शिक्षा दिवसमा एआई, जलवायु परिवर्तन र शैक्षिक प्रणालीबारे बहस

धादिङबेशी, २ असोज । ५४ औँ राष्ट्रिय शिक्षा दिवसका अवसरमा कृत्रिम बुद्धिमत्ता (एआई), जलवायु परिवर्तन र वर्तमान शैक्षिक प्रणालीका विषयमा विद्यार्थी तथा विज्ञबीच शैक्षिक बहस सम्पन्न भएको छ।

धादिङ आवासीय माध्यमिक विद्यालयद्वारा आयोजित कार्यक्रममा विद्यार्थीहरूले सम्बन्धित क्षेत्रका विज्ञसँग प्रत्यक्ष सवाल–जवाफ गर्दै प्रविधिको प्रयोग, वातावरण संरक्षण र व्यावहारिक शिक्षाको आवश्यकताबारे छलफल गरेका हुन्।

कार्यक्रममा विद्यार्थी रुमन दाहालले नीलकण्ठ बहुमुखी क्याम्पसका क्याम्पस प्रमुख डा मुरारी अधिकारी, शिक्षा विकास तथा समन्वय इकाइ धादिङका प्रमुख कृष्णकुमार श्रेष्ठ र नीलकण्ठ नगरपालिकाका स्रोतव्यक्ति मेघनाथ कोइरालासँग कृत्रिम बुद्धिमत्ता तथा जलवायु परिवर्तनका विषयमा प्यानल बहस गर्नुभएको थियो।

बहसका क्रममा विज्ञहरूले एआई अभिशाप नभई आधुनिक प्रविधि भएकाले यसको प्रयोग सोचविचारपूर्वक गर्नुपर्ने बताउनुभयो। एआईलाई अन्तिम विकल्पका रूपमा नभई सहयोगी साधनका रूपमा प्रयोग गर्नुपर्नेमा उहाँहरूले जोड दिनुभयो।

जलवायु परिवर्तनका कारण बढ्दै गएको जोखिम न्यूनीकरण गर्न राज्यका साथै नागरिकस्तरबाट पनि वातावरण संरक्षणमा योगदान आवश्यक रहेको विज्ञहरूको भनाइ थियो।

त्यस्तै, विद्यार्थी अमिशा रिजालले वर्तमान शैक्षिक प्रणालीका विषयमा विज्ञहरूसँग बहस गर्नुभएको थियो। वक्ताहरूले किताबी ज्ञानमा मात्र सीमित नभई प्रयोगात्मक र व्यावहारिक शिक्षालाई प्राथमिकता दिनुपर्ने बताउनुभयो। विद्यार्थीले सिक्ने, समाजमा टिक्ने र श्रमबजारमा बिक्ने किसिमको शिक्षा आजको आवश्यकता भएको उहाँहरूको भनाइ थियो।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।