धादिङको बेनिघाटमा भएको बस दुर्घटनाको छानविन सुरु

धादिङ- पृथ्वी राजमार्ग अन्तर्गत बेनिघाट रोराङ गाउँपालिका–५ चाईनीज धारामा गत आइतबार राति भएको बस दुर्घटनामा १९ जनाको ज्यान गएपछि सरकारले यो दुर्घटनाको छानवीन सुरु गरेको छ।

समितिले आजदेखि घटनास्थलमै पुगेर अध्ययन सुरु गरेको हो ।

४४ जना यात्रु बोकेर पोखराबाट काठमाडौँ आउँदै गरेको ग २ ख १४२१ नम्बरको यात्रुबाहक बस दुर्घटनापछि सहसचिव ऋषिराम तिवारीको नेतृत्वमा सात सदस्यीय छानबिन समिति गठन गरिएको थियो ।

तर यस्ता समिति गठन हुनु भने यो पहिलो घटना होइन। ठूला दुर्घटनापछि सरकारका संयन्त्र सक्रिय हुने, छानबिन समिति बन्ने, प्रतिवेदन तयार हुने र सिफारिस गरिने क्रम दोहोरिँदै आएका छन। तर कार्यान्वयनको पक्ष भने कमजोर रहने गरेको गुनासो छ।

नेपाल यातायात व्यवसायी राष्ट्रिय महासंघका कार्यवाहक अध्यक्ष सरोज सिटौलाका अनुसार हरेक गम्भीर दुर्घटनापछि बनेका छानबिन समितिले सरकारलाई प्रतिवेदन बुझाए पनि कार्यान्वयन प्रभावकारी हुन सकेको छैन।

चाईनीज धारामा भएको पोखरा–काठमाडौं बस दुर्घटना छानबिन समितिमा नेपाल प्रहरीका एसएसपी भुवनेश्वर तिवारी, सशस्त्र प्रहरी बलका एसएसपी भरत खनिँया, सडक विभागका सीडीई राकेश महर्जन, मन्त्रालयका उपसचिव वर्तराज पौडेल, यातायात व्यवस्था विभागका निर्देशक श्रीकान्त यादव तथा यातायात व्यवसायी राष्ट्रिय महासंघका कार्यवाहक अध्यक्ष सरोज सिटौला सदस्य रहेका छन्।

समितिलाई एक साताभित्र प्रतिवेदन बुझाउने समयसीमा तोकिएको छ। टोलीले सडकको भौगोलिक अवस्था, सवारीसाधनको प्राविधिक परीक्षण, चालक व्यवस्थापन तथा सम्भावित मानवीय त्रुटिमाथि अध्ययन गरिरहेको जनाएको छ।

विशेषगरी रातिको समयमा सवारी साधनको गति अनुगमन गर्ने प्रणाली अत्यावश्यक रहेको सरोकारवालाहरू बताउँछन्।

घुमाउरो तथा उकालो–ओरालो सडकपछि आउने समतल र सोझो खण्डमा समेत निगरानी प्रणाली लागू गर्नु जरुरी रहेको उनीहरूको भनाइ छ ।

हरेक दुर्घटनामा चालकलाई मात्र दोषी ठहर गर्ने प्रवृत्तिको अन्त्य हुनुपर्ने यातायात व्यवसायीहरूको भनाइ छ।

दुर्घटना केवल चालकको त्रुटि वा सवारीको अवस्थाका कारण मात्र नभई सडक संरचना र भौगोलिक अवस्थाका कारण पनि हुने उनीहरूको दाबी छ।

मलेखुदेखि मौवा खोलासम्मको क्षेत्र उच्च जोखिमयुक्त मानिँदै आएको छ। स्थानीयका अनुसार उक्त खण्डमा विगतमा पनि पटक–पटक ठूला सवारी दुर्घटना हुँदै आएका छन्।।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।