धादिङको मार्पाकमा विपद् पूर्वतयारी तथा व्यवस्थापन तालिम सम्पन्न

धादिङबेशी, १५ असार । धादिङको नेत्रावती डबजोङ गाउँपालिकामा तीनदिने विपद् पूर्वतयारी तथा व्यवस्थापन तालिम सम्पन्न भएको छ । गाउँपालिकाको आयोजना तथा प्रत्युष नेटवर्क प्रालिको समन्वयमा वडा नम्बर १ को मार्पाकमा शुक्रबारदेखि सञ्चालन भएको तालिम आइतबार सम्पन्न भएको हो ।

विपद् जोखिम न्यूनीकरण, पूर्वतयारी, प्रतिकार्य तथा समन्वय क्षमताको विकास गर्ने उद्देश्यले आयोजित तालिममा वडा नम्बर १ र २ का ५१ जना लक्षित बर्गको सहभागिता रहेको थियो । तालिममा विपद् व्यवस्थापनको अवधारणा, स्थानीय तहको भूमिका, जोखिम पहिचान तथा नक्साङ्कन, समुदायस्तरको पूर्वतयारी, खोज तथा उद्धार, प्राथमिक उपचार, सुरक्षित उद्धार तथा बाढी, पहिरो, आगलागी र भूकम्पलगायतका विपद्का समयमा अपनाउनुपर्ने सावधानीबारे सैद्धान्तिक र व्यवहारिक प्रशिक्षण प्रदान गरिएको थियो । साथै राहत व्यवस्थापन, मनोसामाजिक सहयोग तथा वडा र पालिकास्तरको विपद् कार्ययोजना निर्माणका विषयमा समेत प्रशिक्षण दिइएको थियो ।

तालिममा सशस्त्र प्रहरी बल नेपाल नम्बर ३१ गुल्म हेडक्वार्टरका सशस्त्र प्रहरी निरीक्षक रामचन्द्र खड्का, नेपाल रेडक्रस सोसाइटीका नेशनल डिजाष्ट्रर रेसपोन्स टिमका सदस्य रमेश अधिकारी, प्राथमिक उपचारका प्रशिक्षक दीपेश कुमार कार्की, कृष्णप्रसाद अधिकारी लगाएतले सहजीकरण गर्नुभएको थियो ।

समापन कार्यक्रममा गाउँपालिकाका प्रवक्ता तथा वडा नम्बर १ का अध्यक्ष ठाकुर गुरुङले गाउँपालिकाको भौगोलिक संवेदनशीलता र प्राकृतिक विपद्को उच्च जोखिमलाई मध्यनजर गर्दै तालिम सञ्चालन गरिएको बताउनुभयो । उहाँले यस्ता बिपद संग सम्बन्धित क्षमता अभिवृद्धिमूलक तालिम आगामी दिनमा पनि निरन्तर सञ्चालन गरिने प्रतिबद्धता व्यक्त गर्नुभयो ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।

यो पनि पढ्नुहोस् : हेमजामा ‘हिले हङ्गा’ तयारी पुरा: असार १५ मा हिलोमै फुटबल र भलिबल खेलिने