गैरी गाउँ माविमा अभिभावक मनोपरामर्श तथा उत्प्रेरणा कार्यक्रम सम्पन्न

धादिङ,३ जेठ
धादिङको नीलकण्ठ नगरपालिका वडा नम्बर ४ स्थित गैरी गाउँ माध्यमिक विद्यालयमा अभिभावक मनोपरामर्श तथा उत्प्रेरणा कार्यक्रम सम्पन्न भएको छ। विद्यालय व्यवस्थापन समितिका अध्यक्ष विष्णु बहादुर गुरुङको अध्यक्षतामा सम्पन्न भएको पहिलो दिनको कार्यक्रममा वडा नम्बर ४ का वडा अध्यक्ष हरि बहादुर श्रेष्ठको प्रमुख आतिथ्यता रहेको थियो । कार्यक्रममा विद्यालयका प्रधानाध्यापक रिता श्रेष्ठले कार्यक्रमको उदेश्य सहित आवश्यकताको बारेमा जानकारी गरानुभएको थियो ।

विद्यालयका कक्षा ७ देखि १० सम्म अध्ययनरत विद्यार्थीहरूका अभिभावकहरूको उत्साहजनक सहभागितामा कार्यक्रम आयोजना गरिएको हो। कार्यक्रमका प्रमुख अतिथि वडा नम्बर ४ का वडा अध्यक्ष हरि बहादुर श्रेष्ठ ले आजका बालबालिका भोलिका राष्ट्रका आधारस्तम्भ भएकाले उनीहरूको भविष्य निर्माणमा अभिभावकको माया, समय र सही मार्गदर्शन सबैभन्दा ठूलो शक्ति हुने बताउनुभयो। कार्यक्रममा मनोपरामर्शकर्ता रामकुमार थापाले सहजीकरण गर्दै किशोरावस्थामा बालबालिकाले भोग्ने मानसिक, भावनात्मक तथा व्यवहारिक परिवर्तनबारे सहजिकरण गर्नुभएको थियो। उहाँले अभिभावकको एक सकारात्मक शब्द, एक सानो प्रशंसा र केही समयले पनि बालबालिकाको जीवनमा ठूलो परिवर्तन ल्याउन सक्ने बताउनुभयो।

उहाँले “बालबालिकालाई डर होइन, विश्वास चाहिन्छ । दबाब होइन, साथ चाहिन्छ । उनीहरूको मन जित्न सके मात्रै भविष्य उज्यालो बनाउन सकिन्छ” भन्ने बारे प्रष्ट पार्नुभएको थियो। प्रशिक्षणका क्रममा अभिभावक र बालबालिकाबीचको सम्बन्ध कसरी अझ नजिक, आत्मीय र विश्वासिलो बनाउन सकिन्छ भन्ने विषयमा व्यवहारिक उदाहरणसहित प्रस्तुति गरिएको थियो।कार्यक्रममा सहभागी धेरै अभिभावक भावुक बन्नुभएको थियो । कतिपय अभिभावकहरूले आफ्ना बालबालिकाको भावना बुझ्न नसकेको स्वीकार गर्दै अबदेखि उनीहरूसँग बढी समय बिताउने, खुलेर संवाद गर्ने र साथीझैँ व्यवहार गर्ने प्रतिबद्धता व्यक्त गर्नुभएको थियो ।

अभिभावकहरूले तालिम अत्यन्त प्रभावकारी रहेको प्रतिक्रिया दिँदै “आज हामीले आफ्ना छोराछोरीको मन बुझ्ने अवसर पायौँ”, “हाम्रो आँखा खुलेको महसुस भयो” तथा “यस्तो कार्यक्रम हरेक विद्यालयमा आवश्यक छ” भन्ने धारणा राखेका राख्नुभएको थियो ।यस्ता कार्यक्रमले अभिभावक, शिक्षक र विद्यार्थीबीचको सम्बन्ध अझ बलियो बनाउने विश्वास व्यक्त गर्दै आगामी दिनमा पनि निरन्तर यस्ता सचेतनामूलक तथा प्रेरणादायी कार्यक्रम सञ्चालन गरिने विद्यालयले जानकारी दिएको छ ।

यो पनि पढ्नुहोस् : समुदायको पहलले जोगियो भुर्तेल आधारभूत विद्यालय

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।