बाटो बिराएका जनप्रतिनिधिहरुलाई कारबाही गर्न माग गर्दै निर्वाचन आयोग पुग्यो माओवादी
एमालेमा प्रवेश गरेका माओवादी केन्द्रका केहि नेतालाई पदमुक्त नगरिएको भन्दै नेकपा माओवादी केन्द्रले निर्वाचन आयोगको ध्यानाकर्षण गराएको छ ।
रामबहादुर थापा, टोपबहादुर रायमाझीसहित १८ जना जनप्रतिनिधि एमाले प्रवेश गरेपछि माओवादी केन्द्रले उनीहरुलाई पार्टीबाट निष्कासन गरेको थियो । तर आयोगले कारबाही गरेको भनी सूचना जारी नगरेपछि आयोग पुगेर ध्यानाकर्षण गराएको नेता लीलामणि पोखरेलले बताए ।
बाटोमा रुमलियका जनप्रतिनिधिहरुलाई कारबाही गरिएको पत्र आयोगमा दर्ता गरेका थियौं । तर अहिलेसम्म आयोगले सूचना जारी गरेन’, पोखरेलले भने । विधानसम्मत प्रक्रिया पूरा गरेर कारबाही गरिएकालाई पदमुक्त नगरिएपछि यसबारे ध्यानाकर्षण गराएको उनले बताए ।
तर प्रमुख आयुक्त दिनेश थपलियाले भने पदमुक्त गर्न आवश्यक कागजात नपुगेको बताएका थिए । केन्द्रीय कमिटीले कारबाही गरेको भनिए पनि प्रतिलिपी नआएकाले नेतालाई कारबाही गरिएको सूचना सार्वजनिक नगरेको उनले बताएका थिए ।
नेता पोखरेलले भने केन्द्रीय कमिटीले कारबाही गर्ने अधिकार अध्यक्षलाई दिएकाले कारबाही प्रक्रिया अघि बढाउन आग्रह गरेका छन् । माओवादी छोडेर एमाले प्रवेश गरेका १८ जना बढी जनप्रतिनिधिलाई कारबाही गरिएको उनले बताए ।
आयोगले सूचना जारी नगरेसम्म जनप्रतिनिधि पदमुक्त नहुने कानुनी व्यवस्था छ ।
अन्तिम अपडेट: 2021-June-18 समय 4:25 PM
लेखक
