फुर्केखोला वैकल्पिक मार्गमा सवारी एकतर्फी
परेवाटार–मास्टार सडक साँघुरो भएपछि प्रशासनले समय तोक्यो, भदौ २७ गतेदेखि नयाँ व्यवस्था लागू
धादिङ, २६ भदौ । भोटेकोशीको बाढीले फुर्केखोलाको पक्की पुलमा क्षति पुगेपछि प्रयोगमा ल्याइएको परेवाटार–मास्टार वैकल्पिक सडकमा सवारी आवागमन एकतर्फी बनाइएको छ। सडक साँघुरो हुँदा आवागमन व्यवस्थापनमा समस्या देखिएपछि जिल्ला प्रशासन कार्यालय धादिङले भदौ २७ गतेदेखि लागू हुने गरी निश्चित समय तोकेर सवारी सञ्चालन गर्ने निर्णय गरेको हो।
प्रशासनले शुक्रबार जारी गरेको सूचनाअनुसार बिहान ६ बजेदेखि अपराह्न १२ बजेसम्म गल्छी–मास्टारबाट परेवाटार हुँदै धादिङबेँसी आउने सवारीसाधन सञ्चालन हुनेछन्। उक्त समयमा धादिङबेँसीतर्फ आउने सवारीले अपराह्न १२ बजेभित्र मास्टारको पुल पार गरिसक्नुपर्नेछ।
त्यस्तै, दिउँसो १ बजेदेखि साँझ ७ बजेसम्म धादिङबेँसीबाट परेवाटार हुँदै मास्टार–गल्छीतर्फ जाने सवारीसाधन सञ्चालन हुनेछन्। यस अवधिमा गल्छीतर्फ जाने सवारीले साँझ ७ बजेभित्र परेवाटार पार गरिसक्नुपर्ने प्रशासनले जनाएको छ।
भदौ १० गते रसुवातर्फ भोटेकोशीमा आएको बाढीका कारण धादिङबेँसी जोड्ने फुर्केखोलास्थित पक्की पुलमा क्षति पुगेपछि परेवाटार–मास्टार सडकलाई वैकल्पिक मार्गका रूपमा प्रयोगमा ल्याइएको थियो। तर उक्त सडक साँघुरो भएकाले दुवैतर्फबाट एकै समयमा सवारी चलाउँदा आवागमन व्यवस्थापनमा कठिनाइ हुँदै आएको थियो।
नयाँ व्यवस्थाले धादिङबेँसीबाट काठमाडौं तथा गल्छीतर्फ जाने र बाहिरबाट सदरमुकाम आउने यात्रु तथा सवारी चालकले अब तोकिएको समयअनुसार यात्रा योजना बनाउनुपर्ने भएको छ।
जिल्ला प्रशासन कार्यालयले तोकिएको समयभित्र सवारी आवागमन व्यवस्थापनका लागि सुरक्षा निकाय तथा ट्राफिक प्रहरी परिचालन गरिने जनाएको छ। सबै सवारी चालक, यात्रु तथा सर्वसाधारणलाई समय, मार्ग र सवारी सञ्चालनसम्बन्धी व्यवस्था पालना गरी सुरक्षित तथा व्यवस्थित आवागमनमा सहयोग गर्न अनुरोध गरिएको छ।
यो व्यवस्था अर्को निर्णय वा वैकल्पिक व्यवस्था नभएसम्म कायम रहने प्रशासनले जनाएको छ।
लेखकको बारेमा
- असल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।
लेखकसँग सम्बन्धित खबरहरु
समाचार२०८३ भाद्र ३१, बुधबार १९:०९दुई सातामै कृष्णभीरमा नयाँ ट्र्याक,पृथ्वी राजमार्ग सञ्चालनमा- स्वास्थ्य/जानकारी टिप्स२०८३ भाद्र ३१, बुधबार १४:०७स्तन क्यान्सर सचेतनाका लागि असोज १७ मा ‘पिंकवाक २०२६’ आयोजना हुँदै, वसन्तपुरदेखि पाटनसम्म पदयात्रा
- खेलकुद२०८३ भाद्र ३१, बुधबार ११:४६नेपालले आज जापानसँग भलिबल खेल्दै
- खेलकुद२०८३ भाद्र ३१, बुधबार ११:२५अब एकदिवसीय मान्यता जोगाउन नेपाललाई चुनौती
