काठमाडौँ । वेब प्रालिको प्रस्तुति रहेको फिल्म ‘ताराहरू’ ले केन्द्रीय चलचित्र जाँचपास समिति (सेन्सर बोर्ड)बाट ‘यू’ (युनिभर्सल) सर्टिफिकेट प्राप्त गरेको छ। अब यो फिल्म बच्चादेखि वृद्धसम्म सबै उमेर समूहका दर्शकले हेर्न मिल्ने भएको छ।
फिल्म आगामी भदौ ६ गतेदेखि देशभर प्रदर्शनमा आउँदैछ। २ घण्टा २९ मिनेट लामो फिल्ममा आशान्त शर्मा र मेनुका प्रधानसँगै कुन्दन शाक्य, मीरा खड्का, प्रभाकर न्यौपाने, आभाष अधिकारी, राज पंगेनी शर्मा, प्रमोद बाबु र विकास खनालको अभिनय रहेको छ।
गोपिनी सेढाईँ र कृष्णप्रसाद पंगेनी निर्माताको रूपमा संलग्न फिल्मको निर्देशन अभिनेता शर्माले गरेका हुन्। पोस्टर रसिक राजले डिजाइन गरेका हुन्।
निर्देशक शर्माका अनुसार, ‘ताराहरू’ मध्यम वर्गीय परिवारको कथामा आधारित डार्क कमेडी शैलीमा तयार गरिएको फिल्म हो। फिल्ममा मुख्य रूपमा श्रीमान–श्रीमतीको सम्बन्धको कथा भए पनि किशोर–किशोरीको भूमिकाले पनि विशेष स्थान पाएको छ।
निर्माण टिमका अनुसार, सबै उमेर र वर्गका दर्शकका लागि मनोरञ्जनात्मक र प्रेरणादायी फिल्मको रूपमा ‘ताराहरू’ प्रस्तुत गरिएको छ।
फिल्मले मध्यम वर्गीय व्यक्तिले आफ्नो सपना र आकांक्षा पूरा गर्न संघर्ष गर्दा आउने सामाजिक–आर्थिक अवरोधहरू र मानसिक दबाबका कारण हुने गलत निर्णयहरूलाई कथा मार्फत उजागर गर्ने प्रयास गरेको छ।
