शिक्षामा राजनीति होइन, साझा प्रतिबद्धता आवश्यक : अध्यक्ष भक्त बहादुर लामा

धादिङबेशी,१ पुस । गंगाजमुना गाउँपालिकाका अध्यक्ष भक्त बहादुर लामाले शिक्षाको गुणस्तर सुधार र दिगो विकास पाँच पक्षको सहकार्यबिनै सम्भव नहुने स्पष्ट गर्नुभएको छ। सोमबार मण्डली माध्यमिक विद्यालयको ६९औँ वार्षिकोत्सव तथा अभिभावक दिवस कार्यक्रममा विशेष अतिथिका रूपमा सम्बोधन गर्दै अध्यक्ष लामाले नीति निर्माता, शिक्षक, अभिभावक, विद्यालय व्यवस्थापन समिति र राजनीतिक नेतृत्वबीच समन्वय भए मात्र शिक्षा क्षेत्रमा परिवर्तन सम्भव हुने बताउनुभयो।

“अभिभावकले शिक्षकलाई दोष दिने, शिक्षकले अभिभावकलाई दोष दिने र सबै मिलेर स्थानीय सरकारलाई दोषारोपण गर्ने प्रवृत्तिले शिक्षा अगाडि बढ्दैन,” अध्यक्ष लामाले भन्नुभयो, “हामी सबैले आफ्नो–आफ्नो दायित्व इमान्दारिताका साथ निर्वाह गर्नुपर्छ।”

शिक्षालाई राजनीतिक, धार्मिक र जातीय स्वार्थभन्दा माथि राख्नुपर्नेमा जोड दिँदै उहाँले विकास निर्माणका काममा दलगत विभाजन गर्न नहुने धारणा राख्नुभयो। “राम्रो स्कूल बने सबैले पढ्न पाउँछन्, राम्रो बाटो बने सबैले हिँड्न पाउँछन्,” उहाँले भन्नुभयो, “अहिले शिक्षा, स्वास्थ्य, खानेपानी र पूर्वाधारमा राजनीति नगरौँ।”

कार्यक्रममा अध्यक्ष लामाले विद्यालय विकासमा सहयोग गर्ने दाताहरूप्रति कृतज्ञता व्यक्त गर्नुभयो। “आफ्ना बालबच्चाको मुख काटेर, दुःख गरेर कमाएको सम्पत्तिबाट विद्यालयलाई सहयोग गर्नु महान कार्य हो,” उहाँले भन्नुभयो, “गाउँपालिकाको तर्फबाट र व्यक्तिगत रूपमा पनि सबै दानीहरूप्रति मुरी–मुरी धन्यवाद दिन चाहन्छु।”

गाउँपालिकाको शैक्षिक सुधारका उपलब्धि उल्लेख गर्दै अध्यक्ष लामाले गंगाजमुनाका ४२ वटै विद्यालयमा स्मार्ट बोर्डमार्फत अध्ययन–अध्यापनको व्यवस्था छिट्टै सुरु हुने जानकारी दिनुभयो। संघीय शैक्षिक अनुदान प्राप्त गर्ने दुई नगरपालिका र ११ गाउँपालिका मध्ये गंगाजमुना गाउँपालिका पनि परेको उल्लेख गर्दै उहाँले यसलाई गर्वको विषय भएको बताउनुभयो।

अध्यक्ष लामाले वडा नं. ५ ले शिक्षा क्षेत्रमा उल्लेखनीय प्रगति गरेको भन्दै वडा अध्यक्ष, विद्यालय परिवार र व्यवस्थापन समितिलाई धन्यवाद दिनुभयो। “गरिएको कामलाई गर्‍यै भन्न सक्नुपर्छ, कमजोरी देखिए सुधार गर्नुपर्छ,” उहाँले जोड दिनुभयो।

कार्यक्रमको अन्त्यमा अध्यक्ष लामाले गंगाजमुनालाई नमूना गाउँपालिका बनाउने लक्ष्यमा सबैलाई एकताबद्ध भएर लाग्न आह्वान गर्नुभयो। “समाज परिवर्तन बाहिरबाट होइन, यहाँ उपस्थित हामी सबैबाट सुरु हुन्छ,” उहाँले भन्नुभयो।

यो पनि पढ्नुहोस् : दशाैं पोखरा स्पोर्ट्स अवार्डबाट ७ लाख ७१ हजार रुपैयाँ बचत

मण्डली माध्यमिक विद्यालयको ६९औँ वार्षिकोत्सव तथा अभिभावक दिवस विभिन्न शैक्षिक तथा सांस्कृतिक कार्यक्रमका साथ सम्पन्न भएको थियो।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।