राज्यका जिम्मेवार अङ्गहरू इमानदार नहुँदा दुर्गमको विकास ओझेलमा – अध्यक्ष रामसिंह तामाङ

धादिङबेशी, पुस १८ । धादिङको रुवी भ्याली गाउँपालिकाका अध्यक्ष रामसिङ तामाङले राज्यका जिम्मेवार निकायहरूले आफ्नो कर्तव्य इमानदारितापूर्वक निभाउन नसक्दा दुर्गम क्षेत्रको विकास र समृद्धि ओझेलमा परेको बताउनुभएको छ।

बुधबार धादिङबेशीमा जिल्लाका पत्रकारहरूका लागि आयोजित ‘डिजिटल पत्रकारिता, कन्टेन्ट निर्माण तथा पत्रकारितामा एआई (AI) को प्रयोग’ सम्बन्धी एकदिने तालिमको उद्घाटन गर्दै अध्यक्ष तामाङले यस्तो धारणा राख्नुभएको हो।

“राज्यका अङ्गहरू अनुशासित भएनन्”

कार्यक्रममा बोल्दै अध्यक्ष तामाङले संघीय, प्रदेश तहका सरकार र राज्यका अन्य जिम्मेवार निकायहरूले जिम्मेवारीपूर्ण ढङ्गले काम नगरेको अनुभव सुनाउनुभयो। “यदि सबै इमानदार भएको खण्डमा हाम्रो भूगोल असाध्यै सुन्दर र देश सानो छ, विकास गर्न समय लाग्दैन,” उहाँले भन्नुभयो, “तर मेरो अनुभूतिमा राज्यका जिम्मेवार अङ्गहरू अनुशासित र जिम्मेवारीप्रति गम्भीर देखिएका छैनन्।”

विपद् व्यवस्थापनमा विभेदको गुनासो

अध्यक्ष तामाङले जिल्ला विपद् व्यवस्थापन समितिको कार्यशैलीप्रति कडा आक्रोश व्यक्त गर्नु भएको छ । पहुँच वाला स्थानिय तहको सामान्य नाली बाढीले बगाउँदा माइन्युट हुने तर रुवी भ्यालीमा चार महिनासम्म सडक अवरुद्ध भएर जनताले सास्ती पाउँदा पनि सुनुवाइ नहुने गरेको भन्दै उहाँले असन्तुष्टि पोख्नुभयो। “अस्ति विपद्को मिटिङमा म ठूलो स्वरले पड्किएँ,” उहाँले भन्नुभयो, “जिल्लाको सदरमुकाम र दुर्गम पालिकालाई हेर्ने राज्यको दृष्टिकोणमा ठूलो खाडल छ।”

रुवी भ्यालीको स्रोत र कानुनी जटिलता

रुवी भ्याली बहुमूल्य पत्थर (क्रिष्टल, रुवी), जडिबुटी र जलविद्युतको धनी भए तापनि संघीय कानुन र स्थानीय सरकारको अधिकारबीचको द्वन्द्वले गर्दा ती स्रोतको उपयोग हुन नसकेको उहाँले बताउनुभयो।

बहुमूल्य पत्थर: “रुवी भ्यालीको भित्ता-भित्तामा विश्वकै चर्चित स्टोनहरू छन्, तर कानुनी जटिलताका कारण हामीले न त्यसलाई करको दायरामा ल्याउन सकेका छौं, न व्यवस्थापन गर्न,” उहाँले भन्नुभयो।
हाइड्रो पावर: आँखु खोलामा बनिरहेका २४-२५ मेगावाटका हाइड्रो प्रोजेक्टहरूलाई जिल्लाको आयस्रोत र विकासको बहसको विषय बनाउनुपर्नेमा उहाँले जोड दिनुभयो।

यो पनि पढ्नुहोस् : कर्म–कर्ण आदिवासी जनजाति पत्रकारिता पुरस्कारबाट पत्रकार हितानमगर र गुरुङ सम्मानित

पत्रकारिताप्रति अपेक्षा

पत्रकारितालाई राज्यको चौथो अङ्ग मात्र नभई ‘जिम्मेवार अङ्ग’ का रूपमा परिभाषित गर्दै अध्यक्ष तामाङले विकास र समाज सुधारमा मिडियाको ठूलो भूमिका हुने बताउनुभयो। रुवी भ्यालीलाई पर्यटकीय हब बनाउन गाउँपालिकाले गुरुयोजना बनाएको जानकारी दिँदै उहाँले यहाँको प्रचारप्रसारमा कलम चलाइदिन पत्रकारहरूलाई आग्रह गर्नुभयो। डिजिटल प्रविधिको विकाससँगै पत्रकारहरूले आफ्नो क्षमता अभिवृद्धि गर्नुपर्ने र ओझेलमा परेका बिषयबस्तुलाई बहसमा ल्याउनुपर्ने उहाँको सुझाव थियो।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।