धादिङ–काठमाडौं भाडा रु ३९०, गाडी ‘पल्टी’ गर्दा रु ३४० भन्दा बढी लिन नपाइने

धादिङ, २५ भदौ । बाढीपछि वैकल्पिक सडक प्रयोग गरी सञ्चालन भइरहेका यात्रुबाहक सवारीसाधनले बढी भाडा लिएको गुनासो बढेपछि धादिङ मण्डली यातायात प्रालिले भाडादर सार्वजनिक गर्दै जिल्ला प्रशासन कार्यालय धादिङमा भएको सहमतिअनुसार मात्रै भाडा लिन आफ्ना व्यवसायीलाई निर्देशन दिएको छ ।

प्रालिका अध्यक्ष शरद अधिकारीका अनुसार धादिङबेँसीबाट वैकल्पिक कच्ची सडक हुँदै मास्टार निस्केर काठमाडौंसम्म सिधा जाने सवारीसाधनले प्रतियात्रु रु ३९० मात्रै लिन पाउनेछन् । फुर्केखोला क्षेत्रमा यात्रुलाई एउटा गाडीबाट झारेर खोला पार गराई अर्को गाडीबाट गन्तव्यतर्फ पठाउने ‘पल्टी’ प्रणालीमा भने धादिङबेँसी–काठमाडौं पुरानै भाडा रु ३४० कायम रहने उहाँले स्पष्ट पार्नुभएको छ । “कच्ची वैकल्पिक सडक प्रयोग गरेबापत थप गरिएको रु ५० भाडा फुर्केखोलामा गाडी पल्टी गरेर यात्रु पठाउने सवारीको हकमा लागू हुँदैन,” अधिकारीले भन्नुभयो, “त्यस्ता सवारीले साविककै भाडा लिनुपर्छ ।”

डिलक्स बसले बढीमा रु ४६० लिन पाउने
डिलक्स बसको हकमा पनि साविक भाडामा रु ५० भन्दा बढी थप गर्न नपाइने प्रालिले जनाएको छ । साविकमा रु ४१० भाडा रहेको डिलक्स बसले वैकल्पिक कच्ची सडक प्रयोग गर्दा अधिकतम रु ४६० सम्म लिन पाउने अध्यक्ष अधिकारीले बताउनुभयो ।

उहाँका अनुसार डिलक्स सेवाका सवारीले बीच बाटोबाट यात्रु चढाउन नपाउने व्यवस्था पनि पालना गर्नुपर्नेछ । प्रालिले सार्वजनिक गरेको भाडादरअनुसार धादिङबेँसीबाट मास्टारसम्म रु २४०, बैरेनी रु २५०, गल्छी रु २५५, महादेवबेँसी रु २९०, जुंगेखोला रु ३०५, धार्के रु ३३०, नौबिसे रु ३४५, खानीखोला रु ३६०, थानकोट रु ३७० र काठमाडौंसम्म रु ३९० भाडा कायम गरिएको छ ।

‘विपद्को समयमा बढी भाडा लिने कुरा सोच्न पनि सकिँदैन’
अध्यक्ष अधिकारीले अहिलेको विपद्को अवस्थामा यात्रुबाट मनपरी भाडा असुल्नु अनुचित हुने बताउनुभयो । “विपद्को समयमा राज्य र नागरिकलाई सहयोग गर्नु सबै यातायात व्यवसायीको कर्तव्य हो । यस्तो अवस्थामा बढी भाडा लिने कुरा सोच्न पनि सकिँदैन,” उहाँले भन्नुभयो ।

यो पनि पढ्नुहोस् : भूमिहीन समस्या समाधान सरकारको उच्च प्राथमिकतामा: प्रधानमन्त्री शाह

कुनै सवारीसाधनले सार्वजनिक गरिएको भाडादरभन्दा बढी रकम लिएमा सम्बन्धित व्यवसायी स्वयं कानुनी कारबाहीको भागीदार हुने उहाँले बताउनुभयो । बढी भाडा लिएको पाइए त्यस्ता सवारीको जाँच गरी प्रचलित यातायात ऐेन अनुसार कारबाही गर्न उहाँले जिल्ला प्रशासन कार्यालय तथा सम्बन्धित निकायसँग आग्रह समेत गर्नुभएको छ ।

प्रयोजनविपरीतका सवारी नियन्त्रण गर्न प्रशासनसँग माग
यसअघि जिल्लामा भाडादरको विषय उठेपछि प्रशासन र यातायात व्यवसायीबीच भाडा समायोजन तथा सवारी सञ्चालन व्यवस्थित गर्ने विषयमा सहमति भएको अधिकारीले बताउनुभयो । उक्त सहमतिअनुसार व्यवसायीले भाडा समायोजन गरेको तर कानुनी प्रयोजनविपरीत सञ्चालन भइरहेका सवारीसाधन नियन्त्रण गर्ने पक्ष प्रभावकारी रूपमा कार्यान्वयन नभएको उहाँको दाबी छ ।

“हामी प्रशासनसँग भएको सहमतिभन्दा बाहिर गएका छैनौँ,” अधिकारीले भन्नुभयो, “सम्झौताअनुसार व्यवसायीले आफ्नो जिम्मेवारी पूरा गर्दा प्रयोजनविपरीत सञ्चालन हुने सवारीसाधनमाथि पनि सम्बन्धित निकायले निगरानी र कारबाही गर्नुपर्छ ।”

बाढीका कारण फुर्केखोलाको पुलमा क्षति पुगेपछि धादिङबेँसी–काठमाडौं आवतजावतका लागि वैकल्पिक कच्ची सडक प्रयोग भइरहेको छ । सडक परिवर्तनसँगै भाडाबारे अन्योल र बढी रकम असुलिएको गुनासो आउन थालेपछि मण्डली यातायातले भाडादर सार्वजनिक गरेको हो ।

यस्तो छ,धादिङ मण्डली यातायात प्रालिले सार्वजनिक गरेको यातायात भाडादर

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।