परिवर्तनको रक्षा र विकासको निरन्तरताका लागि नेकपालाई भोट : राम बहादुर भण्डारी

धादिङबेशी । नेपाली कम्युनिष्ट पार्टी धादिङ क्षेत्र नम्बर २ का प्रतिनिधिसभा सदस्य उम्मेदवार रामबहादुर भण्डारीले परिवर्तनको रक्षा र विकासको निरन्तरताका लागि आफ्नो पार्टीलाई मतदान गर्न आह्वान गर्नुभएको छ ।

मंगलबार रुवी भ्यालीमा आयोजित चुनावी सभालाई सम्बोधन गर्दै उहाँले जनयुद्ध र जनआन्दोलनको बलमा मुलुकमा गणतन्त्र, संघीयता, धर्मनिरपेक्षता तथा समावेशी व्यवस्था स्थापित भएको उल्लेख गर्नुभयो । ती उपलब्धि नेपाली कम्युनिष्ट आन्दोलनकै नेतृत्वमा सम्भव भएको दाबी गर्दै उहाँले प्राप्त अधिकारको रक्षा गर्न फेरि कम्युनिष्ट नेतृत्व आवश्यक रहेको बताउनुभयो ।

उहाँले विगतको गठबन्धन सरकारले भ्रष्टाचार र कुशासनमार्फत परिवर्तनका उपलब्धिमाथि प्रहार गरेको आरोप लगाउँदै अहिलेको निर्वाचन परिवर्तनको रक्षा गर्ने अवसर भएको धारणा राख्नुभयो । असफल र प्रतिगामी शक्तिलाई नभई अग्रगमनकारी शक्तिलाई मत दिन आग्रह गर्नुभयो ।

भण्डारीले रुवी भ्याली तथा धादिङ क्षेत्र नम्बर २ मा सडक स्तरोन्नति, धादिङबेसी–त्रिशूली सडक कालोपत्रे, लापा मार्ग सुधार, पुल निर्माण, पर्यटन प्रवद्र्धनलगायतका योजना अघि बढाउने प्रतिबद्धता व्यक्त गर्नुभयो । साथै स्थानीय शिक्षा, स्वास्थ्य, खानेपानी, विद्युत् र सञ्चार क्षेत्रमा थप विकास गर्ने प्रतिवद्धता जनाउनुभयो ।

जनयुद्धकालदेखि नै आफू लापामा सक्रिय रहेको उल्लेख गर्दै उहाँले राज्यद्वारा गोली प्रहार, जेल जीवन तथा पारिवारिक क्षतिसमेत व्यहोरेको स्मरण गर्नुभयो । जनताको हकअधिकारका लागि निरन्तर संघर्ष गर्दै आएको बताउँदै अब सदनमा पुगेर जनताको आवाज बुलन्द गर्ने प्रतिबद्धता व्यक्त गर्नुभयो ।

उहाँले समानुपातिकतर्फ इन्दिरा ढुंगाना र प्रत्यक्षतर्फ आफूलाई मतदान गरी पार्टीलाई विजयी बनाउन मतदातासँग आग्रह गर्नु भएको छ ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।