नेत्रावती डवजोङ गाउँपालिकामा सार्वजनिक सुनुवाइ सम्पन्न

धादिङबेशी,१९ असार । धादिङको नेत्रावती डवजोङ गाउँपालिकाले वडा तथा पालिका स्तरको सार्वजनिक सुनुवाइ कार्यक्रम सम्पन्न गरेको छ। सुशासन, पारदर्शिता र जवाफदेहितालाई प्रवर्द्धन गर्ने उद्देश्यले शुक्रबार वडा नम्बर १ को प्राङ्गणमा सार्वजनिक सुनुवाइ आयोजना गरिएको हो।

कार्यक्रममा गाउँपालिका अध्यक्ष मेघनाथ रिजाल, प्रमुख प्रशासकीय अधिकृत सन्देश प्रसाद जोशी, गाउँपालिकाका प्रवक्ता तथा वडा नम्बर १ का वडाध्यक्ष ठाकुर गुरुङसहित विभिन्न शाखाका प्रमुखहरूको सहभागिता रहेको थियो। शाखा प्रमुखहरूले आ–आफ्नो क्षेत्रसँग सम्बन्धित योजना, विकास निर्माण, बजेट कार्यान्वयन र सेवा प्रवाहबारे जानकारी गराएका थिए।

सार्वजनिक सुनुवाइका क्रममा स्थानीय सहभागीहरूले विकास आयोजना समयमै सम्पन्न नभएको, केही स्थानमा मापदण्डअनुसार निर्माण कार्य नभएको, साना व्यवसायमा दोहोरो करको प्रभाव परेको तथा अनुगमन समितिको प्रभावकारिताबारे गुनासा र जिज्ञासा राखेका थिए।

उठेका प्रश्न तथा गुनासाको जवाफ गाउँपालिका अध्यक्ष मेघनाथ रिजाल र प्रमुख प्रशासकीय अधिकृत सन्देश प्रसाद जोशीले दिनुभएको थियो। उहाँहरूले सार्वजनिक सुनुवाइमा उठेका विषयलाई आवश्यक प्राथमिकताका साथ सम्बोधन गर्दै सेवा प्रवाहलाई थप प्रभावकारी, पारदर्शी र जवाफदेही बनाउने प्रतिबद्धता व्यक्त गर्नुभयो।

नेत्रावती डवजोङ गाउँपालिकाले सार्वजनिक सेवा प्रवाहको प्रभावकारिता अभिवृद्धि तथा नागरिकको गुनासो र सुझावलाई संस्थागत रूपमा सम्बोधन गर्न प्रत्येक वर्ष सार्वजनिक सुनुवाइ कार्यक्रम सञ्चालन गर्दै आएको जनाएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।