ज्वालामुखीमा नमुना सफा र स्वच्छ गाउँ बनाउने अभियान तीव्र

धादिङबेशी, २ पुस । ‘मिशन २०८२ : सफा र स्वच्छ क्षेत्र ज्वालामुखी’ भन्ने मूल नारासहित ज्वालामुखी गाउँपालिकामा नमुना सफा तथा स्वच्छ गाउँ निर्माण अभियान तीव्र रूपमा अघि बढाइएको छ। पूर्ण सरसफाइ मार्गदर्शन–२०७३ बमोजिम गाउँपालिका भित्रका ६ हजार ७९ घरधुरीलाई लक्षित गर्दै खानेपानी, सरसफाइ र स्वच्छतासम्बन्धी गतिविधिहरू समुदायस्तरमै सघन बनाइएका छन्।

यस अभियान अन्तर्गत यसअघि वडा नं. ६, ७, ३ र ५ का ४ हजार ५१९ घरधुरीले तोकिएका सूचकहरू पूरा गरेको सुनिश्चिततासहित ती वडाहरूलाई सफा तथा स्वच्छ घोषणा गरिसकिएको छ। बाँकी रहेका वडा नं. १, २ र ४ मा भने खानेपानी, सरसफाइ तथा स्वच्छतासम्बन्धी पूर्वाधार, व्यवहार परिवर्तन र सचेतनामूलक कार्यक्रमलाई तीव्रता दिइएको छ।

यसै क्रममा वडा नं. २ को खानेपानी, सरसफाइ तथा स्वच्छता समन्वय समितिको आयोजनामा घोषणा पूर्व छलफल कार्यक्रम सम्पन्न भएको छ। ज्वालामुखी वास व्यवस्थापन बोर्ड, वाइन टु वाटर र सिटिएस नेपालको सहजीकरणमा बुधबार वडा कार्यालय सातदोवाटोमा आयोजित कार्यक्रममा वडा नं. २ का सबै सरोकारवालाहरूको सहभागिता रहेको थियो।

कार्यक्रममा वडा नं. २ लाई आगामी माघ २३ गते औपचारिक रूपमा सफा तथा स्वच्छ वडा घोषणा गर्ने लक्ष्यसहित अनुगमन, समुदाय सचेतना तथा सामाजिक व्यवहार परिवर्तन सञ्चारका विभिन्न क्रियाकलाप सञ्चालन गर्ने कार्ययोजना तयार गरिएको छ।

गाउँपालिकालाई समग्र रूपमा सफा र स्वच्छ पालिका बनाउने उद्देश्यसहित सञ्चालन गरिएको यस अभियानले ज्वालामुखी गाउँपालिकालाई नमुना स्वस्थ पालिका बनाउने दिशामा महत्वपूर्ण योगदान पुग्ने अपेक्षा गरिएको छ। ‘कोखदेखि शोकसम्म ज्वालामुखी सरकार’ भन्ने सामाजिक विकासको नारासहित गाउँपालिकाले स्वास्थ्य, सरसफाइ र सामाजिक विकासका विविध कार्यक्रमहरूलाई निरन्तरता दिँदै आएको छ।

अन्तरक्रिया तथा छलफल कार्यक्रम वडा नं. २ का वडा अध्यक्ष राजु लोप्पाको अध्यक्षतामा तथा ज्वालामुखी गाउँपालिकाका उपाध्यक्ष धर्म बहादुर अर्यालको प्रमुख आतिथ्यतामा सम्पन्न भएको हो।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।