‘द एभरेस्ट ड्रीम’ ले अमेरिकामा जित्यो उत्कृष्ट डकुमेन्ट्री फिल्म अवार्ड

काठमाडौं । निर्देशक तथा पत्रकार गणेश पाण्डेद्वारा निर्देशित डकुमेन्ट्री फिल्म ‘द एभरेस्ट ड्रीम’ ले अमेरिकाको जर्जियास्थित कोब इन्टरनेसनल फिल्म फेस्टिभल (Cobb International Film Festival) मा बेस्ट डकुमेन्ट्री फिल्म अवार्ड जितेको छ ।

अगस्ट ६ देखि ९ सम्म जर्जियाको मारिएट्टा सहरमा आयोजना भएको महोत्सवमा नेपालबाट ‘द एभरेस्ट ड्रीम’ मात्र छनोट भएको थियो । महोत्सवका कार्यकारी निर्देशक तथा फेस्टिभल डाइरेक्टर डा. रिचर्ड टाभेनारोका अनुसार संसारभरबाट प्राप्त फिल्महरूको प्रतिस्पर्धामा ‘द एभरेस्ट ड्रीम’ले उत्कृष्ट डकुमेन्ट्री फिल्मको अवार्ड प्राप्त गरेको हो ।

ब्रेन इन्जुरीबाट बाँचेका बेलायती नागरिकहरूको असाधारण सगरमाथा यात्रामा आधारित ‘द एभरेस्ट ड्रीम’ले गम्भीर मस्तिष्क चोटपछि जीवनसँग संघर्ष गरिरहेका व्यक्तिहरूले पुनः जीवनमा सपना देख्दै त्यसलाई पूरा गर्न गरेको प्रयासको कथा प्रस्तुत गरेको छ।

डाक्टरहरूले पुनः सामान्य रूपमा हिँड्न, बोल्न वा दैनिक जीवनमा फर्किन कठिन हुने बताएका केही व्यक्तिहरूले हार नमानी नेपाल आएर सगरमाथा आधार शिविर पुग्ने सपना बोकेका थिए । द लिटिल शेर्पा फाउण्डेशनका जेम्स ल्याम्बको नेतृत्वमा पाँच जना ब्रेन इन्जुरीबाट बाँचेका व्यक्ति तथा उनीहरूका परिवारसहित सात जनाको टोली सगरमाथा आधार शिविर पुगेको थियो । यही असाधारण यात्रालाई निर्देशक पाण्डेले करिब डेढ वर्ष लगाएर डकुमेन्ट्रीमा प्रस्तुत गरेका हुन् ।

‘द एभरेस्ट ड्रीम’ले पाण्डेको अन्तर्राष्ट्रिय डकुमेन्ट्री यात्रामा अर्को महत्वपूर्ण उपलब्धि थपेको छ । यसअघि उनको चर्चित डकुमेन्ट्री ‘भाग्यले बाँचेकाहरू’ ले सन् २०१७ मा यही कोब इन्टरनेसनल फिल्म फेस्टिभलमा बेस्ट डकुमेन्ट्री फिल्म अवार्ड जितेको थियो । त्यस्तै, बहुपति प्रथामाथि आधारित उनको अर्को डकुमेन्ट्री ‘को–हजबेण्ड’ ले सन् २०२२ मा सोही महोत्सवमा बेस्ट डकुमेन्ट्री फिल्म अवार्ड प्राप्त गरेको थियो ।

यसरी पाण्डेका तीन फरक डकुमेन्ट्रीले एउटै अन्तर्राष्ट्रिय फिल्म महोत्सवमा तीन फरक वर्ष २०१७, २०२२ र २०२६ मा बेस्ट डकुमेन्ट्री फिल्म अवार्ड जितेका छन् । नेपाली डकुमेन्ट्रीका लागि यो विशेष अन्तर्राष्ट्रिय उपलब्धि मानिएको छ ।

यो पनि पढ्नुहोस् : प्रदीप खड्का र सनिशाको जोडी लिएर ‘शुभ विवाह’ घोषणा

‘भाग्यले बाँचेकाहरू’ले १७ भन्दा बढी अन्तर्राष्ट्रिय पुरस्कार जित्नुका साथै ३२ भन्दा बढी देशमा प्रदर्शन भएको थियो । त्यस्तै ‘को–हजबेण्ड’ले पनि एक दर्जनभन्दा बढी उत्कृष्ट डकुमेन्ट्री फिल्म अवार्ड जित्दै ४० भन्दा बढी अन्तर्राष्ट्रिय फिल्म महोत्सवमा सहभागिता जनाएको थियो ।

‘द एभरेस्ट ड्रीम’मा एशोसिएट निर्मात्री शारदा गैरे, क्यामेरापर्सन सुरेश श्रेष्ठ र निरज पन्थी, सम्पादक ईश्वर कोइराला, संगीतकार जुगल डंगोल र सन्दीप सरदार तथा न्यारेटर कौशल घिमिरेको योगदान रहेको छ ।

फिल्म निर्माणको सुरुवातका लागि प्रेरणा दिने जेम्स ल्याम्ब तथा द लिटिल शेर्पा फाउण्डेशनप्रति निर्देशक पाण्डेले विशेष आभार व्यक्त गरेका छन् । लिटिल शेर्पा फाउण्डेशनसँगको सहकार्यकै क्रममा पाण्डेले सन् २०१७ मा बेलायतको संसद्मा ‘भाग्यले बाँचेकाहरू’ प्रदर्शन गर्ने अवसरसमेत पाएका थिए ।

‘द एभरेस्ट ड्रीम’ले नेपालमा प्रिमियरपछि अन्तर्राष्ट्रिय फिल्म महोत्सवहरूको यात्रा सुरु गरेको हो । फिल्मले आगामी दिनमा विश्वका विभिन्न प्रतिष्ठित अन्तर्राष्ट्रिय फिल्म महोत्सवमा सहभागिता जनाउने तयारी गरिरहेको निर्देशक पाण्डेले बताए ।

पाण्डेले भने, “यो अवार्ड मेरो व्यक्तिगत उपलब्धि मात्र होइन, हाम्रो सम्पूर्ण टिम र फिल्मका पात्रहरूको संघर्षको सम्मान हो । ब्रेन इन्जुरीपछि पनि मानिसले आफ्नो जीवनमा नयाँ सपना देख्न सक्छ र त्यसलाई पूरा गर्न सक्छ भन्ने सन्देश विश्वभर पुर्‍याउन पाउनु नै हाम्रो सबैभन्दा ठूलो उपलब्धि हो ।”

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।