स्वावलम्बी बहिरा विद्यालयमा पङ्खा हस्तान्तरण र निःशुल्क स्वास्थ्य परीक्षण

धादिङबेशी,१६ असार । धादिङको नीलकण्ठ नगरपालिका–८ स्थित स्वावलम्बी बहिरा आधारभूत विद्यालयमा राष्ट्रिय धान दिवसको अवसरमा पङ्खा हस्तान्तरण, निःशुल्क स्वास्थ्य परीक्षण तथा दही–चिउरा खाने कार्यक्रम सम्पन्न भएको छ ।
शितल छहारी नेपालको आयोजना तथा कोइन ई.भी. जर्मनीको सहयोगमा आयोजित कार्यक्रममा विद्यालयको किचन र भोजन कक्षका लागि आवश्यक पङ्खा विद्यालयलाई हस्तान्तरण गरिएको हो। पङ्खा नीलकण्ठ नगरपालिका–८ का वडा अध्यक्ष प्रकाश श्रेष्ठले विद्यालयका प्रधानाध्यापक रामप्रसाद अधिकारीलाई हस्तान्तरण गर्नुभयो ।

कार्यक्रमका क्रममा विद्यार्थी, शिक्षक तथा अभिभावक गरी ६७ जनाको निःशुल्क स्वास्थ्य परीक्षण गरिएको आयोजकले जनाएको छ । साथै राष्ट्रिय धान दिवसका अवसरमा विद्यालयका विद्यार्थी, शिक्षक तथा स्वास्थ्यकर्मीलाई दही–चिउरा खुवाएर दिवस मनाइएको थियो ।
प्रधानाध्यापक रामप्रसाद अधिकारीको सभापतित्वमा सम्पन्न कार्यक्रममा वडा अध्यक्ष प्रकाश श्रेष्ठ प्रमुख अतिथि रहनुभएको थियो । कार्यक्रममा बागमती प्रदेश सूचना पुनरावेदन समितिका अध्यक्ष कृष्णराज अधिकारी, शितल छहारी नेपालका अध्यक्ष कृष्ण बद्री पौडेल, धादिङ अस्पतालका मेडिकल अधिकृत डा. सबिन भण्डारी, डा. एलिसा कोसया लगाएत अन्य सरोकारवालाको उपस्थिति रहेको थियो ।

कार्यक्रमको समापनमा प्रधानाध्यापक अधिकारीले सहयोग गर्ने सबै व्यक्ति तथा संस्थाप्रति धन्यवाद व्यक्त गर्नुभयो । वडा अध्यक्ष श्रेष्ठले आगामी आर्थिक वर्षमा विद्यालयसम्म पुग्ने सडक स्तरोन्नति गरी पहुँच सहज बनाउने प्रतिबद्धता व्यक्त गर्नुभएको छ ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।