कृषि तथा पशुपन्छी भवन निर्माणका लागि ज्वालामूखीलाई दुई करोड ७५ लाख अनुदान

बागमती प्रदेशमा कृषि तथा पशुपन्छी केन्द्र निर्माणका लागि अनुदान पाउने ज्वालामूखी एकमात्र पालिका

धादिङबेशी,२८ साउन । ज्वालामूखी गाउँपालिकाले कृषि तथा पशुपन्छी सेवा प्रवाहका लागि आवश्यक भवन निर्माण गर्न रु दुई करोड ७५ लाख अनुदान पाउने भएको छ। भारतीय राजदूतावासको उच्च प्रभाव सामुदायिक विकास परियोजना (एचआईसीडीपी) अन्तर्गत उक्त रकम उपलब्ध गराइने भएको हो।

परियोजना कार्यान्वयनका लागि मंगलबार काठमाडौंस्थित भारतीय राजदूतावास, सम्बन्धित सरकारी निकाय र स्थानीय तहबीच समझदारीपत्रमा हस्ताक्षर भएको छ। ज्वालामूखी गाउँपालिकाका तर्फबाट गाउँपालिका अध्यक्ष यमनाथ दनै र प्रमुख प्रशासकीय अधिकृत हरेराम शाहले समझदारीपत्रमा हस्ताक्षर गर्नुभएको हो।

अनुदान रकमबाट कृषि तथा पशुपन्छीसम्बन्धी सेवा सञ्चालनका लागि आवश्यक भौतिक पूर्वाधार निर्माण गरिने गाउँपालिकाले जनाएको छ। भवन बनेपछि किसानलाई कृषि तथा पशुपालनसम्बन्धी प्राविधिक परामर्श, सेवा तथा कार्यक्रम एकीकृत रूपमा सञ्चालन गर्न सहज हुने अपेक्षा गरिएको छ।

कृषि र पशुपालन ज्वालामूखीका नागरिकको प्रमुख आयआर्जनका क्षेत्रमध्ये पर्दछन्। नयाँ पूर्वाधार तयार भएपछि किसानलाई उपलब्ध गराइने सेवा थप व्यवस्थित र प्रभावकारी बनाउन सहयोग पुग्ने गाउँपालिकाको अपेक्षा छ।

बागमती प्रदेशमा एचआईसीडीपीअन्तर्गत कृषि तथा पशुपन्छी केन्द्र निर्माणका लागि अनुदान प्राप्त गर्ने स्थानीय तहमध्ये ज्वालामूखी गाउँपालिका एकमात्र पालिका रहेको जनाइएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।