नीलकण्ठ–१३ का गृहिणी महिलाहरुका लागि संचालित ब्युटिसियन तालिम सम्पन्न

धादिङ,२६ जेठ ।
नीलकण्ठ नगरपालिका वडा नं. १३ का गृहिणी महिलाहरुलाई लक्षित गर्दै संचालन गरिएको ब्युटिसियन सम्बन्धी आधारभूत तालिम सम्पन्न भएको छ। नीलकण्ठ नगरपालिकाको आयोजनामा, बागमती प्रदेश सरकार अन्तर्गत सामाजिक विकास मन्त्रालय तथा सामाजिक विकास कार्यालय गजुरीको सहकार्यमा तालिम संचालन गरिएको हो ।

गृहिणी महिला सशक्तिकरण कार्यक्रम अन्तरगत संचालन गरिएको ब्युटिसियन तालिममा वडाभित्रका १० जना गृहिणी महिलाहरुको सहभागिता रहेको थियो ।

तालिम समापन कार्यक्रममा बोल्नुहुँदै नीलकण्ठ नगरपालिकाका प्रमुख प्रशासकीय अधिकृत पुरुषोत्तम सुवेदीले नगरपालिकाले नागरिकलाई स्वरोजगारी बनाउन विभिन्न नीतिहरु ल्याएको बताउनुभयो । तालिम लिएर व्यवसाय सुरु गर्नेहरुलाई नीलकण्ठ नगरपालिकाले २ लाख देखी १५ लाख सम्म सहुलियत कर्जा उपलब्ध गराउने सुवेदीले जानकारी दिनुभयो ।

उहाँका अनुसार २ लाख सम्मको लागि बिना धितो र २ लाख भन्दा बढीको हकमा धितो राखेर कर्जा उपलब्ध गराईने छ । पुरुषको हकमा ५ प्रतिशत र महिलाको हकमा ६ प्रतिशत व्याज नगरपालिकाले तिर्ने गरी बैंक सँग सम्झौता गरीएको प्रमुख प्रसाशकीय अधिकृत सुवेदीले बताउनुभयो । तालिम लिएर मात्र हुँदैन व्यवसाय गरेर देखाउनुपर्छ, उहाँले भन्नुभयो ।

सामाजिक विकास समितिका संयोजक मञ्जु थापा मगरले गृहिणी महिलाहरूलाई तालिममार्फत आर्थिक रूपमा सक्षम बनाउनु नै प्रमुख उद्देश्य रहेको बताउनुभयो ।

त्यस्तै वडा नं १३ का वडा सदस्य राम्री नेपालीले तालिमपछि महिलाहरुले व्यवसाय सुरु गरी वडा नं. १३ लाई उद्यमी वडा बनाउने आशा र अपेक्षा लिएको बताउनुभयो । उहाँले भन्नुभयो, “उद्यमी बनेर देखाउनभयो भने गौरवको महसुस हुने छ” ।
कार्यक्रम संयोजक तथा महिला विकास निरीक्षक निर्मला केसीले गृहणी महिलाहरुलाई आत्मनिर्भर बनाउँदै स्वरोजगारतर्फ उन्मुख गराउने उद्धेश्यले तालिम संचालन गरिएको बताउनुभयो ।

वडा नं १३ का वडा सदस्य राम्री नेपालीको अध्यक्षतामा भएको कार्यक्रममा नीलकण्ठ नगरपालिकाका प्रमुख प्रशासकिय अधिकृत पुरुषोत्तम सुवेदीको प्रमुख आतिथ्यता रहेको थियो । कार्यक्रममा सामाजिक विकास समितिका संयोजक मन्जु थापा मगर, सूचना प्रविधि अधिकृत राजकुमार श्रेष्ठ, महिला विकास निरीक्षक तथा कार्यक्रम संयोजक निर्मला केसी, एम आइ एस अपरेटर रोशन कोइराला लगायत तालिममा सहभागिहरुको उपस्थिति रहेको थियो।

तालिम धादिङबेशी स्थित कौशिक ब्युटि पार्लरमा संचालन गरिएको थियो भने तालिमको प्रशिक्षण राधिका दंगालले गर्नुभएको थियो ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।