‘लालीबजार’को ‘मै राम्री छु त नी’ गीतको अंश सार्वजनिक

काठमाडौं। आगामी वैशाख १८ गतेदेखि प्रदर्शनमा आउने फिल्म ‘लालीबजार’को तेस्रो गीत ‘मै राम्री छु त नी’को छोटो अंश सार्वजनिक गरिएको छ । षट्कोण आर्ट्सले आफ्नो युट्युब च्यानलमार्फत गीतको झलक सार्वजनिक गरेको हो ।

गीतमा दीपिका बयम्बू मगरको स्वर छ भने कोरसमा रन्जिता विश्वकर्मा, बिन्दु बिसी, सुनिता सुनार, मनोज बिक र गोविन्द अनेकको स्वर समावेश छ । प्रकाश सपुतको शब्द र संगीत रहेको गीतमा प्रदीप लामाको कोरियोग्राफी छ ।

सार्वजनिक भिडियोमा स्वस्तिमा खड्का, रवीन्द्र सिंह बानियाँ, मुकुन्द श्रेष्ठ र जानकी कडायत देखिएका छन् । गीतमा नारी सुन्दरताको चित्रण गरिएको छ र स्वस्तिमा केन्द्रमा प्रस्तुत छन् । क्लिप सामाजिक सञ्जालका विभिन्न प्लेटफर्ममा प्रयोग हुन थालेको छ ।

गीतको पूर्ण संस्करण फिल्म प्रदर्शनसँगै हलमा हेर्न पाइने निर्माण पक्षले जनाएको छ । यसअघि सार्वजनिक ट्रेलर युट्युबको मुभी चार्टमा दोस्रो स्थानमा ट्रेन्डिङमा छ ।

आमा–छोरीको कथामा आधारित फिल्मले बादी समुदायमा रहेको ‘नाथिया’ जस्तो कुप्रथालाई उठान गरेको छ । स्वस्तिमा खड्का फिल्ममा आमाको भूमिकामा छिन् ।

यम थापाको निर्देशनमा बनेको फिल्मको कथा तथा पटकथा थापा र प्रदीप भट्टराईले संयुक्त रूपमा तयार गरेका हुन् । षट्कोण आर्ट्सले यसअघि ‘जात्रा’, ‘जात्रै जात्रा’, ‘महापुरुष’ र ‘महाजात्रा’ निर्माण गरिसकेको छ ।

फिल्ममा विशाल देवकोटा र प्रशंसा सुवेदीले डेब्यु गरेका छन् । स्वस्तिमा खड्का, रवीन्द्र सिंह बानियाँ, समाइरा थापा, मुकुन्दकुमार श्रेष्ठ लगायत कलाकारको अभिनय रहेको फिल्म बर्दियाको राजापुरमा छायांकन गरिएको हो ।

म्याक्स दीपेश खत्री र रवीन्द्र सिंह बानियाँ निर्माता रहेको फिल्मका कार्यकारी निर्माता प्रदीप भट्टराई हुन् । फिल्ममा प्रकाश सपुत, खेम सेन्चुरी र जयन जे वाइबाको संगीत रहेको छ ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।