धुवाकोटमा सरफ तथा झोल साबुन बनाउने पाँचदिने तालिम संचालन

धादिङबेशी,३१ जेष्ठ । धादिङको नीलकण्ठ नगरपालिका–१४ धुवाकोटमा स्थानीय महिलाहरूलाई स्वरोजगार र आत्मनिर्भर बनाउने उद्देश्यले सरफ तथा झोल साबुन बनाउने पाँचदिने सीपमूलक तालिम सुरु भएको छ।

धुवाकोट सामुदायिक सिकाइ केन्द्रको आयोजनामा सञ्चालन भएको तालिमको उद्घाटन गरिएको हो। कार्यक्रममा वडा नम्बर १४ का वडा अध्यक्ष नमराज दुवाडी प्रमुख अतिथि रहनुभएको थियो। वडा सदस्य तथा न्यायिक समिति सदस्य कमला तामाङको विशेष आतिथ्यता रहेको कार्यक्रममा वडा सदस्य भीमबहादुर गुरुङ, सामुदायिक सिकाइ केन्द्रका पदाधिकारी तथा महिला समूहका प्रतिनिधिहरूको सहभागिता थियो।

तालिममा केन्द्रअन्तर्गतका सात वटा महिला समूहका २५ जना महिलाहरू सहभागी छन्। सहभागीहरूलाई सरफ तथा झोल साबुन उत्पादन विधि, आवश्यक सामग्रीको प्रयोग, उत्पादन प्रक्रिया, गुणस्तर व्यवस्थापन तथा व्यावहारिक सीपसम्बन्धी प्रशिक्षण प्रदान गरिने आयोजकले जनाएको छ।

उद्घाटन कार्यक्रममा बोल्दै वडा अध्यक्ष दुवाडीले यस्ता सीपमूलक तालिमले महिलाको आर्थिक सशक्तीकरणमा सहयोग पुग्ने बताउनुभयो। उहाँले तालिमबाट प्राप्त ज्ञान र सीपलाई व्यवहारमा प्रयोग गरी आयआर्जनका अवसर सिर्जना गर्न आग्रह गर्नुभयो।

स्थानीय स्तरमा उत्पादन तथा उद्यमशीलता विकासलाई प्रोत्साहन गर्ने उद्देश्यले सञ्चालन गरिएको तालिम पाँच दिनसम्म चल्ने आयोजकले जनाएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।