‘जेन-जी परिषद्’ गठन गर्ने प्रस्ताव मन्त्रिपरिषदबाट स्वीकृत

काठमाडौँ- सरकारले यही २०८२ फागुन २१ गते हुने प्रतिनिधिसभा सदस्य निर्वाचनका लागि देशव्यापी रूपमा तीन दिन सार्वजनिक बिदा दिने निर्णय गरेको छ ।

निर्वाचन सफल बनाउन यही फागुन २० गतेदेखि २२ गतेसम्म सार्वजनिक बिदा दिने निर्णय गरिएको गृहमन्त्री ओमप्रकाश अर्यालले जानकारी दिनुभएको हो ।

बैठकले निर्वाचन प्रयोजनका लागि चीन सरकारबाट प्राप्त हुने ४० लाख डलर बराबरको नगद अनुदान सहायता स्वीकार गर्ने निर्णय समेत गरेको छ ।

विकास आयोजनातर्फ, सरकारले चालू आर्थिक वर्षको बजेटमा व्यवस्था भएबमोजिम बूढीगण्डकी जलाशययुक्त जलविद्युत् आयोजनाको वित्तीय लगानी ढाँचालाई स्वीकृत गरेको गृहमन्त्री अर्यालले जानकारी दिनुभयो ।

बैठकले न्यायिक र प्रशासनिक सुधारका क्रममा काठमाडौँ जिल्ला अदालतका न्यायाधीश डा. दिवाकर भट्टलाई उपभोक्ता अदालत काठमाडौँको अध्यक्षको जिम्मेवारी तोकिएको छ । यस्तै, बीमा ऐन २०७९ अन्तर्गतका कसुर सम्बन्धी मुद्दाहरूको कारबाही र किनारा गर्ने अधिकार जिल्ला अदालतलाई दिने निर्णय गरिएको छ ।

बैठकले विक्रम संवत् २०८३ सालका लागि वर्षभरिको सार्वजनिक बिदाको सूची निर्धारण गर्नुका साथै ‘जेन्जी परिषद्’ गठन गर्ने प्रस्तावलाई समेत स्वीकृत गरेको छ । यी निर्णयहरूले निर्वाचनको तयारी र प्रशासनिक कार्यसम्पादनलाई थप व्यवस्थित बनाउने सरकारको विश्वास छ ।।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।