काठमाडौँ। असोजको १३ गतेबाट रिलिजमा आउन लागेको चलचित्र ‘बलिदान’ को ओएसटी गीत ‘जय बलिदान’ सार्वजनिक गरिएको छ । सुजन चापागाँइको स्वर र संगीत रहेको यो गीतमा हर्क साउदको शब्द छ । गीत ओएसआर डिजिटलको यु ट्युव च्यानल मार्फत सार्वजनिक गरिएको छ।
यो गीतले आमाको माया र उनको त्यागको भाव बोकेको छ । आमाले सन्तानका लागि गरेको त्याग र समर्पणलाई समावेश गर्दै गीतमा छोराले आमाप्रति देखाएको मायालाई गीतमार्फत भन्न खोजिएको छ ।
गीतको लिरिकल भिडियोमा नायक समीर भट्ट, ऋचा शर्मा लगायतलाई देख्न सकिन्छ । साथमा, केही दृश्य एनिमेटेड भिडियो पनि प्रस्तुत गरिएको छ ।
सन्तोष सेनको निर्देशनमा तयार भएको यो चलचित्रमा दर्शनजीको लेखन, पवन ब्राडफोर्ड विष्टको लगानी छ । फिल्मका कार्यकारी निर्माता प्रेम पुरी हुन् ।
यो फिल्ममा समीर भट्ट, ऋचा शर्मा, सौगात मल्ल, अर्पण थापा, हेमन्त वुढाथोकी, सन्तोष सेन, कविता राय लगायतका कलाकारहरूको अभिनय छ ।
