धादिङ–२ मा नेकपाको चुनावी तयारी तीव्र : सातै पालिकामा जिम्मेवारी बाँडफाँट

धादिङबेशी । नेपाली कम्युनिष्ट पार्टी (नेकपा) धादिङ क्षेत्र नम्बर २ ले आगामी निर्वाचनलाई लक्षित गर्दै संगठन विस्तार र युवा परिचालनलाई आक्रामक ढंगले अघि बढाउने संकेत दिएको छ। निर्वाचन परिचालन समितिको विस्तारित बैठकले पालिकास्तरदेखि बुथ तहसम्म स्पष्ट कार्यविभाजनसहित ठोस निर्णयहरू गरेको हो।

बैठकले क्षेत्र नम्बर २ अन्तर्गतका सातै स्थानीय तहमा नेतृत्व तोक्दै चुनावी संरचना मजबुत बनाउने खाका सार्वजनिक गरेको छ। नीलकण्ठ नगरपालिकामा दिपक विक, शम्भु श्रेष्ठ र शिवनिधि खनाललाई जिम्मेवारी दिइएको छ भने ज्वालामुखीमा भानु दुवाडी र सुब्बा रम्तेल अघि सारिएका छन्। नेत्रावती डबजोङमा शंकर अधिकारी, उर्मिला तामाङ, प्रेम तामाङ र डम्बर अधिकारीको टोली सक्रिय रहनेछ।

त्यस्तै, त्रिपुरासुन्दरीमा कुमार र आशिष, गंगाजमुनामा नारायण कार्की, नमराज अधिकारी र रामेश्वर सिंखडा, खनियाबासमा प्रदिप तामाङ र सेक्केमान तामाङ तथा रुबी भ्यालीमा जिवान तामाङ र रामसिंह तामाङलाई जिम्मेवारी तोकिएको छ।

चुनावी संगठनलाई तल्लो तहसम्म लैजाने उद्देश्यसहित ६१ वटै वडामा वडा संयोजक तोक्ने र बुथ कमिटी गठन गर्ने निर्णय पनि बैठकले गरेको छ। साथै, जिल्ला स्तरीय युवा भेला र सातै स्थानीय तहमा पालिकास्तरीय युवा भेला सञ्चालन गर्ने कार्यक्रम तय गरिएको छ।

प्रचार–प्रसार समितिको संयोजकमा दिपक विश्वकर्मा चयन भएका छन् भने सह–संयोजकको जिम्मेवारी नवराज छत्कुलीलाई दिइएको छ। सूचना तथा प्रविधि (आईएनटी) तर्फ अमृत तामाङ र उद्धव रिजाललाई जिम्मेवारी तोकिँदा डिजिटल अभियानलाई प्राथमिकता दिइएको संकेत देखिन्छ।

निर्वाचन परिचालन समितिका संयोजक जगत सिंखडाको अध्यक्षतामा सम्पन्न बैठकमा नेकपाका वरिष्ठ नेता तथा बागमती प्रदेश सरकारका पूर्व मुख्यमन्त्री राजेन्द्र पाण्डे प्रमुख अतिथिका रूपमा उपस्थित थिए। बैठकमा गंगालाल तुलाधर, पुष्पविक्रम मल्ल, शालिकराम जम्कट्टेल, क्षेत्र नम्बर २ का उम्मेदवार रामबहादुर भण्डारीसहित दिपा सिंखडा, मराज भण्डारी, गुरु बुर्लाकोटी लगायत केन्द्रीय नेताहरूको उल्लेखनीय उपस्थिति रहेको थियो।

यो पनि पढ्नुहोस् : ट्रम्पले भने- दुवैको जित, सीले भने- दुवैको हित

बैठकले संगठन सुदृढीकरण, युवा परिचालन र पार्टीका एजेन्डा मतदातामाझ प्रभावकारी ढंगले पुर्‍याउने अभियानलाई अझ तीव्र बनाउने निर्णय गरेको जनाएको छ। चुनाव नजिकिँदै जाँदा धादिङ–२ मा नेकपाको गतिविधि थप सक्रिय बन्दै गएको स्पष्ट देखिन्छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।