गणित शिक्षा परिषद् धादिङको अध्यक्षमा उत्तम भट्ट चयन

धादिङबेशी,३० जेष्ठ । गणित शिक्षा परिषद् धादिङको पाँचौँ जिल्ला अधिवेशन तथा साधारण सभाले आगामी कार्यकालका लागि उत्तम भट्टको अध्यक्षतामा नयाँ कार्यसमिति सर्वसम्मत रूपमा चयन गरेको छ।

धादिङबेसीमा सम्पन्न अधिवेशनबाट नीलकण्ठ बालमन्दिर माध्यमिक विद्यालयका गणित शिक्षक उत्तम भट्ट अध्यक्षमा चयन हुनुभएको हो। त्यसैगरी उपाध्यक्षमा चेतनारायण श्रेष्ठ, सचिवमा प्रकाश भण्डारी, सहसचिवमा रमेश गुरुङ र कोषाध्यक्षमा अनुप कोइराला चयन भएका छन्। सदस्यहरूमा चित्र गुरुङ, कृष्णनारायण श्रेष्ठ, राधिका सिंखडा, सोमनाथ पाठक, किरण गुरुङ र नारायण सुवेदी रहेका छन्।

निवर्तमान अध्यक्ष प्रयास रेग्मीको सभापतित्वमा सम्पन्न कार्यक्रममा नीलकण्ठ नगरपालिकाका प्रमुख भीमप्रसाद ढुङ्गाना प्रमुख अतिथिका रूपमा सहभागी हुनुभएको थियो। कार्यक्रममा गणित शिक्षा परिषद्का केन्द्रीय अध्यक्ष डा. रमेश अवस्थी तथा नीलकण्ठ बहुमुखी क्याम्पसका गणित विभाग प्रमुख हरि लम्सालको विशेष उपस्थिति रहेको थियो।

अधिवेशनका क्रममा जिल्लाभरिका गणित शिक्षकहरूको पेशागत विकास, गणित शिक्षामा देखिएका चुनौती तथा शिक्षण सिकाइ प्रक्रियालाई समयसापेक्ष, व्यवहारिक र प्रविधिमैत्री बनाउने विषयमा छलफल गरिएको थियो।

कार्यक्रममा नेपाल पुस्तक तथा स्टेसनरी व्यवसायी महासङ्घका अध्यक्ष नारायणकुमार श्रेष्ठ, गणित शिक्षा परिषद् बागमती प्रदेशका सचिव रामहरी श्रेष्ठ, नेल्टा धादिङका अध्यक्ष दिपेन्द्र रिजाल तथा स्टान धादिङका अध्यक्ष राजन श्रेष्ठलगायतले शुभकामना मन्तव्य व्यक्त गरेका थिए।

नवनिर्वाचित कार्यसमितिले जिल्लामा गणित शिक्षाको गुणस्तर अभिवृद्धि तथा प्रविधिमा आधारित शिक्षण प्रणाली विकासका लागि सक्रिय रूपमा काम गर्ने प्रतिबद्धता जनाएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।

यो पनि पढ्नुहोस् : कास्कीमा अनिवार्य तथा निःशुल्क आधारभूत शिक्षा कार्यान्वयनमा जोड