पारिवारिक कथा बोकेको ‘मालती मंगले’को ट्रेलर सार्वजनिक

काठमाडौं । आगामी वैशाख २५ गते (मे ८) देखि प्रदर्शनमा आउन लागेको फिल्म ‘मालती मंगले’को ट्रेलर सार्वजनिक गरिएको छ । ललितपुरस्थित लबिम मलको क्यूएफएक्स सिनेमाजमा आयोजित कार्यक्रममा निर्माण पक्षले ट्रेलर सार्वजनिक गरेको हो ।

ट्रेलर सार्वजनिक कार्यक्रममा मुख्य कलाकार विजय बराल, वर्षा राउत र मेक्सम गौडेलसहित निर्माता तथा वरिष्ठ गायक रामकृष्ण ढकाल, निर्देशक प्रकु पाण्डेय, कार्यकारी निर्माता सागर ज्ञवालीलगायतको उपस्थिति रहेको थियो ।

सार्वजनिक ट्रेलरले फिल्मलाई पारिवारिक तथा सामाजिक कथामा आधारित प्रस्तुत गरेको छ । ट्रेलरमा मालती (वर्षा राउत) र मंगले (विजय बराल)बीचको प्रेम, सम्बन्धमा आउने उतारचढाव र पारिवारिक द्वन्द्वलाई देखाइएको छ । साथै, मेक्सम गौडेललाई ‘हरि’ नामक नकारात्मक भूमिकामा प्रस्तुत गरिएको छ ।

ट्रेलरमा साथीभाइबीचको सम्बन्ध, त्यसमा आउने उतारचढाव तथा छोरा–छोरीबीच समाजले गर्ने विभेदकारी सोचलाई समेत उठान गरिएको छ । ‘नाक फुटेको मात्र देखिस्, नाक काटेको देखिनस्’ भन्ने संवादमार्फत सामाजिक ‘इज्जत’को दबाबलाई मार्मिक रूपमा प्रस्तुत गरिएको छ । ट्रेलरमा ‘झ्याम पारम’ र ‘सुनैको सपनी’ गीतका अंशहरू पनि समावेश छन् ।

रानी फिल्म्सको ब्यानरमा युनि इन्टरटेन्मेन्टसँगको सहकार्यमा निर्माण भएको फिल्मको कथा निर्देशक प्रकु पाण्डेयकै हो भने पटकथा तथा संवाद संयोग गुरागाईँले लेखेका हुन् । फिल्ममा विजय, वर्षा र मेक्समका साथै प्रकाश घिमिरे, सरिता गिरी, नरिन थापा, मान्सु सापकोटा, सुस्मा निरौला, सुनिल तामाङलगायत कलाकारको अभिनय रहेको छ ।

फिल्मका कार्यकारी निर्माता सागर ज्ञवाली हुन् भने बाबु सुवेदी, रबिन श्रेष्ठ, वेदना कर्माचार्य, पद्मावती गुरुङ, स्वीकृति बस्नेत र मिलन बजगाईँ सह–निर्माताका रूपमा रहेका छन् ।

महेश पौडेलको छायांकन, रोमी मोजेजको सम्पादन, कृष्ण भण्डारीको रङ संयोजन, सुजिल कर्माचार्यको ब्याकग्राउन्ड म्युजिक र डिकेश खड्गीको ध्वनि मिश्रण रहेको फिल्मको प्राविधिक पक्ष बलियो देखिन्छ । आरआर फिल्म्सले वितरण गर्ने यो फिल्म वैशाख २५ गतेदेखि प्रदर्शनमा आउनेछ ।