नीलकण्ठमा आमा समूहका लागि नेतृत्व विकास तालिम

धादिङबेशी । नीलकण्ठ नगरपालिकाले आमा समूहका अध्यक्ष तथा प्रतिनिधिहरूका लागि दुईदिने नेतृत्व विकास तालिम बिहीबारदेखि सुरु गरेको छ। महिला सशक्तीकरण तथा क्षमता अभिवृद्धि गर्ने उद्देश्यले सञ्चालन गरिएको तालिममा महिला अधिकार, उद्यमशीलता, नेतृत्व विकास, वित्तीय साक्षरता तथा सामाजिक सञ्जालको प्रयोग सम्बन्धी प्रशिक्षण प्रदान गरिँदैछ।

नगरपालिकाले वडास्तरमा क्रियाशील आमा समूहहरूको क्षमता अभिवृद्धि गर्दै उनीहरूलाई स्थानीय तहका योजना तथा कार्यक्रम निर्माणमा सक्रिय बनाउने लक्ष्यका साथ तालिम आयोजना गरेको हो। तालिम उद्घाटनका क्रममा सहभागीहरूको परिचय तथा अपेक्षा संकलन गरिएको थियो। पहिलो दिन गायत्री खतिवडा र दीपक कोइराला ले प्रशिक्षण दिएका थिए भने दोस्रो दिन लोकनाथ उपाध्याय, उर्मिला कार्की, रामकुमार थापा र मनिष दुवाडी ले सहजीकरण गर्ने तालिका रहेको छ।

कार्यक्रमको उद्घाटन समारोहलाई सम्बोधन गर्दै उपप्रमुख दीपक बिश्वकर्मा ले महिलाहरूलाई वडास्तरमै संगठित भई आफ्ना आवश्यकता पहिचान गर्न र बजेट तथा कार्यक्रमका लागि सक्रिय हुन आग्रह गर्नुभयो। प्रमुख प्रशासकीय अधिकृत हरिदत्त कँडेल ले विकासका लागि संगठनको भूमिका महत्वपूर्ण हुने उल्लेख गर्दै महिलाहरूका सुझावका आधारमा आगामी कार्यक्रम तय गरिने बताउनुभयो। कार्यपालिका सदस्य राम्री नेपाली ले आमा समूह दर्ता प्रक्रियालाई सहज बनाइने जानकारी दिँदै महिलाहरूलाई वडामा गएर आफ्ना माग स्पष्ट रूपमा राख्न आग्रह गर्नुभयो। सहभागीहरूले स्वास्थ्य, सीपमूलक तालिम तथा आयआर्जनसँग सम्बन्धित कार्यक्रमको माग राखेका छन्। नगरपालिका भने यस्ता आवश्यकताका आधारमा आगामी कार्यक्रम सञ्चालन गर्ने तयारीमा रहेको जनाएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।

यो पनि पढ्नुहोस् : पोखरामा ‘राष्ट्रिय तथा अन्तर्राष्ट्रिय प्रतिष्ठित ट्यालेन्ट शो’ हुने