Breaking News
पत्रकारिताका समस्या संयुक्त रूपमा समाधान गर्नेबारे चिनियाँ पत्रकारसँग काउन्सिलको छलफल 

काठमाडौँ ।
प्रेस काउन्सिल नेपालले नेपाल भ्रमणमा रहेका चिनियाँ पत्रकारसहितको टोलीसँग पत्रकारितामा देखिएका समस्या समाधान गर्न संयुक्त प्रयास गर्न सकिनेबारे छलफल गरेको छ । चीनको सिचाङ प्रान्त (तिब्बत)बाट आएका तिब्बत सांस्कृतिक केन्द्र तथा पत्रकार महासङ्घका प्रतिनिधि र काउन्सिलका प्रतिनिधिबिच आइतबार काउन्सिलमा दुई देशको संस्कार, संस्कृति, परम्पराबारे एकअर्को देशमा प्रचार गर्नुका साथै डिजिटल सञ्चारसँगै पत्रकारितामा देखिएका समस्या समाधानमा संयुक्त पहल गर्न सकिनेबारे छलफल भएको हो । कार्यक्रममा काउन्सिलका सदस्य विजयराज अधिकारीले भ्रमण टोलीलाई स्वागत गर्दै आपसी सद्भाव र सम्बन्ध बलियो बनाएर अघि बढ्न सकिने बताउनुभयो । उहाँले प्रेस काउन्सिल नेपालको काम, कर्तव्य र मिडिया अनुगमनबारे जानकारी गराउनुभएको थियो । काउन्सिलका मुख्य अधिकृत झबिन्द्र भुसालले नेपाली मिडियाको अवस्था, कानुनी व्यवस्था, डिजिटल मिडियाका अवसर र चुनौतीबारे प्रस्तुति गर्नुभएको थियो ।
पत्रकारिताका समस्या संयुक्त रूपमा समाधान गर्नेबारे चिनियाँ पत्रकारसँग काउन्सिलको छलफल 
यस्तै चिनियाँ भ्रमण टोलीका प्रमुख लिओ जुनले हजारौँपटक सुन्नुभन्दा एकपटक देख्नु प्रभावकारी हुने भन्दै नेपाली पत्रकारलाई तिब्बत भ्रमणका लागि प्रबन्ध मिलाउन काउन्सिलसँग आग्रह गर्नुभयो । उहाँले नेपाल चीनबिच सञ्चार क्षेत्रबाट प्रयाप्त भ्रमण आदानप्रदान हुन आवश्यक रहेको औँल्याउनुभयो । चीनले पछिल्ला वर्षमा डिजिटल परिवर्तनमा ठुलो फड्को मारेको भन्दै उहाँले नेपालमा पनि सहकार्य गर्न सकिने बताउनुभयो । डिजिटल मिडिया व्यवस्थापनबारे आगामी अक्टोबरमा तिब्बतमा ठुलो सम्मेलन हुन लागेको भन्दै नेपालबाट समेत सहभागिताका लागि काउन्सिलले समन्वय गर्न भ्रमण टोलीले अनुरोध गरेको छ ।
कार्यक्रममा चिनियाँ सिचाङ अन्तर्राष्ट्रिय सञ्चार केन्द्रका सिरेन सोङ्जिया, नगरपालिका मिडिया सेन्टरका निर्देशक गेसाङ डेजी, काउन्सिल सदस्य याङ जेङलिङ लगायतले चिनियाँ पत्रकारिता अभ्यासबारे जानकारी गराउनुभएको थियो । शाखा अधिकृत सन्तोष अधिकारीले सहजीकरण गर्नुभएको कार्यक्रममा काउन्सिलका वरिष्ठ प्रशासकीय अधिकृत दीपक खनाल, सहप्रशासकीय अधिकृत रामशरण बोहरा, उपप्रशासकीय अधिकृत राधेश्याम अधिकारी, सबिता ढकाल, शाखा अधिकृत सुवास राई लगायतको सहभागिता रहेको थियो ।

पुरा र थप ताजा समाचारको लागि यहाँ थिच्नुहोस् ।
https://www.presscouncilnepal.gov.np/np/2025/06/22/9807/, www.presscouncilnepal.gov.np

रहेनन् शिक्षासेवी टुवराज बास्तोला

पोखरा । शिक्षासेवी डा. टुवराज बास्तोलाको ८२ वर्षको उमेरमा निधन भएको छ । पोखरा ११ फूलबारीस्थित निवासमा आइतबार मध्यान्ह १२ बजेर ५५ मिनेटमा उनको निधन भएको हो । सम्पूणानन्दविश्वविद्यालय बनारसबाट संस्कृत साहित्यमा प्रथम श्रेणीमा आचार्य तथा विद्यावारिधि गरेका डा.बास्तोलाले लामो समय शिक्षासेवामा अर्पण गरेका थिए ।


बाराही मा.वि.मा निरन्तर अध्यापन गरेर सेवानिवृत्त भएका उनी त्यसपछि पनि विभिन्न शैक्षिक, सामाजिक,धार्मिक तथा साहित्यिक संस्थाहरुमा क्रियाशील रहेका थिए । बास्तोला शिव शक्ति मावि, शिक्षा महाविद्यालय र रामेश्वर मन्दिर फूलबारीका पूर्व अध्यक्ष पनि हुन् । यसैगरी, लेखनाथ साहित्य प्रतिष्ठानका सल्लाहकार तथा लेखनाथ जन्मघर जीर्णोद्धार समितिका संयोजक समेत रहेका थिए । उनले शिवशक्ति माविमा प्रतिभा सम्मान कोष स्थापना गरेका छन् ।


यसैगरी, विभिन्न धार्मिक अनुष्ठानहरुमा उनको सहयोग रहेको छ । उनी महेन्द्र विद्याभूषणबाट विभूषित भएका थिए । बाराही मावि, शिवशक्ति मावि, शिव शक्ति क्याम्पस, शिक्षा महाविद्यालय, लेखनाथ साहित्य प्रतिष्ठान, नवनीत साहित्य सागर, विन्दुवासिनी संस्कृत विद्यापीठ लगायतका संस्थाबाट उनी सम्मानित समेत भैइसकेका छन् ।


स्व.बास्तोलाका धर्मपत्नी मुगादेवी, छोरा रमेश, दुई छोरी प्रभा पौडेल र कमला पराजुलीनतथा पाँच नाति-नातिना छन् । साथै, एक दाजु, तीन भाइ र एक बहिनी छन् । दिवंगत बास्तोलाको शवयात्रा सोमबार बिहान १० बजे हुने परिवारले जनाएको छ । पोखरा–११ सेतीगण्डकी, कालीखोला र भलाम खोलाको दोभान रिठ्ठाघाटमा अन्त्येष्टि हुने भएको छ ।