कृष्णभिर र गजुरीको परेवाभिरमा आएको पहिरोकारण पृथ्वीराजमार्ग अवरुद्ध कायमै

धादिङ १४,भदौ । त्रिशूली नदीमा आएको बाढीका कारण धादिङको बेनीघाट रोराङ गाउँपालिका क्षेत्रको कृष्णभीरमा सडक भासिनुका साथै गजुरी गाउँपालिकाको परेवाभीरमा पहिरो खसेपछि पृथ्वी राजमार्ग अवरुद्ध कायमै रहेको छ ।

बेनीघाट रोराङ गाउँपालिकास्थित कृष्णभीर क्षेत्रमा सडकको ठूलो भाग भासिएपछि राजमार्गमा सवारी आवागमन पूर्ण रूपमा रोकिएको जिल्ला प्रहरी कार्यालय धादिङले जनाएको छ । सो स्थानमा सडक नै भासिएकाले तत्काल राजमार्ग सञ्चालनमा ल्याउन कठिन देखिएको प्रहरीले जनाएको छ ।

यसैगरी, गजुरी गाउँपालिकास्थित परेवाभीरमा पहिरो खसेपछि उक्त क्षेत्रमा समेत सडक अवरुद्ध भएको छ । त्रिशूली नदीमा बढेको बहावका कारण राजमार्गका विभिन्न भाग जोखिममा परेका छन् ।

काठमाडौंलाई देशका मध्य तथा पश्चिमी भूभागसँग जोड्ने मुख्य सडकमार्गका रूपमा रहेको पृथ्वी राजमार्ग अवरुद्ध हुँदा यात्रु तथा मालवाहक सवारीसाधन बीच बाटोमै रोकिएका छन् ।

प्रहरीले जोखिमयुक्त क्षेत्रमा सावधानी अपनाउन तथा सडकको अवस्था यकिन गरेर मात्र यात्रा गर्न सर्वसाधारणलाई आग्रह गरेको छ ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।