वैदेशिक रोजगारीलाइ सुरक्षित र व्यवस्थित बनाउन सिद्धलेकमा अभिमुखीकरण कार्यक्रम

धादिङ, पुस ८ गते ।
धादिङको सिद्धलेक गाउँपालिकामा वैदेशिक रोजगारीलाई सुरक्षित, मर्यादित र व्यवस्थित बनाउने उद्देश्यसहित ‘सामी कार्यक्रम (चौथो) चरण’ को कार्यान्वयन मोडालिटी तथा सेवालाई संस्थागत गर्ने विषयमा अभिमुखीकरण तथा अन्तरक्रिया कार्यक्रम सम्पन्न भएको छ। कार्यक्रम सिद्धलेक गाउँपालिकाको सभाहलमा रोजगार प्रवद्र्धन, सामी कार्यक्रमको आयोजनामा सम्पन्न भएको हो।

गाउँपालिकाका अध्यक्ष परशुराम खतिवडाको सभापतित्वमा सम्पन्न कार्यक्रममा उपाध्यक्ष सबिता अर्याल, वडा अध्यक्षहरू, विषयगत समितिका सदस्यहरू तथा कर्मचारीहरूको सहभागिता रहेको थियो।

कार्यक्रममा प्रमुख प्रशासकीय अधिकृत अनिशा आचार्य, नीलकण्ठ नगरपालिकाका सामी कार्यक्रम संयोजक अधिवक्ता दिनेश दुवाडी र सामी कार्यक्रम अधिकृत भोजराज सुनुवारले प्रस्तुतीकरण गर्नुभएको थियो ।

कार्यक्रममा बोल्दै जनप्रतिनिधि र कर्मचारीहरूले सिद्धलेकका कुनै पनि नागरिक श्रम स्वीकृति बिना वैदेशिक रोजगारीमा जान नपाउने व्यवस्था कडाइका साथ लागू गरिने बताएका छन्। असुरक्षित प्रक्रिया अपनाउँदा नागरिक ठगी र सास्तीमा पर्ने गरेको उल्लेख गर्दै गाउँपालिकाका सातै वडाका टोल–बस्तीमा सचेतना समूह गठन गर्ने निर्णय गरिएको छ। यी समूहले वैदेशिक रोजगारी सम्बन्धी सही सूचना प्रवाह गर्ने र समस्यामा परेकाको विवरण संकलन गर्नेछन्।

गाउँपालिकाका अध्यक्ष खतिवडाले गाउँपालिकाले आफ्नो बजेटमा समेटिएका कार्यक्रमहरू पारदर्शी रूपमा कार्यान्वयन गर्न कर्मचारीको भूमिकालाई महत्त्व दिएको बताउनुभएको छ । साथै यस्ता कार्यक्रम साक्षरता कम भएका तथा विकट क्षेत्रमा विशेष प्राथमिकताका साथ लागु गर्नुपर्ने बताउनुभएको छ।

भारत लगायतका देशमा समस्यामा परेका नेपालीको उद्धार र दीर्घकालीन नीतिगत सुधारका लागि आगामी प्रदेशस्तरीय बैठकमा ठोस प्रस्ताव लैजाने योजना समेत सार्वजनिक गरिएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।

यो पनि पढ्नुहोस् : नीलकण्ठ नगरपालिकामा पालिका स्तरीय बृहत शैक्षिक सामग्री प्रदर्शनी सम्पन्न