व्यक्तिगत कीर्तिमानभन्दा टिमको जित महत्त्वपूर्ण : सन्दीप लामिछाने

काठमाडौं । विराटनगर किंग्सका कप्तान सन्दीप लामिछानेले व्यक्तिगत कीर्तिमानभन्दा टिमको जितलाई प्राथमिकता दिने बताएका छन् ।

पोखरा एभेन्जर्सलाई ६ विकेटले पराजित गरेपछि प्रतिक्रिया दिँदै लामिछानेले प्रतियोगितामा टिमका लागि महत्त्वपूर्ण दुई अंक हासिल गर्नु आफ्नो मुख्य लक्ष्य रहेको बताए । पोखराविरुद्धको खेलमा ह्याट्रिकसहित ६ विकेट लिएका उनले व्यक्तिगत उपलब्धिभन्दा टिमको जित नै महत्त्वपूर्ण हुने धारणा राखे ।

आफूले ह्याट्रिक पूरा गरेको कुरा तत्काल थाहा नपाएको पनि उनले खुलासा गरे । टिमका साथीहरू आएर जानकारी गराएपछि मात्रै ह्याट्रिक भएको थाहा पाएको उनको भनाइ थियो ।

लामिछानेले क्रिकेटमा बलरले कति विकेट लियो भन्नेभन्दा पनि खेलको कुन परिस्थिति र समयमा बलिङ गरिरहेको छ भन्ने कुरा महत्त्वपूर्ण हुने बताए ।

अन्य बलरले अर्को इन्डबाट दबाब सिर्जना गरिदिएकाले आफूलाई बलिङ गर्न सहज भएको उनले उल्लेख गरे ।

पोखराविरुद्धको खेलमा कप्तान लामिछानेले उत्कृष्ट बलिङ गर्दै ह्याट्रिकसहित ६ विकेट लिएपछि विराटनगरले सहज जित निकालेको थियो । उनको यो प्रदर्शनले व्यक्तिगत रूपमा कीर्तिमान कायम गर्नुका साथै टिमलाई महत्त्वपूर्ण जित दिलाउन निर्णायक भूमिका खेलेको छ ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।