नीलकण्ठका कृषि उद्यमीहरूका लागि वित्तीय पहुँच विस्तारसम्बन्धी अन्तरक्रिया कार्यक्रम

धादिङ, असार ३१ गते ।
नीलकण्ठ नगरपालिकामा जलवायु अनुकूल कृषि र कृषिमा आधारित साना तथा मझौला उद्यमीहरूको लागि वित्तीय पहुँच विस्तारसम्बन्धी अन्तरक्रिया कार्यक्रम सम्पन्न भएको छ। एक्सन नेपाल र नीलकण्ठ नगरपालिका धादिङको आयोजना तथा म्ऋब् को आर्थिक सहयोगमा उक्त कार्यक्रम आयोजना गरिएको हो।

कार्यक्रममा नीलकण्ठ नगरपालिका भित्रका ५० जना महिला तथा कृषिमा आधारित साना तथा मझौला उद्यमीहरूको सहभागिता रहेको थियो।
कार्यक्रममा उनीहरूको वित्तीय पहुँच, डिजिटल बैंकिङको प्रयोग, जलवायु स्मार्ट कृषि अभ्यास तथा बजार पहुँच विस्तारमा केन्द्रित छलफलहरू गरिएको थियो।

महिला नेतृत्वमा रहेका उद्यमीहरूको वित्तीय साक्षरता अभिवृद्धि, निजी क्षेत्रसँगको सहकार्यमा डिजिटल र जलवायु अनुकूल कृषि अभ्यासलाई प्रवद्र्धन गर्ने, उत्पादन र सेवाको बजार पहुँच सुदृढ गर्ने, र मिश्रित वित्त सुविधाको परीक्षण तथा सिकाइलाई जोड दिइने कार्यक्रमको उद्धेश्य रहेको थियो ।

कार्यक्रममा सहभागी उद्यमीहरूलाई आधारभूत बैंकिङ अभिमुखीकरण, वित्तीय साक्षरता तालिम, डिजिटल बैंकिङ प्रयोग तालिम, व्यवसाय सञ्चालन र व्यवस्थापनमा डिजिटल प्रविधिको प्रयोग सम्बन्धी जानकारी गराइएको थियो।

कार्यक्रममार्फत नीलकण्ठ नगरपालिकाका साना तथा मझौला उद्यमीहरूको व्यवसायलाई अझ व्यवस्थित, टिकाउ र आधुनिक बनाउने प्रयास गरिएको आयोजक संस्थाले जनाएको छ ।

कार्यक्रमलाई सम्बोधन गर्नुहुँदै नीलकण्ठ नगरपालिकाका नगर प्रमुख भिम प्रसाद ढुंगानाले मेयर उद्यमशीलता कार्यक्रम मार्फत व्यवसाय गर्न चाहने उद्यमीहरुलाई २ लाख देखि १५ लाखसम्म सहुलियत कर्जा उपलब्ध गराउँदै आएको बताउनुभयो । उहाँले उक्त रकमलाई उद्धेश्य अनुसार खर्च गरी आफ्नो जिविको पार्जन बृद्धि गर्न आग्रह गर्नुभयो ।

एक्सन नेपालका उपाध्यक्ष रामशरण गिरिको अध्यक्षतामा भएको कार्यक्रममा नीलकण्ठ नगरपालिकाका नगर प्रमुख भिम प्रसाद ढुंगानाको प्रमुख आतिथ्यता रहेको थियो । कार्यक्रममा नगरपालिकाका प्रवक्ता तथा वडा नं ८ का वडाअध्यक्ष प्रकाश कुमार श्रेष्ठ, कार्यपालिका सदस्यहरु , विभिन्न वडाका वडा अध्यक्ष तथा प्रतिनिधिहरु, एक्सन नेपालका कार्यकारी निर्देशक कमलराज ढुंगाना लगायत साना तथा मझौला कृषि उद्यमीहरुकोे उपस्थिति रहेको थियो ।

यो पनि पढ्नुहोस् : संघीयतामा आमसञ्चार र संसदीय-अदालती रिपोर्टिङ अभिमुखीकरण पोखरामा सुरु

कार्यक्रममा उपस्थित उद्यमीहरुले नगरपालिकाले मेयर उद्यमशिलता कार्यक्रम अन्तरगत उपलब्ध गराएको सहुलियतपुर्ण कर्जाले आफनो व्यवसाय विस्तार गर्न सहयोग पुगेको बताएका थिए । साथै आगामी दिनमा यस्ता कार्यक्रमलाई निरन्तरता दिन र उद्यमीहरुलाई प्रोत्साहन गर्न अनुरोध गरेका थिए ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।