ताङतिङ दुधपोखरी तमु समाजद्वारा विशेष स्वागत तथा सम्मान कार्यक्रम सम्पन्न

‎पोखरा । ताङतिङ दुधपोखरी तमु समाजको आयोजनामा विशेष स्वागत तथा सम्मान कार्यक्रम सम्पन्न भएको छ । आचार्य निमा गुरुङको ऐतिहासिक सफलताको खुसीयालीमा पोखरामा आयोजित कार्यक्रममा विभिन्न तमु संघसंस्थाका प्रतिनिधि तथा समाजसेवीहरूको सहभागिता रहेको थियो ।

कार्यक्रमको उद्घाटन गर्दै प्रमुख अतिथि आचार्य विमा गुरुङले आफ्नो अधिकार प्रयोग गर्दा अरूको अधिकार हनन गर्न नहुने बताईन् । उनले धर्म, संस्कार, संस्कृति, अनुशासन र नैतिकताभित्र रहेर जीवनयापन गर्नुपर्नेमा जोड दिईन् । इज्जत र सम्मानको ख्याल राख्दै कहिल्यै घमण्ड, लोभलालचमा नलाग्न तथा सधैं नम्र भएर अरूको सेवा गर्नुपर्ने उनको भनाई थियो ।

आचार्य गुरुङले धाँधली, भ्रष्टाचार, चोरी, डकैती, लुटपाट तथा ठगीजस्ता गलत कार्यबाट टाढा रहन आग्रह गर्दै सबैले आफ्नो जिम्मेवारी इमान्दारीपूर्वक बहन गर्न सके समाजमा सकारात्मक वातावरण बन्ने विश्वास व्यक्त गरिन्  । उनले घर, गाउँ, टोल, समाज, स्थानीय तह, प्रदेश हुँदै समग्र देशको विकासका लागि पारस्परिक विश्वास आवश्यक रहेको उल्लेख गरिन् ।

‎उक्त अवसरमा आचार्य निमा गुरुङले आफ्ना बाबा–आमा, गुरु खेम्पो शिर लामा तथा आफ्ना आचार्यलाई सम्मान गरेकी थिईन् ।

कार्यक्रममा ताङ्तिङ पोखरा घोताने चेलीबेटी समूह, ताङतिङ पैङिथर चेलीबेटी समूह, ताङ्तिङ क्रपुथर भाइखलक, ताङ्तिङ लम्स्यो–प्लान्स्यो चेलीबेटी समूहलगायत विभिन्न समूहका प्रतिनिधिहरू सहभागी भएका थिए । साथै ताङतिङ दुधपोखरी तमु समाज परिवार तथा लामा गुरु परिवारका प्रतिनिधिहरूको पनि उपस्थिति रहेको थियो ।

स्वर्गीय हर्कध्वज गुरुङको परिवारको सहयोगमा आयोजित कार्यक्रम ताङतिङ घोताने भाइखलकका अध्यक्ष तथा पूर्वप्रधानपञ्च देविजंग गुरुङको अध्यक्षतामा सम्पन्न भएको हो ।

‎कार्यक्रममा स्वागत मन्तव्य सुब्बेदार मेजर टोकबहादुर गुरुङले राखेका थिए भने सञ्चालन ताङतिङ दुधपोखरी तमु समाजका सचिव क्याप्टेन मन्त्रीजंग गुरुङले गरेका थिए ।