लायन्स क्लब अफ धादिङ नीलकण्ठको ‘एक लायन, एक बिरुवा’ अभियान

धादिङवेशी, २३ साउन । लायन्स क्लब अफ धादिङ, नीलकण्ठले वातावरण संरक्षणलाई घरआँगनबाटै सुरु गर्ने उद्देश्यसहित ‘एक लायन, एक बिरुवा’ अभियान सञ्चालन गरेको छ। डिभिजन वन कार्यालय धादिङको समन्वयमा प्राप्त बिरुवा क्लबका सदस्यहरूले आ–आफ्नो घरआँगन तथा उपयुक्त स्थानमा रोपेका हुन्।

क्लबका अध्यक्ष पोषनाथ अधिकारीको नेतृत्वमा डिभिजन वन कार्यालय परिसरमा आयोजित कार्यक्रममा वन कार्यालयका तर्फबाट क्लबलाई बिरुवा हस्तान्तरण गरिएको थियो। हस्तान्तरणपछि सहभागी सदस्यहरूले बिरुवा ग्रहण गरी आफ्नो घर तथा आसपासका क्षेत्रमा वृक्षरोपण गरेका छन्।

कार्यक्रममा क्लबका सचिव दीपक सिटौला, कोषाध्यक्ष शरणकुमार श्रेष्ठ, ट्रेजरर गोविन्द भण्डारी, डिस्ट्रिक्ट सिनियर एओजी ईश्वरीप्रसाद पाण्डे, ईश्वरकुमार श्रेष्ठलगायत लायन सदस्यहरूको सहभागिता रहेको क्लबले जनाएको छ।

अध्यक्ष अधिकारीले वातावरण संरक्षणको सुरुआत व्यक्ति र घरबाटै हुनुपर्ने बताए। घरआँगनलाई हरियाली र स्वच्छ बनाउने साना प्रयासले दीर्घकालीन रूपमा वातावरण संरक्षणमा योगदान पुग्ने उनको भनाइ थियो।

लायन्स क्लब्स इन्टरनेसनलले वातावरण संरक्षणलाई आफ्ना प्रमुख कार्यक्षेत्रमध्ये एकका रूपमा समेटेको छ। सोही अवधारणाअनुसार क्लबले वृक्षरोपणलाई एकदिने कार्यक्रममा सीमित नगरी वार्षिक कार्यतालिका बनाएर वातावरणसम्बन्धी गतिविधि सञ्चालन गर्ने जनाएको छ।

क्लबले रोपिएका बिरुवाको नियमित संरक्षण र हेरचाह गर्न सदस्यहरूलाई आग्रह गरेको छ। कार्यक्रममा सहभागी हुन नसकेका सदस्यलाई समेत क्लबको सम्पर्कमा आएर बिरुवा ग्रहण गरी अभियानमा सहभागी हुन आह्वान गरिएको छ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।