मन्थलीमा कृषि तथा लघु उद्यम प्रदर्शनी मेला

मन्थली (रामेछाप) – आजदेखि यहाँ दुईदिने कृषि तथा लघु उद्यम प्रदर्शनी मेला-२०८२ आयोजना गरिएको छ ।

मन्थली नगरपालिकाले आयोजना गरेको मेलाको उद्घाटन गर्दै बागमती प्रदेशका कृषि तथा पशुपन्छीमन्त्री मधुसूदन पौडेलले कृषि उद्यम विकासका लागि प्रदेश सरकारले काम गरिरहेको बताउनुभयो । उहाँले मेलाले किसान र उद्यमीका उत्पादनको बजारीकरणमा योगदान पुग्ने विश्वास व्यक्त गर्नुभयो ।

नगरप्रमुख लव श्रेष्ठले नगरपालिका क्षेत्रमा उत्पादन तथा प्रशोधन गरिएका बाली र वस्तुको प्रवर्द्धन, ज्ञान, सीप र प्रविधि साटासाट, उत्पादक, उपभोक्ता र व्यापारीबीच सम्बन्ध विस्तार गर्ने उद्देश्यले मेला आयोजना गरिएको बताउनुभयो ।

नगरपालिका आर्थिक विकास समितिका संयोजक नवराज थापामगरले प्रदर्शनीमा कृषिउपज ल्याउने किसानलाई निःशुल्क ‘स्टल’ उपलब्ध गराई खाने, बस्ने र ढुवानी एवं यातायात खर्चको समेत व्यवस्था गरिएको बताउनुभयो । प्रदर्शनी मेलामा सहभागी भई उत्कृष्ट हुने कृषक तथा उद्यमीलाई मूल्याङ्कन गरी विभिन्न १० विधामा पुरस्कृत गरिने उहाँले जानकारी दिनुभयो ।

नगरपालिकाका प्रमुख प्रशासकीय अधिकृत देवर्षि सापकोटाले करिब १० हजारले मेला अवलोकन गर्ने अनुमान रहेको बताउनुभयो ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।