भूकम्पपीडित समुदायसँग धनबहादुर घलेको छलफल, आचारसंहिता पालना गर्दै घरदैलो अभियान तीव्र

धादिङबेशी । आसन्न फागुन २१ गते हुने प्रतिनिधिसभा सदस्य निर्वाचनका लागि धादिङ निर्वाचन क्षेत्र नम्बर–२ बाट नेकपा एमालेका उम्मेदवार धनबहादुर घलेले २०७२ सालको भूकम्पबाट विस्थापित समुदायसँग छलफल गरेका छन् ।

मतदाता भेटघाट कार्यक्रमअन्तर्गत उत्तरी धादिङबाट विस्थापित भई नीलकण्ठ नगरपालिका–१२, दामगाडेमा बसोबास गर्दै आएका समुदायसँग घलेले छलफल गरेका हुन् । छलफलका क्रममा विस्थापित समुदायले घले विकासप्रेमी र धादिङको प्रभावकारी प्रतिनिधित्व गर्न सक्षम उम्मेदवार रहेको उल्लेख गर्दै मतदान गर्ने प्रतिबद्धता व्यक्त गरेका छन् ।

समुदायका सदस्यहरूले २०७० सालमा संविधानसभामा निर्वाचित भई संविधान लेखनजस्तो महत्वपूर्ण जिम्मेवारी निर्वाह गरेको भन्दै घलेप्रति धन्यवादसमेत व्यक्त गरे ।

छलफलका क्रममा उम्मेदवार घलेले आफूलाई पुनः विश्वास गरेर संविधानसभा सदस्यका रूपमा पठाएकोमा मतदाताप्रति आभार व्यक्त गरे । संविधानमार्फत दुर्गम तथा पछाडि परेका बस्तीका नागरिकहरूको हक–अधिकार सुनिश्चित गर्ने जिम्मेवारी आफूले इमानदारीपूर्वक पूरा गरेको उनले बताए ।

“संविधानसभा सदस्य भएर संविधान लेख्ने महत्वपूर्ण जिम्मेवारी प्राप्त भयो र मैले त्यो जिम्मेवारी पूरा गरेँ,” घलेले भने, “तर उत्तरी धादिङका नागरिकहरूको आवश्यकता र चाहनाअनुसार अझै थुप्रै काम बाँकी छन् । नागरिकको अवस्था र व्यवस्था फेरिने खालका नीति, नियम, कानुन र आवश्यक संविधान संशोधन आजको आवश्यकता हो ।”

उत्तरी धादिङको दिगो विकास, खनिजजन्य स्रोतको उत्खननका लागि आवश्यक नीति तथा कानुन निर्माण तथा अधुरा विकास आयोजनाहरू पूरा गर्न आफूले उम्मेदवारी दिएको घलेले स्पष्ट पारे । “तपाईंहरूको मतबाट प्रतिनिधि बनेर नागरिकको अधिकार थप मजबुत बनाउने र जनजीवन परिवर्तन गर्ने सेवक बन्ने अवसर दिनुहुनेछ भन्ने विश्वास छ,” उनले भने ।

निर्वाचन आचारसंहिता पालना गर्दै मतदाता भेटघाट तथा घरदैलो कार्यक्रमलाई तीव्रता दिइएको घलेले बताए । “हेर्दा सानो देखिए पनि नागरिकका गुनासा, माग र सवालहरूमा खुलेर कुरा गर्न सकिन्छ,” उनले भने, “आज धादिङबेशीका नागरिकहरूसँग घरदैलो कार्यक्रममार्फत भेटघाट गर्दा स्थिर सरकार, देशमै रोजगारीको वातावरण सिर्जना र प्रभावकारी कानुन निर्माणको माग आएको छ ।”

मतदाताबाट प्राप्त सुझाव र गुनासोलाई गम्भीरतापूर्वक सम्बोधन गर्दै दीर्घकालीन विकास, समृद्धिको योजना र नीतिनिर्माणमा कुनै कमी हुन नदिने प्रतिबद्धता पनि घलेले व्यक्त गरेका छन् ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।