इन्सेकद्वारा धादिङमा निर्वाचन पूर्व अनुगमन : सरोकारवालासँग छलफल

धादिङ, १३ फागुन ।
प्रतिनिधि सभा निर्वाचनको पूर्व तयारी, सुरक्षा अवस्था र व्यवस्थापन लगायतका निर्वाचन स्वच्छ, निष्पक्ष र भयरहित बनाउन भएका पहलको बारेमा इन्सेकद्वारा धादिङमा निर्वाचन पूर्व अनुगमन गरिएको छ ।

इन्सेक बागमती प्रदेश संयोजक शिब प्रसाद खकुरेलको नेतृत्वमा भएको पूर्व अनुगमनमा सुरक्षा निकाय प्रमुखहरु, प्रमसख निर्वाचन अधिकृत, आचारसंहिता अनुगमन अधिकृत तथा नागरिक समाज र अन्य पर्यवेक्षकसंग छलफल गरिएको छ ।

स्वच्छ , भयरहित र निष्पक्ष निर्वाचनका लागि आवश्यक तयारी पूरा भएको र मतपत्र प्राप्त भएको, मतदानमा खटिने कर्मचारी तालिम र नियुक्ति भईरहेको, दल र उम्मेदवारसंग छलफल र समन्वय भएको मुख्य निर्वाचन अधिकृत रामप्रसाद शर्माले बताउनुभयो ।

पूर्व अनुगमनको क्रममा प्रमुख जिल्ला अधिकारी विजयराज सुवेदीले सुरक्षा व्यवस्था चुस्त दुरुस्त बनाइएको, आचारसंहिता पालना भएको, निर्वाचन प्रचारप्रसारमा सरलता आएको, दलहरु आफैले सर्वदलिय बैठक गरि आपसि सहमतिमा स्वच्छ र मैत्रीपूर्ण निर्वाचनको वातावरण बनाएको बताउनुभयो ।मतपेटिका, मतपत्र ढुवानी, संकलन, सुरक्षा र सहि सूचनाका लागि सूचना प्रणाली व्यवस्थापन गरिएको प्रमुख जिल्ला अधिकारी सुवेदीको भनाई छ ।

जिल्ला प्रहरी प्रमुख एसपि सुमित खड्काले जिल्लाको १ सय ८ मतदान स्थल अति सम्बेदनशील, ६ मतदान स्थल सम्बेदनशी भएको सुरक्षा प्रबन्ध मिलाइएको बताउँदै कर्मचारी, मतदानस्थल र मतपेटिका सुरक्षा, उम्मेदवार सुरक्षा र मतदाताको सुरक्षा प्रबन्ध मिलाइ सुरक्षा योजना अनुसार काम गरिएको बताउनुभयो ।

जिल्ला निर्वाचन अधिकारी शिव गुरुङले मतदान अधिकृत र सहायक मतदान अधिकृत तालिम भइरहेको, आयोगले दिने १३ किसिमका सामाग्री र जिलामा खरिद भएका ३७ किसिमका सामाग्री खरिद गरि मतदान केन्द्रमा पठाउन तयार पारिएको, मतपेटिका समेत तयारी रहेको गुरुङको भनाई छ।

निर्वाचन आचारसंहिता अनुगमन अधिकृत सहायक प्रमुख जिल्ला अधिकारी मोहन न्यौपानेले आचारसंहिता उल्लंघनका घटना छिटपुटमात्र भएकोले नियमन गरिएको, जिल्लामा मैत्रीपूर्ण निर्वाचनको वातावरण बनेको बताउनुभयो ।

धादिङमा निर्वाचन पर्यवेक्षण गर्ने जियोकका अध्यक्ष अधिवक्ता विश्वराज अधिकारी, नियोकका सचिव रमेश अधिकारी र मानव अधिकार संगठनका अध्यक्ष अधिवक्ता कृष्णराज अधिकारी, सचिव इश्वर थापामगर, लगायतसंग छलफल गरि धादिङमा पर्यवेक्षण गर्ने निकायहरुले पर्यवेक्षक तालिमहरु गरेको र आचारसंहिता र स्वच्छ निर्वाचनका लागि सहयोगि बन्दै स्वच्छ स्वतन्त्र र भयरहित निर्वाचन भयो भएन पर्वेक्षण गर्न खटाइएको छलफलमा बताउनुभयो ।

यसैगरि इन्सेकका बागमती प्रदेश संयोजक शिव प्रसाद खकुरेलले नेपालमा प्रजातान्त्रको पुर्नस्थापना पछि भएका सबै निर्वाचनहरुमा अनुगमन तथा पर्यवेक्षण गर्दै आएको बताउदै यस पटक पनि मुलुकभर निर्वाचन पर्यवेक्षणका लागि २ सय ३२ जना पर्यवेक्षक खटाइएको जानकारी दिनुभयो।

अनौपचारिक क्षेत्र सेवा केन्द्र (इन्सेक) को निर्वाचन पुर्व पर्यवेक्षणका क्रममा मानवअधिकार संगठनका पर्यवेक्षकहरुलाई पर्वेक्षण, महत्व, नितिगत रुपमा पार्ने प्रभाव, पर्यवेक्षक भुमिका, आचरणबारे स्पष्ट पार्नुभएको थियो ।

धादिङमा इन्सेकको २ जना, मानवअधिकार संगठनको ८ जना, नियोकको १२ जना, जियोकको ७ जनाले पर्यवेक्षण गर्ने जानकारी छलफलमा गराइएको थियो ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।