पारिजातको संरक्षण र प्रवर्द्धनमा विशेष पहल

धादिङ,असोज २९ गते
जिल्लामा जैविक विविधता तथा औषधीय महत्व बोकेको लोपोन्मुख बिरुवा “पारिजात“ को संरक्षणमा डिभिजन वन कार्यालय धादिङले विशेष ध्यान दिएको छ । बेनीघाट रोराङ गाउँपालिका – १० स्थित जवाङ मौवा खोला सामुदायिक वन क्षेत्रमा रहेको पारिजातको संरक्षण तथा प्रवद्र्धन कार्य तीव्र रुपमा अगाडि बढाइएको छ।

वन कार्यालयका अनुसार १.८ हेक्टर कोर क्षेत्र र वरपरको ५ हेक्टर पेरिफेरी क्षेत्रमा पारिजात संरक्षणको काम भइरहेको छ । सोही सामुदायिक वनको तीन वटा ब्लकमा करिब २० हेक्टर क्षेत्रमा व्यवस्थित रुपमा पारिजात बन विस्तार गर्ने योजना बनाइएको छ ।

डिभिजनल वन अधिकृत विष्णु प्रसाद आचार्यका अनुसार, संघीय ससंत अनुदानबाट २० लाख रुपैयाँ बजेट विनियोजन भइसकेको छ। र प्रदेश सरकारबाट ४ लाख रुपैयाँ परेको छ । यस अन्तर्गत सो क्षेत्रलाई नेपालकै उत्कृष्ट पर्यटकीय गन्तव्य र अध्ययन केन्द्रको रुपमा विकास गरिने लक्ष्य राखिएको छ । स्थानीय तहको पनि संरक्षणमा उल्लेख्य योगदान रहने अपेक्षा गरिएको छ ।

बेनीघाट रोराङ गाउँपालिकाले पनि पारिजातको जङ्गललाई संरक्षण गर्नको लागि आफ्नो तर्फबाट आवश्यक सहयोग गर्ने गाउँपालिकाका विपद् व्यवस्थापन शाखाका अधिकृत मणिराज गुरुङले प्रतिबद्धता जनाउनुभएको छ।

पारिजातको महत्व बुझाउन र जनचेतना फैलाउन वन कार्यालयले बृहत् “पारिजात साहित्यि महोत्सव” आयोजना गर्ने तयारी गरेको छ। अधिकृत आचार्यले स्थानीयहरूद्वारा पारिजातको घाँसदाउरा प्रयोजनमा अत्यधिक उपयोग भइरहेको बताउँदै, अबदेखि यसलाई पूर्णरूपमा रोक लगाउने निर्णय गरिएको जानकारी दिनुभयो ।

विशेष गरी जंगलका प्रमुख स्थानहरूमा सूचना बोर्डहरू स्थापना, पदमार्गहरू निर्माण, विश्राम स्थलहरूको व्यवस्था, तथा जंगल सफा राख्न स्वयंसेवक परिचालन गरिने आचार्यले बताउनुभयो ।

बुधबार डिभिजनल वन अधिकृत विष्णु प्रसाद आचार्यको नेतृत्वमा बेनिघाट रोराङ गाउँपालिकाको विपद् व्यवस्थापन शाखाका अधिकृत मणिराज गुरुङ, पत्रकार महासंघ धादिङका अध्यक्ष सिताराम अधिकारी लगायत अन्य सरोकारवाला तथा स्थानीयहरुले पारिजात जङ्गलको अवलोकन गरेको हो ।

यो पनि पढ्नुहोस् : फोटो पत्रकार अक्षयकोषमा वरिष्ठ फोटो पत्रकार सुदुर्शन रञ्जितद्वार ६३ हजार प्रदान

यदि यो योजनाबद्ध ढंगले सफल भयो भने धादिङ जिल्लामा पर्यटकीय गन्तव्यको नयाँ पहिचान स्थापित हुने विश्वास लिइएको छ । यस पहलले जैविक संरक्षणसँगै धादिङको पर्यटकीय सम्भावनालाई उजागर गर्नेछ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।