एनएसएल चौथो संस्करण भदौ २० देखि हुने « रिपोर्टर्स नेपाल

काठमाडौँ । नेपाल सुपर लिग (एनएसएल) को चौथो संस्करण आगामी भदौ २० गतेदेखि सुरु हुने भएको छ । आयोजक नेपाल स्पोर्ट्स एन्ड इभेन्ट म्यानेजमेन्ट (एनएसइएम) ले प्रतियोगिताको नयाँ सिजनको मिति तय गरेको हो ।

यसपटकको संस्करण व्यावसायिक नेपाली फुटबलको विकासमा कोसेढुङ्गा साबित हुने दाबी आयोजकको छ । प्रतियोगितालाई थप रोमान्चक र विश्वस्तरीय बनाउन यस वर्ष पहिलोपटक ‘होम एन्ड अवे’ प्रणालीमा खेलहरू सञ्चालन गरिने भएको छ ।

यसअघिका संस्करणहरू दशरथ रंगशालामा मात्रै केन्द्रित रहने गरेकोमा यसपटक देशका विभिन्न सहरका रंगशालामा समेत खेलहरू हुने जनाइएको छ । खेल संख्या र प्रतिस्पर्धालाई अझ रोमाञ्चक बनाउन यसपटक टोलीहरूको संख्या पनि थपिने भएको हो । गत सिजनहरूमा सीमित टोलीबीच प्रतिस्पर्धा भएकोमा यस चौथो संस्करणमा टोलीको संख्या बढाएर १० देखि १२ सम्म पुर्‍याउने तयारी आयोजकले गरेको छ ।