बेरुजु फछ्यौटमा नीलकण्ठको उल्लेखनीय सफलता : धादिङमा पहिलो, देशभरमा नवौँ

धादिङबेशी,५ जेष्ठ । धादिङको नीलकण्ठ नगरपालिका बेरुजु फछ्यौट कार्यसम्पादनमा जिल्लामै पहिलो बनेको छ । महालेखा परीक्षकको कार्यालयले जेठ १ गते सार्वजनिक गरेको ६३ औँ वार्षिक प्रतिवेदनअनुसार नगरपालिकाले बागमती प्रदेशभर चौथो स्थान हासिल गर्नुका साथै देशभरका २९३ नगरपालिकामध्ये पाँचौँ स्थानमा आफूलाई स्थापित गरेको हो । त्यसैगरी, देशभरका ७५३ स्थानीय तहमध्ये कम बेरुजु हुने सूचीमा नीलकण्ठ नवौँ स्थानमा परेको छ ।

प्रतिवेदनअनुसार नीलकण्ठ नगरपालिकामा ०.०९ प्रतिशत मात्रै बेरुजु रहेको छ । चालु आर्थिक वर्षमा नगरपालिकाले १९ करोड २६ लाख रुपैयाँ बराबरको बेरुजु फछ्यौट गर्न सफल भएको जनाएको छ ।

नगर प्रमुख भीम प्रसाद ढुङ्गानाले सुशासन, पारदर्शिता र जवाफदेहितालाई केन्द्रमा राखेर नगरपालिकाले योजनाबद्ध रूपमा काम गर्दै आएको बताउनुभयो । नेपाल नगरपालिका महासंघका अध्यक्षसमेत रहनुभएका ढुङ्गानाले कार्यपालिका टिम, शाखा प्रमुख, कर्मचारी प्रशासन तथा सम्पूर्ण कर्मचारीहरूको सामूहिक प्रयासका कारण यो सफलता सम्भव भएको धारणा राख्नुभयो । उहाँले वित्तीय अनुशासनलाई प्राथमिकतामा राख्दै आगामी दिनमा पनि सेवा प्रवाह र आन्तरिक नियन्त्रण प्रणालीलाई थप प्रभावकारी बनाइने बताउनुभयो ।

नगरपालिकाका प्रमुख प्रशासकीय अधिकृत हरिदत्त कँडेलले आर्थिक अनुशासन, नियमित अनुगमन, समयमै कागजात व्यवस्थापन तथा बेरुजु फछ्यौट प्रक्रियालाई प्राथमिकतामा राखेर काम गरिएकै कारण उल्लेखनीय उपलब्धि हासिल भएको बताउनुभयो । उहाँले शाखा प्रमुखहरूको जिम्मेवारीबोध, कार्यसम्पादनप्रतिको गम्भीरता तथा समन्वयकारी भूमिकाले परिणाममुखी काम गर्न सहयोग पुगेको उल्लेख गर्नुभयो ।

नगरपालिकाका वरिष्ठ लेखा अधिकृत आर्जन श्रेष्ठले शाखा प्रमुखहरू, कार्यपालिका टिम तथा कर्मचारीहरूको निरन्तर मेहनत र जिम्मेवार कार्यशैलीका कारण सकारात्मक नतिजा प्राप्त भएको प्रतिक्रिया दिनुभयो । उहाँका अनुसार प्रत्येक शाखाले आफ्नो जिम्मेवारीअनुसार वित्तीय अनुशासन पालना गर्दै अभिलेख व्यवस्थापनमा विशेष ध्यान दिएका कारण बेरुजु न्यूनीकरण प्रभावकारी बनेको हो ।

महालेखा परीक्षकको प्रतिवेदनअनुसार धादिङ जिल्लामा कम बेरुजु हुने स्थानीय तहमध्ये रुवीभ्याली गाउँपालिका दोस्रो, नेत्रावती डबजोङ गाउँपालिका तेस्रो, बेनिघाट रोराङ गाउँपालिका चौथो तथा गंगाजमुना गाउँपालिका पाँचौँ स्थानमा रहेका छन् ।

यो पनि पढ्नुहोस् : घान्द्रुकमा फोहोरमैला सङ्कलन केन्द्र उद्घाटन; दिगो पर्यटनका लागि वातावरण संरक्षणमा जोड

प्रतिवेदनमा रुवीभ्यालीको ०.१६,नेत्रावती डवजोङको ०.२८,बेनिघाटको ०.४२ र गंगाजमुनाको ०.४९ प्रतिशत मात्रै वेरुजु देखिएको छ ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।