धादिङ अस्पतालमा ईन्डोस्कोपी सेवा सुरु

धादिङ, ०६ जेठ ।
धादिङ अस्पतालमा ईन्डोस्कोपी सेवा सुरु भएको छ। काठमाडौँ मेडिकल कलेजमा कार्यरत विशेषज्ञ चिकित्सक डा. रोमी दाहालको उपस्थितिमा सेवा औपचारिक रूपमा सुरु गरिएको धादिङ अस्प्तालका निर्देशक डा. गगन अधिकारीले बताउनुभयो ।

अधिकारीका अनुसार सेवा प्रारम्भको पहिलो दिन ४ जनाको ईन्डोस्कोपी परीक्षण गरिएको छ। अस्पतालले आवश्यकताअनुसार दैनिक रूपमा सेवा सञ्चालन गर्ने योजना बनाएको जनाएको छ।

पेटमा ग्यास्ट्रिक, अल्सर, घाउ वा सुजनजस्ता समस्या पत्ता लगाउन ईन्डोस्कोपी एक प्रभावकारी विधि मानिन्छ । विशेषज्ञ चिकित्सक डा. दाहालका अनुसार ईन्डोस्कोपीको माध्यमबाट समयमा नै पेटसम्बन्धी समस्याहरू पत्ता लगाउन सकिने भएकाले उपचारमा सहजता हुन्छ । साथै यस्ता समस्याबाट जोगिन खानपानमा विशेष ध्यान दिनुपर्ने पनि उहाँले सुझाव दिनुभएको छ ।

धादिङमै यस्तो सेवा सुरु भएपछि सेवाग्राहीहरू उत्साहित भएका छन्। बाहिरका सहरहरू धाउनुपर्ने बाध्यता हटेका कारण समय र पैसाको दुबै बचत हुने सेवाग्राहीहरूको भनाइ छ । “आफ्नै जिल्लामै यस्तो सुविधा उपलब्ध हुनु खुशीको कुरा हो,“ कुमार श्रेष्ठले भन्नुभयो ।

धादिङ अस्पतालले यो सेवा विस्तारसँगै जिल्लावासीलाई गुणस्तरीय स्वास्थ्य सेवा प्रदान गर्ने दिशामा थप योगदान पु¥याउने अपेक्षा गरिएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।