रास्वपा धादिङ जिल्ला सदस्यमा मिनाकुमारी गुरुङ र मथुरा गजुरेल मनोनीत

धादिङबेशी,२७ भाद्र । राष्ट्रिय स्वतन्त्र पार्टी (रास्वपा) धादिङ जिल्ला समितिको सदस्य पदमा दुई जना मनोनीत हुनुभएको छ । जिल्ला समितिको बैठकले रुबी भ्याली गाउँपालिकाकी मिनाकुमारी गुरुङ र थाँक्रे गाउँपालिकाका मथुरा गजुरेललाई सदस्य पदमा मनोनयन गरेको हो ।

पार्टी संगठनलाई थप चलायमान, सशक्त र समावेशी बनाउने उद्देश्यसहित भूगोल र समुदायको सन्तुलन मिलाएर यो मनोनयन गरिएको जिल्ला सभापति राजन अर्यालले जानकारी दिनुभयो ।

दुर्गम भूगोल तथा विभिन्न समुदायको प्रतिनिधित्व सुनिश्चित भएपछि जिल्लामा पार्टी संगठन विस्तार र जनसरोकारका मुद्दा उठाउन थप सहज हुने विश्वास व्यक्त गरिएको छ । नवनियुक्त सदस्यहरूले पनि पार्टीको नीति र विचारलाई गाउँ–बस्तीसम्म पु¥याउन तथा जनताको सेवामा सक्रिय रूपमा लाग्ने प्रतिबद्धता व्यक्त गर्नुभएको छ ।

यसैबीच, रास्वपा धादिङको बैठकले हालैको बाढी–पहिरोबाट प्रभावित क्षेत्रमा उद्दार तथा सरसफाइमा खटिने सम्पूर्ण स्वयंसेवक, सुरक्षाकर्मी तथा स्थानीयलाई एकमुष्ट धन्यवाद ज्ञापन गरेको छ । बाढीबाट विशेषगरी गल्छीको महेशदोभानस्थित बैरेनी अस्पताल र बागेश्वरी माध्यमिक विद्यालयमा पुगेको क्षतिका क्रममा पार्टीले सुरुवातमै स्वयंसेवक परिचालनको आह्वान गरी हिलो पन्छाउने र सरसफाइको नेतृत्वदायी पहल लिएको स्मरण गर्दै सभापति अर्यालले राहत र उद्धारमा खटिने सबैप्रति आभार व्यक्त गर्नुभयो ।

साथै, बाढी–पहिरोका कारण धादिङ जिल्लामा ज्यान गुमाउने नागरिकहरूप्रति जिल्ला समितिले गहिरो दुःख व्यक्त गर्दै भावपूर्ण श्रद्धाञ्जली अर्पण गरेको छ । बैठकले शोकसन्तप्त परिवार तथा आफन्तजनमा हार्दिक समवेदना प्रकट गर्दै घाइतेहरूको शीघ्र स्वास्थ्यलाभको कामना समेत गरेको छ ।

लेखकको बारेमा

असल खबरअसल साथी मिडिया प्रा.लि.द्वारा संचालित असल खबर डटकम डिजिटल खबर पत्रिका हो । २०७६ सालबाट नियमित रुपमा विभिन्न समसामयिक खबरहरुको साथै सामाजिक, आर्थिक, राजनीतिक ,खेलकुद ,खोजमुलक सामग्रीहरु पनि सदैव प्रकाशन र प्रसारण गर्दै आइरहेका छौँ । देश तथा विदेशको हरेक कुना-कुनामा रहेका जनमानसमाको हात-हात र नजर-नजरमा सहि र सत्य खबर पुर्याउन हामी कटिबद्ध छौँ ।

यो पनि पढ्नुहोस् : आफ्नो गाउँ सफा गर्न आफैँ जुटे युवा