विश्वस्तरीय फिस्टेल माउन्टेन कलेज पाेखरामा खुल्देै
पोखरा ।
इन्नोभेटिभ नेपाल ग्रुप (आइएनजी) ले पोखरामा विश्वस्तरको आईटी कलेज सञ्चालनमा ल्याएको छ । समूहले पोखरामा ‘फिस्टेल माउन्टेन कलेज’ स्थापना गरेको हो । यो कलेजले बेलायतको प्रतिष्ठित उल्भरह्याम्पटन विश्वविद्यालयसँग सम्बन्धन लिएको छ ।
अब पोखराका विद्यार्थीले घरमै बसेर बेलायती डिग्री हासिल गर्न पाउनेछन् । कलेज पोखरा–१७ स्थित मुस्ताङचोकमा रहनेछ । यहाँ सूचना प्रविधि र साइबर सुरक्षा विषयमा स्नातक तहको पढाइ हुनेछ । कलेजले आगामी शैक्षिक सत्रदेखि नै विद्यार्थी भर्ना लिने तयारी थालेको छ ।
यो कलेज स्थापना हुनुको मुख्य उद्देश्य पोखरालाई आईटी हबका रूपमा विकास गर्नु हो । आइएनजीले स्वदेशमै दक्ष जनशक्ति उत्पादन गर्ने लक्ष्य राखेको छ । उत्पादित
जनशक्तिलाई नेपालमै रोजगारीको अवसर दिने योजना पनि समूहको छ । समूहका संस्थापक अध्यक्ष सुलभ बुढाथोकीले यसको औपचारिक जानकारी दिएका हुन् । उनले काठमाडौंमा सीमित रहेको आईटी शिक्षालाई अब पोखरामा विस्तार गरेको बताए । पोखरा पर्यटकीय सहर मात्र नभई अब प्रविधिको गन्तव्य पनि बन्ने उनको विश्वास छ ।
मंगलबार पोखरामा आयोजित पत्रकार सम्मेलनमा कलेजको घोषणा गरिएको हो । कार्यक्रम ‘पोखराको नवयुग’ शीर्षकमा सम्पन्न भयो । यहाँको पढाइ बेलायतको सिकाइ शैलीमा आधारित हुनेछ ।
तीन वर्षे कोर्षको संरचना बेलायती मापदण्डअनुसार तयार पारिएको छ । पहिलो वर्ष विद्यार्थीले लेभल ४ को अध्ययन गर्नेछन् । दोस्रो वर्ष लेभल ५ र तेस्रो वर्ष लेभल ६ को पढाइ हुनेछ । यो कोर्ष पूरा गर्न विद्यार्थीलाई करिब ८ लाख रुपैयाँ लाग्नेछ । पाठ्यक्रममा आर्टिफिसियल इन्टेलिजेन्स (एआई), मेसिन लर्निङ, बिग डाटा र क्लाउड कम्प्युटिङजस्ता अत्याधुनिक विषय समेटिएका छन् ।
कलेजले विद्यार्थीलाई पढाइसँगै रोजगारीको ग्यारेन्टी पनि गरेको छ । अध्यक्ष बुढाथोकीले एक वर्षभित्र पोखरामै कम्तीमा एउटा प्रविधि कम्पनी खोल्ने प्रतिबद्धता जनाए । यसले विद्यार्थीलाई पढ्दै काम गर्ने वातावरण मिलाउनेछ ।
उनले भने, ‘हामी जनशक्ति उत्पादन मात्र गर्दैनौं, उनीहरूलाई स्वदेशमै काम पनि दिलाउँछौँ ।’ नेपालमा आईटी क्षेत्रले फड्को मारिरहँदा जनशक्ति अभाव हुन नदिने उनको योजना छ । विद्यार्थीले अब विदेश जानुपर्ने बाध्यता हट्ने अपेक्षा गरिएको छ । उनीहरूले पोखरामै बसेर अन्तर्राष्ट्रिय कम्पनीका लागि काम गर्न सक्नेछन् ।
आइएनजीअन्तर्गतको भैरव टेकले यसअघि नै आफ्नो क्षमता प्रमाणित गरिसकेको छ । यो कम्पनीले पेरिस ओलम्पिक्स २०२४ मा साइबर सुरक्षा प्रदान गरेको थियो । यसले नेपाली युवाको सीप विश्वस्तरको भएको पुष्टि गर्छ । अब पोखराका विद्यार्थीले पनि यस्तै विश्वव्यापी अवसर पाउनेछन् ।
कार्यक्रममा ‘ग्लोबल एआई टिम’ निर्माण गर्ने घोषणा पनि गरियो । यस योजनाले नेपाली इन्जिनियरलाई ठूला विदेशी परियोजनामा जोड्नेछ । साथै, बेलायतमा दर्ता भएको नयाँ साइबर सुरक्षा कम्पनी पनि सञ्चालनमा आउनेछ । यसको नेतृत्व भैरव टेकका सदस्यहरूले नै गर्नेछन् ।
कलेज सञ्चालनले पोखराको शैक्षिक क्षेत्रमा नयाँ आयाम थपिने विश्वास लिइएको छ । समूहका उपाध्यक्ष प्रकाश श्रेष्ठले चाँडै भर्ना प्रक्रिया सुरु हुने जानकारी दिए । उनले भने, ‘काठमाडौंमा चलेको आईटी इकोसिस्टम अब पोखरामा पनि चल्नेछ ।’ पोखराले आईटी क्षेत्रमा फरक पहिचान बनाउने अवसर आएको उनले बताए ।
यहाँबाट उत्पादित विद्यार्थी एआई इन्जिनियर, मेसिन विज्ञ, सिस्टम डेभलपर तथा सफ्टवेयर आर्किटेक्ट बन्न सक्नेछन् । कलेजले ‘सुपर फोकस्ड’ आईटी कलेजका रूपमा आफूलाई चिनाउने लक्ष्य लिएको छ ।
नयाँ लोगो अनावरण गर्दै कलेजले भविष्यका टेक नेतृत्वकर्ता उत्पादन गर्ने संकल्प गरेको छ ।बुढाथाेकीले नेपालमा अन्तर्राष्ट्रिय तहको शिक्षा औपचारिक रुपमा भित्र्याएको नै आइनजी समूहले हो ।
पुरा र थप ताजा समाचारको लागि यहाँ थिच्नुहोस् ।
http://citypokhara.com/?p=20100, citypokhara.com
लेखकको बारेमा
लेखकसँग सम्बन्धित खबरहरु
समाचार२०८२ मंसिर १४, शनिबार ०६:५०लायन्स द्वारा मधुमेह निवारणका लागि सचेतना कार्यक्रम सम्पन्न- समाचार२०८२ मंसिर १३, शुक्रबार २२:०१पोखरामा नि:शुल्क आँखा शिविर सम्पन्न, १५ जनालाई मोतिविन्दुको निःशुल्क शल्यक्रिया हुने
- समाचार२०८२ मंसिर १३, शुक्रबार ००:३०गण्डकी प्रदेश प्रमुख भट्टद्वारा दुई विधेयक प्रमाणीकरण
- समाचार२०८२ मंसिर १३, शुक्रबार ००:२५विश्वस्तरीय फिस्टेल माउन्टेन कलेज पाेखरामा खुल्देै
