स्वास्थ्यकर्मीको बलिदान पैसाले होइन, सम्मानले तौलिनुपर्छ: अध्यक्ष थपलिया

धादिङबेशी २०,मंसिर । बेनिघाट रोराङ गाउँपालिकाका अध्यक्ष कृष्ण बहादुर थपलिया बिवेकले महिला स्वास्थ्य स्वयंसेविका लगायत स्वास्थ्यकर्मीहरूको कामलाई पैसा वा सेवा-सुविधाले मूल्याङ्कन गर्न नसकिने भन्दै उहाँहरूको त्यागलाई बिशेष सम्मान मार्फत उच्च कदर गरिने बताउनु भएको छ। शुक्रबार पालिकामा आयोजित २२औँ महिला स्वास्थ्य स्वयंसेविका दिवस तथा दोस्रो गाउँपालिका स्वास्थ्य दिवसको भव्य समारोहलाई सम्बोधन गर्दै अध्यक्ष थपलियाले स्वास्थ्यकर्मीहरूको बलिदान र तपस्याको तुलना कुनै पनि आर्थिक लाभसँग हुन नसक्ने भन्दै उहाँहरूको योगदानलाई गाउँपालिकाले सधैँ शिरोधार्य गर्ने प्रतिबद्धता व्यक्त गर्नुभयो।

महिला स्वास्थ्य स्वयंसेविकाहरू ‘पहिलो डाक्टर’

अध्यक्ष थपलियाले महिला स्वास्थ्य स्वयंसेविकाहरूलाई गाउँटोल समाजको ‘पहिलो डाक्टर’ को रूपमा परिचित गराउनुभयो। उहाँले भन्नुभयो, “जहाँ पहिलो मान्छे बिरामी बन्छ, पहिलो मान्छेलाई ज्वरो आउँछ, त्यहाँ सबैभन्दा पहिला डाक्टर भनेर महिला स्वास्थ्य स्वयंसेविकालाई खोज्छ।” उहाँका अनुसार स्वास्थ्य क्षेत्रको कामलाई सेवा-सुविधाको आधारमा कमै मूल्याङ्कन भए पनि उहाँहरूले गरेको त्यागको कारण समाजले सधैँ सम्मान गर्छ र सरकारले पनि सेवा सुविधामा नभई सम्मानमा मूल्याङ्कन गरिरहेको छ।

उत्कृष्ट कर्मचारीको सम्मान र निरन्तरता

गाउँपालिकाले विगत वर्षदेखि नै स्वास्थ्य दिवस मनाउने र उत्कृष्ट स्वास्थ्य संस्थामा काम गर्ने कर्मचारीहरूलाई सम्मान गर्ने कार्यक्रम अगाडि बढाएको थपलियाले जानकारी दिनुभयो। उत्कृष्ट सम्मानको घोषणा कार्यक्रमलाई निरन्तरता दिँदै यस वर्ष चारवटा साबिकको गाविस अनुसार चार जना महिला स्वास्थ्य स्वयंसेविकालाई र सोही हैसियतमा पोषण स्वास्थ्य स्वयंसेवकलाई पनि उत्कृष्ट सम्मान गरिने घोषणा उहाँले गर्नुभयो।

उहाँले बेनिघाट रोराङ गाउँपालिकामा कुर्चीमा बस्दा मात्रै अध्यक्ष, उपाध्यक्ष वा हाकिम चिनिने तर कुर्चीबाट बाहिर निस्किएपछि कामका लागि सबै एउटै रहेको र यही एकताले पालिकालाई उत्कृष्ट बनाएको बताउनुभयो।

उत्कृष्टता टिकाई राख्ने चुनौती र भावी योजना

अध्यक्ष थपलियाले बेनिघाट रोराङ गाउँपालिकालाई उत्कृष्टमै टिकाई राख्न सबै कर्मचारी र समुदायलाई चुनौती रहेको बताउनुभयो।”सगरमाथाको शिखरमा बसिरहन धेरै कठिन छ, गाह्रो छ,” उहाँले भन्नुभयो, “यो टिकाउने काम यहाँहरूकै हो।” उहाँले यो कार्यक्रम (स्वास्थ्य दिवस) मानव समाज र बेनिघाट रोराङ रहुन्जेलसम्म निरन्तर अगाडि बढ्ने प्रतिबद्धता व्यक्त गर्नुभयो।

आगामी वर्षहरूमा स्वास्थ्य दिवसलाई रमाइलो र नमुनाको रूपमा विकास गरिने बताउँदै उहाँले यसलाई स्वास्थ्य सेक्टरमा काम गर्ने साथीहरूको प्रस्तुति देखाउने, कला देखाउने, भावनात्मक एकता र भावना आदानप्रदान गर्ने कार्यक्रम बनाइने स्पष्ट पार्नुभयो। कार्यक्रम स्वास्थ्यकर्मीहरूकै होस् भन्ने उद्देश्यले वडा अध्यक्ष तथा राजनीतिक पार्टीका नेताहरूको मन्तव्य पूरै रोक्ने निर्णय गरिएको जानकारी उहाँले दिनुभयो। अध्यक्ष थपलियाले गाउँपालिकाको अन्तिम उद्देश्य ३४ हजार जनतालाई नै एक बनाउने रहेको र यसका लागि सबै कर्मचारी र जनप्रतिनिधि एक ढिक्का भएर अगाडि बढिरहेको बताउनुभयो।

अन्तमा, अध्यक्ष थपलियाले स्वास्थ्यकर्मीहरूको जाँगरिलोपनको प्रशंसा गर्दै बेनिघाटले उहाँहरूको योगदानलाई कहिल्यै नबिर्सने बताउनुभयो र कार्यक्रममा उत्कृष्ट प्रस्तुति दिने सम्पूर्ण कलाकार साथीहरूलाई विशेष धन्यवाद व्यक्त गर्नुभयो।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।