राइभेट हस्पिटलभन्दा सरकारी हस्पिटल हामीलाई चाहिन्छ । भोलि विरामी भइयो भने पहिला जाने सरकारी अस्पतालमा नै हो । सरकारी अस्पतालहरुलाई हामीले बलियो बनाउन जरुरी छ । प्राइभेट हस्पिटलहरु त शोखको लागि मानिसहरुले प्रयोग गर्न सक्छन् । नेपालमा त के भइदिएको छ ? सरकारी अस्पताल अलि कमजोर, प्राइभेट अस्पताल बलियो भएको छ । त्यही भएर त्यको भण्डाफोर गर्नुपर्छ भन्ने म छु ।’

डा.खत्रीका अनुसार उनी आफैं निजी अस्पतालका सञ्चालक पनि हुन् । नेपाल सरकार र नेपाली जनताले साँच्चिकै सुशासित भएर चाहन्छन् भने आफू उक्त हस्पिटल राज्यलाई दिन पनि तयार रहेको उनले बताए । आफ्नो तुलसी अस्पतालमा गरिब विरामीलाई निःशुल्क उपचार र खाना खान नपाएकाहरुलाई खाना खाने पैसा पनि दिने गरेको उनले बताए ।

‘मेरो पनि प्राइभेट हस्पिटल छ । सरकारले चाहन्छ, नेपाली जनताले साँच्चिकै सुशासित भएर चाहन्छन् भने त्यो हस्पिटल पनि नेपाल सरकारलाई दिन तयार छु । किनभने मेरो हस्पिटलमा, हाम्रो जुन तुलसी हस्टिल छ, त्यहाँ जोसुकै गरिब विरामी आउँछ भने निःशुल्क उपचार दिने गरेको छु, खाना खाने पैसा दिने गरेको छु । जो जनताले खान पाउँदैन, त्यसले खाना खान पाउनुपर्यो । उपचार पनि गर्न पाउनुपर्यो । शिक्षा र स्वाथ्य त बेसिक निड्सका कुराहरु हुन् । पाउनैपर्छ, निःशुल्क रुपमा नै हुनुपर्छ,’– उनले भने ।